ا.مامين ءماسليحات دەپۋتاتتارىنا مەملەكەت باسشىسىنىڭ و.ءورازاليننىڭ كانديداتۋراسىن اقتوبە وبلىسىنىڭ اكىمى لاۋازىمىنا ۇسىنۋ تۋرالى حاتىن وقىپ بەردى. دەپۋتاتتار ەل پرەزيدەنتى ۇسىنعان كانديداتۋرانى ءبىراۋىزدان قولدادى.
وڭداسىن سەيىل ۇلى ورازالين 1963 جىلى دۇنيەگە كەلگەن. اقتوبە پەداگوگيكالىق ينستيتۋتىن, س. م. كيروۆ اتىنداعى قازاق مەملەكەتتىك ۋنيۆەرسيتەتىن تامامداعان. مەملەكەتتىك قىزمەتتە ءارتۇرلى لاۋازىمداردى اتقارعان, كوممەرتسيالىق سەكتوردا جۇمىس ىستەگەن. اتاپ ايتساق, اقتوبە وبلىسىنىڭ مۇعالجار اۋدانىنىڭ اكىمى, اقتوبە وبلىسى اكىمىنىڭ ورىنباسارى. 2017 جىلعى ناۋرىزدان باستاپ پرەزيدەنت اكىمشىلىگى باسشىسىنىڭ ورىنباسارى بولىپ ەڭبەك ەتكەن.
ا. مامين كەزەكتەن تىس سەسسيا قورىتىندىسى بويىنشا اقتوبە وبلىسىنىڭ اكتيۆىمەن كەزدەسۋ وتكىزدى. پرەمەر-مينيستر ب.ساپارباەۆقا ءوڭىردىڭ دامۋىنا قوسقان ۇلەسى ءۇشىن العىس ءبىلدىردى. جۇمىستىڭ 4 جىلىندا وبلىستىڭ الەۋمەتتىك-ەكونوميكالىق دامۋىندا ەلەۋلى ناتيجەلەرگە قول جەتكىزىلدى, جاڭا يندۋستريالىق جوبالار ىسكە اسىرىلدى, الەۋمەتتىك سالاعا ۇلكەن سەرپىن بەرىلدى. ا.مامين ب.ساپارباەۆقا جاڭا قىزمەتىندە تابىس تىلەپ, ەلباسىنىڭ كورسەتكەن جوعارى سەنىمىن ابىرويمەن اقتايتىنىنا سەنىم ءبىلدىردى. ەسكە سالا كەتەيىك, پرەزيدەنت ن.نازارباەۆتىڭ جارلىعىمەن ب.ساپارباەۆ اقتوبە وبلىسىنىڭ اكىمى قىزمەتىنەن بوساتىلىپ, ەڭبەك جانە حالىقتى الەۋمەتتىك قورعاۋ ءمينيسترى بولىپ تاعايىندالدى.
پرەمەر-مينيستر جاڭا اكىمدى تانىستىرۋ بارىسىندا و.ءورازاليننىڭ ءتۇرلى جاۋاپتى باسشىلىق لاۋازىمداردا, سونىڭ ىشىندە اقتوبە وبلىسى اكىمىنىڭ ورىنباسارى قىزمەتىندە ۇلكەن جۇمىس تاجىريبەسى بار ەكەنىن اتاپ ءوتتى. سوڭعى جىلدارى پرەزيدەنت اكىمشىلىگى باسشىسىنىڭ ورىنباسارى بولىپ قىزمەت ەتكەن. ول وڭىرلىك جۇمىستىڭ, سونداي-اق الەۋمەتتىك جاڭعىرۋ سالاسىنىڭ قىر-سىرىن مەڭگەرگەن. ا.مامين جاڭا اكىمگە ساتتىلىك تىلەپ, وبلىس اكتيۆىمەن بىرلەسىپ, ەلباسى العا قويعان مىندەتتەردىڭ ساپالى ورىندالۋىن قامتاماسىز ەتەتىنىنە سەنىم ءبىلدىردى.
سونداي-اق پرەزيدەنت تاپسىرماسىمەن پرەمەر-مينيستر ا.مامين تۇركىستان وبلىسىنا بارىپ, وبلىستىق ءماسليحاتتىڭ كەزەكتەن تىس سەسسياسىنا قاتىستى.
