بايقاۋشىلاردىڭ قورىتىندىسى بويىنشا سايلاۋ زاڭعا سايكەس اشىق, باسەكەلەستىك تۇرعىسىندا بولدى. مولدوۆا ورتالىق سايلاۋ كوميسسياسىنىڭ داۋىس بەرۋگە ازىرلىگى مەن ونى وتكىزۋ جونىندەگى كاسىبي جۇمىسى ەرەكشە اتاپ ءوتىلدى. بارلىعى 2143 سايلاۋ ۋچاسكەسى, ونىڭ ىشىندە 123-ءى شەتەلدە ۇيىمداستىرىلدى.
تمد پارلامەنتارالىق اسسامبلەياسى بايقاۋشىلار توبىنىڭ ۇيلەستىرۋشىسى, قازاقستان رەسپۋبليكاسى پارلامەنتى سەناتى توراعاسىنىڭ ورىنباسارى بەكتاس بەكنازاروۆتىڭ ايتۋىنشا, داۋىس بەرۋ كەزىندە تمد پاا بايقاۋشىلارى كيشينەۆتە, بەلتسىدە, گاگاۋزيا اۆتونوميالىق اۋماقتىق قۇرىلىمى مەن ەلدىڭ التى وڭىرىندەگى 100-گە جۋىق سايلاۋ ۋچاسكەسىندە بولدى.
ء«بىز پارلامەنتتىك سايلاۋ مولدوۆا رەسپۋبليكاسىنىڭ سايلاۋ زاڭناماسى مەن حالىقارالىق سايلاۋ ستاندارتتارىنا سايكەس ءوتتى دەپ سانايمىز. داۋىس بەرگەن كۇنى ءبىز مولدوۆا رەسپۋبليكاسىنىڭ بۇقارالىق اقپارات قۇرالدارى سايلاۋ ناۋقانىنىڭ بار اۋقىمىن بەلسەندى تۇردە قامتىعانىنا كۋا بولدىق. سايلاۋ ۋچاسكەلەرىنە بارعان كەزدە ءبىزدىڭ بايقاۋشىلار جەكەلەگەن ەسكەرتۋلەر جاسادى, بىراق ولار وتە سيرەك بولدى. ءبىزدىڭ پىكىرىمىزشە, ولار داۋىس بەرۋدىڭ ناتيجەلەرىنە اسەر ەتپەيدى», - دەدى بەكتاس بەكنازاروۆ.
ۇيلەستىرۋشىنىڭ ايتۋى بويىنشا, ازەربايجان, ارمەنيا, بەلارۋس, قازاقستان, قىرعىزستان, رەسەي جانە تاجىكستان وكىلدەرىنەن تۇراتىن تمد پاا-نىڭ بارلىق بايقاۋشىلارىنان قۇرالعان مونيتورينگ توبىنىڭ قورىتىندىسى ءبىراۋىزدان ماقۇلدانىپ, قول قويىلدى.
