قازاقستان رەسپۋبليكاسى پرەزيدەنتى سىيلىعىنىڭ, حالىقارالىق «الاش» ادەبي سىيلىعىنىڭ, مەملەكەتتىك «دارىن» جاستار سىيلىعىنىڭ لاۋرەاتى, قازاقستان رەسپۋبليكاسىنىڭ ەڭبەك سىڭىرگەن قايراتكەرى كەشتە جىردان شاشۋ شاشسا, جاستار اقىننىڭ ولەڭدەرىن مانەرلەپ وقىدى. بەلگىلى ونەر شەبەرلەرى مەن ەسترادا جۇلدىزدارى اقىننىڭ ولەڭىنە جازىلعان اندەردى اۋەلەتە ورىندادى. شارانىڭ ۇيىمداستىرۋشىسى – قازاق-امەريكا ۋنيۆەرسيتەتىنىڭ باسشىلىعى دا ءوز كەزەگىندە قاراپ قالماي, مارالتاي اقىننىڭ جىرلارىن جاتقا وقىدى.
بۇكىل سانالى عۇمىرىن شىعارماشىلىق جولعا ارناپ, قازاق ادەبيەتىنىڭ دامۋىنا ايرىقشا ۇلەس قوسىپ كەلە جاتقان مارالتاي رايىمبەك ۇلىنىڭ ءار جىلدارى جارىق كورگەن «اي», «كەنتاۆر», «تارپاڭ», «قاراتاۋ عازالدارى», «نۇرلى جول – ماڭگىلىك ەل» سەكىلدى جىر كىتاپتارى وقىرمانداردىڭ ىستىق ىقىلاسىنا بولەنگەن.
ءار سالادا جاۋاپتى قىزمەتتەردە بولعان مارالتاي رايىمبەك ۇلى قازاقستان جازۋشىلار وداعىندا ادەبيەتشىلەر ءۇيىنىڭ ديرەكتورى, 2007-2008 جىلدارى «كەنتاۆر» گازەتىنىڭ باس رەداكتورى, 2008-2012 جىلدارى «قازاقستان» تەلە-راديو كورپوراتسياسىندا رەداكتور-جۇرگىزۋشى جانە شولۋشى رەتىندە جۋرناليستيكادا دا ايشىقتى ءىزىن قالدىردى.
2012 جىلدان باستاپ قازاقستان جازۋشىلار وداعى باسقارما توراعاسىنىڭ ورىنباسارى قىزمەتىن اتقارعان. قازىر قر ۇلتتىق مەملەكەتتىك كىتاپ پالاتاسى ديرەكتورىنىڭ ورىنباسارى.
جاۋhار پوەزيادان سۋسىنداعىسى كەلەتىن جىرسۇيەر قاۋىم شولىركەپ قالىپتى. رەسپۋبليكا سارايىنا لىق تولعان كورەرمەن مارالتاي اقىنعا قوشەمەت كورسەتتى.
ايتا كەتەيىك, ۋنيۆەرسيتەتى جاس ۇرپاققا ءبىلىم بەرۋمەن قاتار ەسىمى ەلىمىزگە بەلگىلى تالانتتاردى قولداپ كەلەدى.
