كەلىسىمشارت بەكىتكەن ەمحانالار مەن كلينيكالار كەپىلدەندىرىلگەن تەگىن مەديتسينالىق كومەك پاكەتى شەڭبەرىندە مەملەكەتتىك تاپسىرىستى ورىنداماق. بۇل تۋرالى وڭىرلىك كوممۋنيكاتسيالار قىزمەتىندە وتكەن ءباسپاسوز جيىنىندا «الەۋمەتتىك مەديتسينالىق ساقتاندىرۋ قورى» كەاق-نىڭ وبلىستىق فيليال ديرەكتورىنىڭ مىندەتىن ۋاقىتشا اتقارۋشى نۇرشات ايتىمبەتوۆا مالىمدەدى. جەكەمەنشىك كلينيكالار ستاتسيوناردى الماستىراتىن كومەك تۇرلەرىن كورسەتۋدە بەلسەندىلىك تانىتىپ وتىر. سونىمەن قاتار, ستاتسيونارلىق جانە ەمحانالىق-امبۋلاتورلىق كومەك, اۋىلدىق جەرلەردەگى ەمحانالىق-امبۋلاتورلىق جانە كونسۋلتاتيۆتىك-دياگنوستيكالىق كومەك, جوعارى تەحنولوگيالىق قىزمەتتەر كورسەتۋ باعىتىندا دا جەكەمەنشىك سالانىڭ ۇلەسى باسىم. «قازىرگى تاڭدا جەكەمەنشىك كلينيكالار كورسەتەتىن مەديتسينالىق كومەك تۇرلەرى دە كوبەيدى. ماسەلەن, بيىلعى جىلى ولار ونكولوگيالىق كومەك, جەدەل مەديتسينالىق جانە ءپاللياتيۆتى كومەك, وڭالتۋ جانە قالپىنا كەلتىرۋگە باعىتتالعان كومەك تۇرلەرىن كورسەتۋدە ەرەكشە بەلسەندىلىك تانىتىپ وتىر. بيىل تۇركىستان وبلىسى بويىنشا مەملەكەتتىك تاپسىرىستى 34 جەكەمەنشىك كلينيكا ورىنداپ جاتىر. بۇل مەديتسينالىق ساقتاندىرۋ قورىنىڭ دەرەكقورىنا تۇركىستان وبلىسى بويىنشا ەنگەن 73 مەديتسينا ۇيىمىنىڭ 46 پايىزى. قالعان 54 پايىزى – مەملەكەتتىك ەمحانالار. وعان قوسا, جەكەمەنشىك كلينيكالار وڭالتۋ جانە قالپىنا كەلتىرۋگە باعىتتالعان كومەك تۇرلەرىن كورسەتۋگە دە بەلسەندى تۇردە اتسالىسىپ جاتىر», – دەدى ن. ايتىمبەتوۆا.
عالىمجان ەلشىباي,
«Egemen Qazaqstan»
تۇركىستان وبلىسى