ا.مامين سەسسيا بارىسىندا ءماسليحات دەپۋتاتتارىنا مەملەكەت باسشىسىنىڭ ءو.شوكەەۆتى تۇركىستان وبلىسىنىڭ اكىمى لاۋازىمىنا تاعايىنداۋ ۇسىنىسى تۋرالى حاتىن وقىپ بەردى. داۋىس بەرۋ قورىتىندىسى بويىنشا دەپۋتاتتار پرەزيدەنت ۇسىنعان كانديداتۋرانى ءبىراۋىزدان قولدادى.
ومىرزاق ەستاي ۇلى شوكەەۆ 1964 جىلى تۇركىستاندا دۇنيەگە كەلگەن. ماسكەۋ ەكونوميكالىق-ستاتيستيكالىق ينستيتۋتىن تامامداعان. جوعارى جاۋاپتى لاۋازىمداردا جۇمىس ىستەگەن. اتاپ ايتساق, وڭتۇستىك قازاقستان جانە قوستاناي وبلىستارىنىڭ اكىمى, ەكونوميكا جانە ساۋدا ءمينيسترى, پرەزيدەنت اكىمشىلىگى باسشىسىنىڭ ورىنباسارى, استانا قالاسىنىڭ اكىمى, پرەمەر-ءمينيستردىڭ ءبىرىنشى ورىنباسارى, «سامۇرىق-قازىنا» ۇاق» اق باسقارما توراعاسى. 2017 جىلعى جەلتوقساننان باستاپ پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى قىزمەتىن اتقارعان.
پرەمەر-مينيستر تۇركىستان وبلىسىنىڭ اكتيۆىمەن وتكەن كەزدەسۋدە ج.تۇيمەباەۆقا اتقارعان جۇمىسى ءۇشىن العىس ءبىلدىردى. تۇركىستان قالاسىنىڭ العاشقى اكىمى رەتىندە ول وبلىس ورتالىعىن تۇركىستان قالاسىنا كوشىرۋ, جاڭا وبلىستىڭ اكىمشىلىك-اۋماقتىق قۇرىلىمىن ۇيىمداستىرۋ, كوشى-قون ماسەلەلەرىن, جاڭا قالانىڭ اۋقىمدى قۇرىلىس جۇمىستارىن ۇيىمداستىرۋ بويىنشا بىرقاتار جۇمىس اتقاردى.
ا.مامين وبلىستىڭ جاڭا اكىمىن تانىستىرا وتىرىپ, ءو.شوكەەۆتىڭ قوستاناي, وڭتۇستىك قازاقستان وبلىستارىنىڭ جانە استانا قالاسىنىڭ اكىمى رەتىندە اتالعان وڭىرلەردىڭ الەۋمەتتىك-ەكونوميكالىق دامۋىنا ۇلكەن ۇلەس قوسقانىن اتاپ ءوتتى. بۇدان وزگە پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى رەتىندە ءوزىن ىسكەر, تاجىريبەلى باسشى جانە جوعارى دەڭگەيدەگى ۇيىمداستىرۋشى رەتىندە كورسەتتى. كاسىبي بىلىكتىلىگى مەن جاۋاپكەرشىلىگى الەۋمەتتىك ماڭىزدى مىندەتتەردى ساپالى ورىنداپ, مەملەكەت باسشىسىنىڭ سەنىمىن اقتاۋعا مۇمكىندىك بەرەدى.
«تۇركىستان وبلىسىنىڭ دامۋى ەلباسىنىڭ ەرەكشە نازارىندا. مەملەكەت باسشىسىنىڭ باستاماسىمەن قاسيەتتى تۇركىستان قالاسىندا جاڭا ۇلكەن قۇرىلىس باستالدى», دەگەن ا.مامين, جەرگىلىكتى اتقارۋشى ورگاندار الدىندا جاڭا قالانىڭ جاڭعىرۋىن ۋاقتىلى قامتاماسىز ەتىپ, بۇكىل تۇركى الەمىنىڭ مادەني-رۋحاني استاناسى رەتىندە وركەندەتۋ جانە ونى قارقىندى دامىتۋ, جاڭا جۇمىس ورىندارىن اشۋ, ازاماتتاردىڭ الەۋمەتتىك جاعدايىن جاقسارتۋ بويىنشا زور جاۋاپكەرشىلىكتى جۇكتەيتىن مىندەتتەر قويىلعانىن اتاپ ءوتتى.
تەمىر قۇسايىن,
عالىمجان ەلشىباي,
«Egemen Qazaqstan»
