– وسكەمەن قالاسىندا مۇنداي دارەجەدەگى مونۋمەنتالدى گوبەلەن تۋىندىلارىنىڭ كورمەسى العاش رەت وتكىزىلىپ وتىر. بۇل جوبانىڭ ەلىمىز بويىنشا شىعىس قازاقستان ونەر مۋزەيىنەن باستالعانىنا شىن قۋاندىق, – دەيدى مۋزەي ديرەكتورى بەكايىم ۇياباەۆا.
كورمەدە ۇسىنىلعان 30-عا جۋىق تۋىندىلاردىڭ ارقايسىسى ءمان-ماعىناسىمەن تاڭعالدىرسا, الۋان تۇستەرى مەن رەڭكتەرى كوزدىڭ جاۋىن الادى. مىسالى «دينا», «الاتاۋ», «بەسىك جىرى», «قوناق», «ساردارلار», «حانىمدار» سىندى تۋىندىلارى قازاق حالقىنىڭ كوشپەلى تىرلىگى مەن سالت-داستۇرىنەن سىر شەرتەدى.
– ءبىز كوبىنەسە تاريحي-ميفولوگيالىق جانردا جۇمىس ىستەيمىز. باتىرلار مەن پالۋاندار, سالت-داستۇرلەر – ءبىزدىڭ شىعارماشىلىعىمىزدىڭ نەگىزگى وزەگى. مەنىڭ ويىمشا, ۇمىت قالعان داستۇرلەرىمىزدى قايتا جاڭعىرتۋدى باستى نازاردا ۇستاۋىمىز كەرەك. بۇگىنگى ءىس-شارانىڭ ماقساتى دا سول, – دەيدى مالىك مۇقانوۆ.
گوبەلەنشى شەبەرلەر تەك كورمەلىك تۋىندىلاردى دۇنيەگە اكەلىپ قانا قويماي, سونىمەن قاتار قازاقستاننىڭ بەلگىلى نىساندارىن بەزەندىرۋگە, سونىڭ ىشىندە, استانا مەن الماتىنىڭ اكىمشىلىك عيماراتتارىنىڭ ىشكى كورىنىستەرىن, الماتى مەتروپوليتەنىنىڭ, ءىرى كومپانيالاردىڭ, مەشىتتەردىڭ كوركەمدىك جۇمىستارىنا دا ءوز ۇلەستەرىن قوسىپ, قولتاڭبالارىن قالدىرعان.
مەرەي قاينار ۇلى
وسكەمەن
