بۇل قۇقىقتى جوعارى وقۋ ورنى سينگاپۋر, جاپونيا, قىتاي, تايۆان جانە ءۇندىستان ۋنيۆەرسيتەتتەرى اراسىنان وزىپ شىعىپ يەلەنگەن.
نازارباەۆ ۋنيۆەرسيتەتتىڭ گۋمانيتارلىق جانە الەۋمەتتىك عىلىمدار مەكتەبىنىڭ ستۋدەنتى جانە نازارباەۆ ۋنيۆەرسيتەتتىڭ ستۋدەنتتىك ۇكىمەتىنىڭ پرەزيدەنتى, The HPAIR Astana 2019 ۇيىمداستىرۋ كوميتەتىنىڭ جەتەكشىسى لەيلا احمەتوۆا اتاپ وتكەندەي, تۇپكىلىكتى شەشىم قابىلداۋ ماقساتىندا گارۆارد ۋنيۆەرسيتەتىنىڭ (اقش) HPAIR ۇيىمداستىرۋ كوميتەتىنىڭ مۇشەلەرىنەن قۇرىلعان دەلەگاتسيا جۋىردا استانا قالاسىنا كەلىپ, نازارباەۆ ۋنيۆەرسيتەتتىڭ ۇيىمداستىرۋ كوميتەتىنىڭ مۇشەلەرىمەن كەلىسسوزدەر وتكىزگەن. ەندى نازارباەۆ ۋنيۆەرسيتەتتىڭ كومانداسى ءىس-شارانى بىرلەسىپ دايىنداۋ ماقساتىندا گارۆاردقا اتتانادى.
ايتا كەتەتىن جايت, HPAIR-2019 كونفەرەنتسياسى استانا قالاسىندا جاستار جىلى اياسىندا ءوتىپ, قازاقستاندىق جاس ۇرپاققا جاڭا مۇمكىندىكتەردى ۇسىنادى. ءىس-شارانىڭ كۇن تارتىبىنە التى تاقىرىپتىق پانەل كىرەتىنىن ايتا كەتكەن ءجون. ياعني, الەۋمەتتىك ساياسات جانە ينكليۋزيۆتىك دامۋ, الەمدىك ەكونوميكا, قاۋىپسىزدىك جانە ديپلوماتيا, بيزنەس جانە تەحنولوگيالار, قورشاعان ورتانىڭ تۇراقتىلىعى جانە ەنەرگەتيكا, سونداي-اق مادەنيەت جانە مەديا باعىتتارى بويىنشا سەكتسيالار جوسپارلانىپ وتىر.
جالپى, ازيا جانە حالىقارالىق قاتىناستار جونىندەگى گارۆارد جوباسى ازيا ەلدەرىندە گارۆارد ۋنيۆەرسيتەتىنىڭ باستاماسىمەن وتەتىن ەڭ ءىرى ستۋدەنتتىك كونفەرەنتسيا سانالادى. كەلەلى جيىن ستۋدەنتتەر مەن جاس ماماندار ءۇشىن تىنىق مۇحيتى ايماعىنداعى جانە ازيا ەلدەرىندەگى ەڭ ماڭىزدى ەكونوميكالىق, ساياسي جانە الەۋمەتتىك ماسەلەلەردى تالقىلاۋ ماقساتىندا پىكىرتالاس الاڭى رەتىندە قۇرىلعان. كونفەرەنتسيا 1991 جىلدان باستاپ 32 مىڭ قاتىسۋشىنى تارتا وتىرىپ, الەمنىڭ 12 ەلىندەگى جوعارى وقۋ ورىندارىندا ءوتتى. كونفەرەنتسيانىڭ بۇرىنعى سپيكەرلەرىنىڭ اراسىندا تانىمال عالىمدار مەن نوبەل سىيلىعىنىڭ لاۋرەاتتارى, ديپلوماتتار, حالىقارالىق ۇيىمداردىڭ باسشىلارى بار.
ميراس اسان,
«Egemen Qazaqstan»
