بۇگىن ورال قالاسىندا «قازحول» جشس قۇرىلىس كومپانياسى جەتى بالالى وتباسىنا اۋماعى 90 شارشىمەترلىك سۋ جاڭا پاتەر كىلتىن سىيعا تارتىپ, ساۋاپتى ءىس جاسادى. قايىرىمدىلىق شاراسى وڭىردە قولعا الىنعان «مەيىرىمدى كوكتەم» اكتسياسى اياسىندا ءوتىپ وتىر.
مانار بۇركىتوۆا – «التىن القا» يەگەرى. سۋ جاڭا پاتەرگە وڭ اياعىمەن اتتاپ كىرىپ, تاتتىدەن شاشۋ شاشقان انانىڭ ءجۇزى قۋانىشتان بال-بۇل جانىپ تۇر.
- بۇگىنگى سەزىمدى سوزبەن ايتىپ جەتكىزۋ مۇمكىن ەمەس. ءبىزدى, بالالارىمدى وسىلاي قۋانتقان قايىرىمدى ازامات - «قازحول» كومپانياسىنىڭ قۇرىلتايشىسى تيمۋر امينگە, ورال قالاسى مەن باتىس قازاقستان وبلىسى باسشىلارىنا العىسىم شەكسىز. ۇمىتپاڭىزدار, ءبىزدىڭ ءۇيدىڭ 9 جانى – بارشامىز سىزدەردىڭ اماندىعىڭىز ءۇشىن, ەلىمىزدىڭ ارقاشان دۇعا قىلىپ, تىلەۋىڭىزدى تىلەپ جۇرەدى, - دەيدى مانار كەڭەسقىزى.
بۇركىتوۆتەر وتباسىنىڭ تۇڭعىشى ءبيبىحابيبا تۋعالى بەرى بۇيرەك سىرقاتىنا شالدىعىپ, ارنايى ەسەپتە تۇرادى. ۇنەمى بىلىكتى دارىگەرلىك باقىلاۋدى قاجەت ەتكەندىكتەن ولار تەرەكتى اۋدانى اڭقاتى اۋىلىنداعى ءۇيىن تاستاپ, وبلىس ورتالىعىنا كوشىپ كەلۋگە ءماجبۇر بولعان. تۇراقتى تىركەۋدىڭ جوقتىعىنان پاتەر كەزەگىنە دە كەش تۇرىپتى. 2015 جىلى 15 تامىزدا پاتەرگە مۇقتاج وتباسىلاردىڭ كەزەگىنە №6087 بولىپ تىركەلگەن بۇركىتوۆتەر كەزەگى بۇگىندە №4894 بولعان.
- ورال قالاسىندا ءبىز پاتەر جالداماعان اۋدان قالماعان شىعار. بالالارىمىز دا مەكتەپتەن مەكتەپكە اۋىسىپ, شارشادى. پاتەرىن جالعا بەرۋشىلەر بالاسى كوپ وتباسىن ۇناتپايدى عوي. وسى كەزگە دەيىن ءبىزدىڭ باسىمىزدان تالاي جاعداي ءوتتى. بىراق «بەينەت سوڭى زەينەت» دەگەن راس ەكەن. قۇدايعا شۇكىر, بالالاردىڭ ءبارىنىڭ دە ساباعى جاقسى. ۇلدارىم سپورتپەن اينالىسادى. قىزدارىم تىگىن تىگەدى, توقىما توقيدى, تاماق پىسىرەدى. ەندى بولاشاعىمىز بۇدان دا جارقىن بولادى دەپ سەنەمىن, - دەيدى باقىتتى انا.
مانار بۇركىتوۆا – فيزيكا-ماتەماتيكا ءپانىنىڭ مۇعالىمى, قازاق ۇلتتىق ۋنيۆەرسيتەتىن بىتىرگەن جوعارى ءبىلىمدى مامان ەكەن. بىراق قازىر وتباسى جاعدايىنا بايلانىستى ءۇي شارۋاسىندا. وتاعاسى ەرجان دا اۋىل شارۋاشىلىعى سالاسى بويىنشا جوعارى ءبىلىم العان. الايدا ماناردىڭ ايتۋىنشا, ماماندىق بويىنشا تۇراقتى جۇمىس ىستەپ, كوپ بالالى وتباسىن اسىراۋ مۇمكىن ەمەس. ءتىپتى وتباسى ءۇشىن ەڭ قۋانىشتى ءسات – پاتەر كىلتىن العان كەزدە دە وتاعاسى وتباسىمەن بولا الماپتى.
- پاتەر كىلتىن تۇستەن كەيىن بەرەدى دەگەن سوڭ قالاعا جاقىن اۋىلعا شىعىپ كەتىپ ەدى. ۇلگەرمەي قالدى, - دەيدى جۇبايى.
ايتا كەتەيىك, ورال قالاسىنىڭ ناق ورتاسىنداعى 10 قاباتتى بۇل ءۇي وسىدان ءبىر اپتا بۇرىن عانا پايدالانۋعا بەرىلگەن سۋ جاڭا عيمارات. بۇرىن بۇل جەردە اپاتتى ءۇي بولعان. مەملەكەت-جەكەشەلىك ارىپتەستىگى باعدارلاماسى اياسىندا «قازحول» جشس بۇل ورىنعا جاڭا ءۇيدىڭ قۇرىلىسىن 1,5 جىل بۇرىن سالىپ باستاعان ەدى.
- كومپانيامىز 2006 جىلدان بەرى ورال قالاسىندا 50-دەن اسا كوپقاباتتى ءۇي سالىپ, پايدالانۋعا بەردى. قۇرمانعازى كوشەسىندەگى وسى ءۇيدى دە ءبىر اپتا بۇرىن عانا تاپسىردىق. سول كەزدە ورال قالاسى اكىمدىگىندە اسا پاتەرگە مۇقتاج بولىپ جۇرگەن وسى وتباسى تۋرالى ەسىتىپ, كومپانيا اتىنان ءۇش بولمەلى پاتەردى سىيعا بەرۋگە شەشىم قابىلدادىق. بۇل پاتەر ءۇش بولمەلى, اۋماعى 90 شارشىمەتر, بارلىق جاعدايى جاسالعان. قازىر قۇجاتتارىن تىركەۋ ۇستىندەمىز, تولىعىمەن بۇركىتوۆتەر وتباسىنا جەكەمەنشىككە بەرىلەدى, - دەيدى كومپانيا مەردىگەرى تيمۋر ساعيتجان ۇلى.
قازبەك قۇتتىمۇرات ۇلى,
«Egemen Qazaqstan»
باتىس قازاقستان
سۋرەتتى تۇسىرگەن تيمۋر توقمامبەتوۆ
