بۇدان سوڭ ا.ۇ.مامين وسى توپىراقتىڭ پەرزەنتى ەكەنىنە توقتالىپ, ول بۇعان دەيىن وزىنە تاپسىرىلعان جاۋاپتى جۇمىستاردىڭ ءبارىن دە ابىرويمەن ورىنداپ كەلگەنىن جەتكىزدى. سونىڭ ىشىندە وڭداسىن سەيىل ۇلىنىڭ الەۋمەتتىك سيپاتاعى ماسەلەلەردى وڭتايلى شەشە بىلۋدەگى قارىم-قابىلەتىن اتاپ ءوتىپ, جاڭا قىزمەتىنە ساتتىلىك تىلەدى.
اكتيۆ جينالىسىندا ب.م.ساپارباەۆ ءسوز الىپ, حالىقتى الەۋمەتتىك جاعىنان قورعاۋ سەكىلدى ەلىمىزدەگى اسا جاۋاپتى سالانى باسقارۋعا تاعايىنداعانى ءۇشىن مەملەكەت باسشىسى ن.ءا.نازارباەۆتىڭ سەنىمىن اقتايتىنىن جەتكىزدى. سونىمەن بىرگە ول بىرلەسە اتقارىلعان ناتيجەلى جۇمىستار ءۇشىن وبلىس اكتيۆىنە العىسىن ايتتى. بۇدان كەيىنگى كەزەكتە ءسوز سويلەگەن اقتوبە قالاسىنىڭ جاڭا اكىمى وڭداسىن ورازالين اتا-بابانىڭ كىندىك قانى تامعان جەردە قىزمەت اتقارۋ بىرىنشىدەن بيىك مارتەبە بولسا, ەكىنشىدەن ۇلكەن جاۋاپكەرشىلىك ەكەنىنە ەكپىن ءتۇسىردى. وسى ورايدا ءوڭىردىڭ جاڭا باسشىسى بۇعان دەيىنگى جيناقتاعان تاجىريبەسىن اقتوبە ايماعىنىڭ ودان ءارى ءوسىپ-وركەندەۋىنە جۇمسايتىنىنا, وڭىردە بۇعان دەيىن جۇرگىزىلگەن جاقسى ىستەر ودان ءارى جالعاسا بەرەتىنىنە توقتالدى.
اكتيۆتە وبلىستىق ارداگەرلەر كەڭەسىنىڭ توراعاسى كەڭەس ءبىرمانوۆ ب.م.ساپارباەۆ وبلىس اكىمى بولىپ قىزمەت اتقارعان 3,5 جىلدا وڭىردە ايشىقتى ءىزىن قالدىرا بىلگەنىن ايتتى. ونىڭ قاراپايىمدىلىعى, كىسىلىگى مەن كىشىلىگى جونىندە اقساقالدىق تىلەگىن ارنادى. سودان كەيىن و.س.ءورازاليننىڭ الدىندا تۇرعان ىستەر دە مول ەكەنىن ايتىپ, وعان ءسات-ساپار تىلەدى. قازاقستاننىڭ ەڭبەك ەرى قۇرالاي بايمەنوۆا قويان-قولتىق بىرلەسە اتقارىلعان ۇلان-عايىر جۇمىستار ءۇشىن ب.م.ساپارباەۆقا ريزاشىلىعىن جەتكىزىپ, ونىڭ بۇعان دەيىن جيناقتاعان باي تاجىريبەسى جاڭا قىزمەتىنە دە وڭ ىقپالىن تيگىزەتىنىن اتاپ ءوتتى. سونىمەن بىرگە قۇرالاي بايمەنقىزى وبلىستىڭ جاڭا باسشىسى و.س.ورازالين ءوڭىر ءۇشىن بوتەن ادام ەمەس ەكەنىن ايتىپ, ءوز ويىن جاڭا جوبالاردى جۇزەگە اسىرۋدا اۋىزبىرشىلىگىمىز بەن ىنتىماعىمىز نىعايا بەرسىن دەپ تۇيىندەدى. وسىنداي باعىتتاعى لەبىز بەن وي-تۇجىرىم وڭىردەگى «سترويدەتال» جشس-ءنىڭ ديرەكتورى ا.س.سيمونوۆتىڭ تاراپىنان دا ءبىلدىرىلدى.
اكتيۆ جينالىستى پرەمەر-مينيستر اسقار مامين قورىتىندىلاپ, وبلىستىڭ جاڭا باسشىسى مەن ايماق اكتيۆى ورتاق ءىستى بىرلەسىپ جۇزەگە اسىرا بىلدىرە بەرەتىنىنە سەنىم ءبىلدىردى.
تەمىر قۇسايىن,
«Egemen Qazaqstan»
اقتوبە
