گازدىڭ جارىلۋ سەبەپتەرىن انىقتاۋ ماقساتىندا سوتقا دەيىن تەرگەۋ جۇمىستارى جۇرگىزىلىپ جاتىر. شۇعىل دەرەكتەر بويىنشا, زارداپ شەگۋشىلەر سانى 9 ادام, ونىڭ 3-ءۋى قازا تاپقان. جەرگىلىكتى اتقارۋشى ورگاندارمەن بىرلەسىپ زارداپ شەگۋشىلەرگە كومەك كورسەتىلىپ جاتىر. اپات بولعان ءۇيدىڭ 100-دەن استام تۇرعىنى ۋاقىتشا №47 مەكتەپكە كوشىرىلدى. بۇعان قوسا, زارداپ شەگۋشىلەردىڭ ءبىر بولىگى «بايتەرەك» شاعىن اۋدانىنداعى كوپقاباتتى تۇرعىن ۇيگە كوشىرىلدى. ولارعا ىستىق تاماق بەرىلىپ, ۋاقىتشا تۇرۋعا قاجەتتى جاعدايلار جاسالعان, مەديتسينالىق-پسيحولوگيالىق كومەك كورسەتىلىپ جاتىر.
قر پرەمەر-ءمينيسترىنىڭ ورىنباسارى ج. قاسىمبەك زارداپ شەگۋشى ازاماتتارمەن كەزدەسىپ, الداعى قولداۋ شارالارى تۋرالى حابارلادى.
«ازىرگە بۇل ءۇي جابىق بولادى, وندا ءتيىستى زەرتتەۋ جۇمىستارى جۇرگىزىلەدى. ءۇيدىڭ قايتا قالىپقا كەلتىرۋگە جاراپ-جارامايتىنىن جانە ت.ب. تەكسەرەمىز. بۇعان ۋاقىت كەرەك. جۇمىستار جۇرگىزىلىپ جاتقان كەزدە اكىمدىك سىزدەرگە ءومىر سۇرۋگە قاجەتتى بارلىق جاعدايدى جاسايدى», — دەدى زارداپ شەگۋشىلەرگە ج. قاسىمبەك.
№47 ورتا مەكتەپتە قر پرەمەر-ءمينيسترىنىڭ ورىنباسارى جامبىل وبلىسىنىڭ اكىمى ا. مىرزاحمەتوۆتىڭ, پوليتسيا دەپارتامەنتتەرىنىڭ, ۇلتتىق قاۋىپسىزدىك كوميتەتىنىڭ, «جەدەل قۇتقارۋ جاساقتارى» مم, «قازترانسگازايماق» جبف, «تاراز قالالىق ەلەكتر جەلىلەرى» جشس وكىلدەرىنىڭ قاتىسۋىمەن وپەراتيۆتى كەڭەس وتكىزدى.
كەڭەس قورىتىندىسى بويىنشا جامبىل وبلىسىنىڭ اكىمىنە ءتيىستى قىزمەتتەرگە اپاتتىق-قالىپقا كەلتىرۋ جۇمىستارىن جۇرگىزۋگە كومەك كورسەتۋ, زارداپ شەگۋشىلەرگە قالىپقا كەلتىرۋ جۇمىستارى كەزەڭىندە ءومىر سۇرۋگە قاجەتتى جاعدايلار جاساۋ تاپسىرىلدى.
ەسكە سالا كەتەيىك, تاراز قالاسىنداعى تج بايلانىستى +7–7262–513575 ءنومىرى بويىنشا جەدەل جەلى جۇمىس ىستەيدى.
