باسقارما باسشىسىنىڭ ايتۋىنشا, ءوڭىر تۇرعىندارىنىڭ مەملەكەتتىك ءتىلدى مەڭگەرۋ دەڭگەيىن باعالاۋ ماقساتىندا جىل سايىن «قازتەست» جۇيەسى بويىنشا تەستىلەۋ ۇيىمداستىرىلادى. مەملەكەتتىك ءتىلدى كوپشىلىكتىڭ قولدانۋىنا قول جەتكىزۋ جانە ونى پايدالانۋ اياسىن كەڭەيتۋ بويىنشا جۇيەلى جۇمىس ءجۇرىپ جاتىر.
مىسالى, 2018 جىلى ءبورلى, زەلەنوۆ, تەرەكتى, تاسقالا اۋداندارى اكىمدىكتەرى, باتىس قازاقستان وبلىسىنىڭ قارجى باسقارماسى, باتىس قازاقستان وبلىسى توتەنشە جاعدايلار دەپارتامەنتى جانە «قازترانسگازايماق» اق باتىس قازاقستان وندىرىستىك فيليالى مەكەمەلەرىنە ءوز سالاسىندا مەملەكەتتىك ءتىلدىڭ قولدانىس دەڭگەيىن كوتەرۋ, ءتىل تۋرالى زاڭناما تالاپتارىنىڭ ساقتالۋىن باقىلاۋ جونىندە ۇسىنبالار بەرىلىپ, تۇزەتۋ شارالارى الىنعان.
تىلدەردى دامىتۋ باسقارماسى جىل سايىن وبلىس تۇرعىندارىنا مەملەكەتتىك ءتىلدى وقىتۋ كۋرستارىن ۇيىمداستىرىپ ءجۇر. كۋرسقا 2017 جىلى 670, 2018 جىلى 1005 تىڭداۋشى قامتىلىپ, سەرتيفيكاتقا يە بولعان. ال بيىل 1010 ادامدى قامتۋ جوسپارلانعان ەكەن.
باسقارمانىڭ الدىندا تۇرعان تاعى ءبىر مىندەت – لاتىن الىپبيىنە قاتىستى تۇسىنىك جۇمىستارى. «قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى» قازاقستان رەسپۋبليكاسى پرەزيدەنتىنىڭ 2018 جىلعى 19 اقپانداعى №637 جارلىعىن قولداۋ ماقساتىندا ءبىلىم بەرۋ سالاسىنىڭ قىزمەتكەرلەرىمەن, ەتنو-مادەني ورتالىق وكىلدەرىمەن, مەملەكەتتىك مەكەمە قىزمەتكەرلەرىمەن, قازاقستان حالقى اسسامبلەياسىنىڭ مۇشەلەرىمەن, ستۋدەنتتەرمەن, قالا جانە اۋدان تۇرعىندارىنىڭ قاتىسۋىمەن 200-دەن استام ءىس-شارا وتكىزىلگەن. بۇل جيىندارعا جالپى 134706 ادام قاتىسىپتى.
باسقارمادا «جەدەل جەلى» قىزمەتى جۇمىس ىستەيدى. «ازاماتتار كوشەدە, كوپشىلىك ورىنداردا سىرتقى كورنەكى اقپاراتتا كەتكەن گرامماتيكالىق, ستيليستيكالىق قاتەنى كورسە, اقپاراتتىڭ تەك تىلدە ورنالاستىرىلعانىن بايقاسا, سۋرەتكە ءتۇسىرىپ الىپ, بىزگە جىبەرۋىنە بولادى. ءبىز تەز ارادا تەكسەرىپ, شارا قولدانامىز» دەيدى باسقارما باسشىسى.
«قوعامدىق ءتىل ينسپەكتسياسى» شەڭبەرىندە 2018 جىلى باتىس قازاقستان وبلىسىندا 310 كاسىپكەرلىك نىسانىنا باسقارما ىشكى جانە سىرتقى كورنەكى اقپاراتىن رەتتەۋ بويىنشا ادىستەمەلىك كومەك كورسەتىپتى. «ماقساتىمىز – كاسىپكەردى جازالاۋ ەمەس, قاتەنى تۇزەتۋ, مەملەكەتتىك ءتىلدىڭ مارتەبەسىن بيىك ەتۋ, - دەيدى ايگۇل مىڭباەۆا.
