بۇگىن زاۋىت «قازاقستان تەمىر جولى» ۇك» اق-عا جانە باسقا دا كاسىپورىندارعا تەمىر جول دوڭگەلەكتەرىن جاسايدى. جالپى, ەكىباستۇزدا تەمىر جولعا قاجەتتى قۇرال-جابدىقتاردىڭ ءبارى جاسالادى. جۇك ۆاگوندارىن دا جاسايتىن كاسىپورىن بار. دەنى 2010 جىلى اشىلعان كومپانيالار سودان بەرى ءبىراز قيىندىقتان ءوتىپ كەلەدى.
ەندى مىنە, «پرومماشكومپلەكت» جشس-نا يننوۆاتسيالىق وزگەرىس ەنگىزىلدى. مەتالدى بالقىتىپ, ودان دوڭگەلەكتەر قۇيىپ شىعارۋ ءىسى بىرنەشە ساتىدان تۇرادى. جۇمىسى اۆتوماتتاندىرىلعان روبوتتاردى وپەراتورلار كومپيۋتەر ارقىلى باسقارادى.
سەرىكتەستىكتىڭ باسشىسى داۋلەت سىزدىقوۆ ءمالىم ەتكەنىندەي, بۇل جوبانىڭ جالپى قۇنى 54 ملرد تەڭگەنى قۇرايدى. ونىڭ 36 ملرد تەڭگەسى قازاقستاننىڭ دامۋ بانكى ارقىلى قارجىلاندىرىلعان.
«قازاقستاننىڭ دامۋ بانكى» اق ەل ەكونوميكاسىنىڭ شيكىزاتتىق ەمەس جانە ينفراقۇرىلىمدىق سەكتورلارىن جاڭعىرتۋ جانە دامىتۋ جونىندەگى ۇلتتىق دامۋ ينستيتۋتى سانالادى. ياعني, وندىرىستىك ينفراقۇرىلىمدى جانە وڭدەۋ ونەركاسىبىن دامىتۋعا, سىرتقى جانە ىشكى ينۆەستيتسيالار تارتۋعا ىقپال ەتەدى. ول يندۋستريالىق-يننوۆاتسيالىق دامۋ مەملەكەتتىك باعدارلامالارىنىڭ اسا ءىرى ينۆەستيتسيالىق وپەراتورى سانالادى.
اتالعان بانكتىڭ باسقارۋشى ديرەكتورى ءادىل يسماعامبەتوۆتىڭ ايتۋىنشا, جوبانىڭ جۇزەگە اسىرىلۋى ەلىمىزدىڭ شيكىزاتتىق ەمەس سەكتورىن دامىتۋ ءۇشىن وتە ماڭىزدى. يمپورتتى الماستىرۋ, ەكسپورتتىق الەۋەت جانە ەاەو ەلدەرىندەگى ۇقساس وندىرىستەرمەن سالىستىرعاندا جوعارى ونىمدىلىك سياقتى ءۇش قۇرامداسى بار. تەمىر جول جەلىسى دامىعان ەلدەردىڭ قازاقستانعا گەوگرافيالىق جاعىنان جاقىن ورنالاسقانى دا نازارعا الىنعان. بۇل دا تەمىر جول دوڭگەلەكتەرىنىڭ سۇرانىسىن ارتتىرادى. بولاشاقتا ءونىمدى شەتەلدىك نارىققا شىعارۋ دا جوسپارلانۋدا.
نەگىزى كاسىپورىننان جىلىنا 200 مىڭ دوڭگەلەك شىعارۋ جوسپارلانىپ وتىر.
– مۇنداي ءوندىرىس ورنى بۇرىن قازاقستاندا بولماعان. بۇعان دەيىن تەمىر جولعا قاجەتتى دوڭگەلەكتەردى يمپورتتاپ كەلگەن ەدىك. وسى تەكتەس وندىرىستەردىڭ ىسكە قوسىلۋىن كوپ كۇتتىك. بۇل – ەلىمىزدەگى يندۋستريالاندىرۋ باعىتىنداعى ماڭىزدى قادام, – دەگەن بولاتىن ەلباسى تەلەكوپىر بارىسىندا.
بىرەر جىل بۇرىن ەكىباستۇزداعى تەمىر جول كلاستەرىن جولعا قويۋ ءۇشىن كولەمدى ەلەكتر ەنەرگياسى قاجەت بولدى. ەنەرگيا بەرەتىن ستانسا جوباسىن «Siemens» كومپانياسى جاساپ شىقتى. مەملەكەتتىك-جەكەشەلىك ارىپتەستىك اياسىندا بىلتىر جازدا جاڭا ەلەكتر ستانساسى ىسكە قوسىلدى.
سول ستانسا قازىر «پرومماشكومپلەكت» جشس-دان باستاپ, تەمىر جولعا قاجەتتى زاتتار جاساپ شىعاراتىن «R.W.S. Wheelset», «R.W.S. Concrete», «R.W.S. BINDING» سياقتى كاسىپورىنداردى دا ەلەكتر ەنەرگياسىمەن قامتاماسىز ەتەدى.
فاريدا بىقاي,
«Egemen Qazaqstan»
ەكىباستۇز
