«قازاقستان حالقى اسسامبلەياسى» عيماراتىندا دەپورتاتسيا جىلدارى قازاقستانعا قونىس اۋدارعان ەتنوستار تۋرالى «تاعدىر توعىستىرعان» اتتى كىتاپ, فوتو, تاريحي قۇجاتتار كورمەسى ۇيىمداستىرىلدى.
كورمەگە وقۋشىلار, ستۋدەنتتەر, جالپى جاستار بۋىنى وكىلدەرى قاتىسىپ, قازاق جەرىنە كۇشتەپ قونىس اۋدارىلعان ەتنوستاردىڭ باستان كەشكەندەرىن, مۇندا جەرگىلىكتى حالىق تاراپىنان قانداي قولداۋلارعا يە بولعاندىعى جونىندە دەرەكتەرمەن تانىستى.
كورمەگە وڭىرلىك قوعامدىق-ساياسي تاريحى مەملەكەتتىك ءارحيۆى, شىمكەنت قالالىق ساياسي قۋعىن-سۇرگىن قۇرباندارى مۋزەيى, قالالىق «وتىرار» عىلىمي-امبەباپ كىتاپحاناسى, ءبىلىم مەكەمەلەرى جانە ەتنومادەني بىرلەستىكتەر 200-گە تارتا تاريحي-مادەني دۇنيەلەردى جۇرت نازارىنا ۇسىندى.
سوناۋ تار زاماندا قازاق جەرىنە كۇشتەپ قونىس اۋدارىلعان ازەربايجان ەتنوسىنىڭ ءۇشىنشى ۇرپاعى ارزۋ گۋربانوۆا قيىن-قىستاۋ كەزەڭدە اتا-بابالارى قازاقتىڭ دارحان دالاسىنا تاپ بولىپ, وسى بەيبىت كۇنگە ەسەن-امان جەتكەندىگىن تەبىرەنە ءسوز ەتتى.
«تۇتاستاي العاندا حح عاسىردىڭ باسىنان باستاپ, قازاقستانعا 5,6 ميلليون ادام كۇشتەپ قونىس اۋدارىلدى. قازاق وتباسىلارىنىڭ وزدەرى اۋىر ەكونوميكالىق جاعدايلاردى باستان كەشىپ, بۇرىن-سوڭدى بولماعان رەپرەسسياعا ۇشىراپ جاتسا دا, قونىستانۋشىلارعا قولداۋ كورسەتتى. قازاق جەرىنەن پانا تاپقانداردىڭ اراسىندا ءبىزدىڭ اعا ۇرپاق وكىلدەرى دە بار. جەرگىلىكتى حالىق باس ساۋعالاپ كەلگەندەردىڭ ءتىلىن تۇسىنبەسە دە ءوز باۋىرىنداي قاراپ, بارىمەن ءبولىستى. مەيىرىم جىلۋىن بەردى. قازىر دە ءتۇرلى ەتنوس وكىلدەرىنە ۇدايى قامقور كوزبەن قاراپ, بايتەرەكتەي سايا بولىپ كەلەدى. قازاق حالقىنىڭ جاقسىلىعىن ەتنوستاردىڭ بۇگىنگى ۇرپاقتارى ۇمىتپاۋى ءتيىس», دەيدى ازەربايجان ەتنوسىنىڭ وكىلى.
باسقوسۋدا مۇنان وزگە تۇرىك, يران, كورەي, شەشەن سەكىلدى بىرقاتار ەتنوس وكىلدەرى ازاپتى جىلداردا پانا بولعان قازاق ەلىنە اقەدىل العىسىن ايتىپ, پاتريوتتىق تاقىرىپتا جىر وقىدى.
نۇرشات توكەن,
«Egemen Qazaqstan»
شىمكەنت
