قايىرىمدىلىق ىستەردى قولداۋ, ناسيحاتتاۋ, بەلسەندى ازاماتتىق باستامانى دامىتۋ ماقساتىندا جاريالانعان بايقاۋدىڭ وتىنىشتەرى بىلتىرعى قاراشا مەن بيىلعى اقپان ارالىعىندا قارالدى.
قۇتتىقتاۋ ءسوز العان د.نازارباەۆا: «بۇل بايقاۋ ەلىمىزدىڭ ناعىز پاتريوتتارىن, ازاماتتاردىڭ يگى ىستەرىن, مۇقتاج ادامدارعا قامقورلىق كورسەتىپ جۇرگەن جومارت جانداردى انىقتاپ بەردى. ولار – ۇلكەن جۇرەكتى قاراپايىم ادامدار», دەي كەلە, بايقاۋعا ءار سالادان, ءار ايماقتان 97 ءوتىنىم تۇسكەنىن ايتتى. ولاردىڭ اراسىندا كاسىپكەرلەر, قوعامدىق مەكەمە, ءبىلىم سالاسىنىڭ ماماندارى, مۇمكىندىگى ەرەكشە جاندار, قۇقىق قورعاۋ سالاسىنىڭ قىزمەتكەرلەرى, ءتىپتى مەكتەپ وقۋشىلارى بار.
بايقاۋ جەڭىمپازدارى 5 اتالىم بويىنشا انىقتالعان. تەرىدەن ۇلتتىق ناقىشتا زاتتار شىعاراتىن قاراعاندىلىق سىمبات ەلىكباەۆا «اسار» اتالىمىندا جەڭىمپاز اتاندى. ول ءاردايىم بالالارعا تەگىن شەبەرلىك ساباقتار وتكىزەدى. ال «تۋعان جەر» نوميناتسياسىندا اتىراۋدان كەلگەن ارمان حايرۋللين جەڭىسكە جەتتى. ول تۋعان قالاسىندا 2017 جىلى 10 مىڭ كوشەت تاراتۋ جانە وتىرعىزۋ بويىنشا اكتسيا ۇيىمداستىرعان. اقمولا وبلىسىنىڭ تۋماسى ۇلدانا سوۆەت «باتىل جۇرەك» نوميناتسياسىندا ۇزدىك دەپ تانىلدى. ول – بايقاۋدىڭ ەڭ جاس جەڭىمپازى. ۇلدانا 2017 جىلعى قاراشادا جانىپ جاتقان ۇيدەن كىشى ءىنىسى مەن ەكى ءسىڭلىسىن الىپ شىققان. الماتى قالاسىنىڭ تۇرعىنى راسيما تەمىرباەۆا «مەيىرىم جولىندا» نوميناتسياسىندا جەڭىسكە جەتتى. ول دەنساۋلىعىنداعى قيىندىققا قاراماستان, قاريالاردى كۇندەلىكتى تاماقتاندىرادى. قازىر كۇنىنە 400 تۇسكى اس تاراتاتىن ەكى تاماقتاندىرۋ ورنى قىزمەت ەتەدى. «قايىرىمدىلىق تاريحى» نوميناتسياسىندا سولتۇستىك قازاقستان وبلىسىنان الەكساندرا كوندراتوۆا جەڭىس تۇعىرىنان كورىندى. «نەدەليا سك» گازەتىنىڭ ءجۋرناليسى ا.كوندراتوۆانىڭ مۇقتاج جاندار جايىندا جازعان ماقالالارى ارقاسىندا ادامدارعا ناقتى كومەك كورسەتىلگەن.
بۇدان بولەك قور ەكى ارنايى سىي تاعايىندادى. وعان كومپيۋتەر, نوۋتبۋك قۇراستىرىپ, ولاردى جاعدايى تومەن, كوپ بالالى وتباسىنان شىققان, اتا-انا قامقورلىعىنسىز قالعان, مۇگەدەك, ناۋقاس بالالارعا سىيلايتىن راۆيل ناسيفۋلين جانە قوسشى اۋىلىندا 200 بالاعا ارنالعان اعىلشىن ءتىلىن تەرەڭدەتىپ وقىتاتىن, ءتۇرلى ۇيىرمەلەر جۇرگىزەتىن 12 كابينەتتى مەكتەپ سالدىرىپ جاتقان سايرا ماتايباەۆا يە بولدى.
جەڭىمپازدارعا ديپلوم, بايقاۋ ستاتۋەتكاسى جانە «وقجەتپەس» ەمدەۋ-ساۋىقتىرۋ كەشەنىنە جولداما بەرىلدى. ال باتىر ۇلدانا سوۆەتكە قوسىمشا نوۋتبۋك سىيعا تارتىلدى.
ۇيىمداستىرۋشىلار العاش ءوتىپ وتىرعان بۇل بايقاۋدى جىل سايىن وتكىزۋ جوسپاردا بار ەكەنىن جەتكىزدى. ايتا كەتەيىك, شارانى ەلباسى قورى مەن قازاقستاننىڭ ىسكەر ايەلدەرى قاۋىمداستىعى ۇيىمداستىرعان.
ايدانا شوتبايقىزى,
«Egemen Qazaqstan»
