شەتەلدە ءومىر ءسۇرىپ جاتقان قازاقتاردى قولداۋ ماقساتىندا ەلباسى نۇرسۇلتان نازارباەۆتىڭ تاپسىرماسىمەن قۇرىلعان «وتانداستار» قورى مەن ەلىمىزدىڭ جاستارىن الەمدەگى ەڭ ۇزدىك جوعارى وقۋ ورىندارىندا وقىتۋ ىسىمەن اينالىسىپ كەلە جاتقان حالىقارالىق باعدارلامالار ورتالىعى بىرلەسىپ, سىرت مەملەكەتتەردە ءومىر ءسۇرىپ جاتقان قازاق جاستارىنىڭ وتاندىق ءھام شەتەلدىك جوعارى وقۋ ورىندارىندا ءبىلىم الۋىن قامتاماسىز ەتۋ جايىندا ىنتىماقتاستىق مەموراندۋمىنا قول قويدى.
اتالمىش شارانى ىسكە اسىرۋ ءۇشىن جاقىن كۇندەرى «وتانداستار» قورى مەن حالىقارالىق باعدارلامالار ورتالىعىنىڭ وكىلدەرى موڭعوليا, وزبەكستان جانە رەسەي ەلدەرىنە بارىپ, ونداعى قانداستارمەن, دالىرەك ايتقاندا مەكتەپ ءبىتىرۋشى تۇلەكتەرمەن كەزدەسىپ, جوعارىدا قول قويىلعان مەموراندۋم جايلى تانىستىرىپ, شەتەلدىك قازاق جاستارىنىڭ ءبىلىم الۋىنا جول اشپاق.
«كەشىكپەي ارنايى جۇمىس توبى 120 مىڭعا جۋىق قازاق تۇراتىن بايولكە ايماعىنا اتتانادى. ول جەردە شامامەن بيىل مىڭ جارىم تۇلەك مەكتەپ ءبىتىرىپ جاتقان كورىنەدى. ياعني, بۇلار قازاق تىلىندە ءبىلىم العان قازاقستاندىق وقۋ ورىندارىنا تۇسە الاتىن الەۋەتتى جاستار. ماسەلەن, وتكەن جىلى وزبەكستاننان ەلىمىزگە ءبىلىم الۋعا 12 مىڭ ستۋدەنت جاس كەلسە, ونىڭ 5 مىڭعا جۋىعى – ەتنوستىق قازاقتار. بۇلاردىڭ ءبارى قازىر تەگىن ءبىلىم الىپ جاتىر. مۇنداي باعدارلامالار كوپ. بىراق تا سىرتتاعى قانداستارىمىزعا دۇرىس اقپار جەتپەي جاتادى. سوندىقتان ءبىز اقپاراتتاندىرۋ باعىتىندا جۇمىس ىستەيتىن بولامىز», دەيدى «وتانداستار» قورى پرەزيدەنتىنىڭ كەڭەسشىسى ديدار بولات.
بەكەن قايرات ۇلى,
«Egemen Qazaqstan»
