قازاق كۇرەسىنەن الماتىلىق كلۋب فەدەراتسيامەن بىرلەسە وتىرىپ, ۇلتتىق كۇرەستى دامىتۋ باعدارلاماسىمەن اينالىسادى. ونداعى ماقسات – ءتول ونەرىمىزدى بۇقارالىق سپورتقا اينالدىرۋ. قازىرگى كەزدە الماتىنىڭ سەگىز اۋدانىنداعى مەكتەپتەردە قازاق كۇرەسى ۇيىرمەلەر اشىلىپ, سول جەرلەردە بالالار سپورتتىڭ بۇل تۇرىمەن تەگىن اينالىسۋدا. بۇنى سپورتتى دامىتۋعا باعىتتالعان ۇلكەن قادام دەپ باعالاعان ءجون.
جارىستىڭ اشىلۋ سالتاناتىندا قاتىسۋشىلارعا كەزىندە قازسسر, ودان كەيىن قازاقستاننىڭ قازاق كۇرەسى فەدەراتسياسىنىڭ پرەزيدەنتى بولعان ەرعالي مۇحيتدينوۆ قۇتتىقتاۋ ءسوزىن ارنادى. «ۇلتتىق كۇرەسىمىزدىڭ قالىپتاسۋىنا ەرەن ەڭبەك سىڭىرگەن مامانداردىڭ ءبىرى – مەنىڭ ۇستازىم, ەلىمىزگە ەڭبەك سىڭىرگەن جاتتىقتىرۋشى پەتر ماتۋششاك ەدى. ول دەنە شىنىقتىرۋ ينستيتۋتىندا ارنايى ۇيىرمە اشتى. ال كلاسسيكالىق كۇرەستەن وليمپيادا چەمپيونى جاقسىلىق ۇشكەمپىروۆ ءوزىنىڭ سپورتتاعى العاشقى قادامىن قازاق كۇرەسىنەن باستاعان بولاتىن», – دەدى ارداگەر بالۋان.
الماتى قالاسى ءبىلىم باسقارماسىنىڭ رۋحاني-ادامگەرشىلىك تاربيە جانە ءوزىن-ءوزى تانۋ ءبولىمىنىڭ باستاعى نۇرگۇل تاۋ: «سپورت وتانسۇيگىشتىككە تاربيەلەيدى. سپورتپەن شۇعىلداناتىن بالالار ءوز ۋاقىتىن الدىن-الا جوسپارلايدى. ولار جيناقى بولادى, الدىنا ماقسات قويادى جانە دە ۇلەسىمدى تۇلعا رەتىندە قالىپتاسادى», – دەپ اتاپ ءوتتى.
ءتۇرلى جاس جانە سالماق ەرەكشەلىكتەرى بويىنشا ارايلىم ابەنوۆا, ساپۋرا اسپادىق, ءمولدىر ازامات, ەرسۇلجان جورابەك, ەلدار اقىلجان, ءىلياس اقىتاەۆ, عالىمجان رايباەۆ, ميراس شاكىروۆ, يسكاندەر گريچيك جانە تاعى باسقا بالۋاندار قالا چەمپيونى اتاندى.
عالىم سۇلەيمەن,
«Egemen Qazaqstan»
