بۇگىنگى تاڭدا ەرلى-زايىپتىلاردىڭ اراسىندا ءتۇرلى ماسەلەلەر تۋىنداپ, ونىڭ سوڭى وتباسىلىق شىرعالاڭعا ۇلاسىپ جاتادى. مۇنداي جاعداي, اسىرەسە جاستاردىڭ اراسىندا كوپ كەزدەسەدى. ورىنسىز قىزعانىش, بەيمالىم كۇدىك تە ەرلى-زايىپتىلاردىڭ اراسىنا وت جاعىپ, اقىرىندا وپىق جەگىزەتىنى شىن. ەلەن ءالىمجان «ايەلدەر ءبىر ءىس باستادى» دراماسىندا وسىنداي ارەكەتتەردى اشكەرەلەپ, كورەرمەندى كۇلدىرە وتىرىپ ويلانۋعا جەتەلەۋدى ماقسات ەتكەن. شىعارمادا كۇيەۋلەرىن ءبىر-بىرىنە ءوزارا جامانداپ, ولاردان كۇدىكتەنىپ, اقىرى ونى تۇزاققا ءتۇسىرۋدى كوكسەگەن ايەلدەردىڭ بەينەسى دە اشىق بەرىلگەن. جالپى, بايلىقتىڭ بۋىنا ماستانۋ, سول ارقىلى جاۋاپكەرشىلىك سەزىنبەستەن ويناپ-كۇلۋدى ماقسات ەتكەن كەيبىر قوعامداعى ەركەكتەردىڭ دە ءپروتوتيپى وسى درامادا بار.
«ارينە «ايەلدەر ءبىر ءىس باستادى» كومەدياسى – ول مەنىڭ شىندىقتى بەرۋ ءتاسىلىم. وتباسىنداعى, قوعامداعى شىندىقتى حالىقتى كۇلدىرە وتىرىپ جەتكىزىپ, سودان سوڭ ويلاندىرۋ. بۇل شىعارمانى وسىنداي ماقساتپەن جازدىم», دەيدى دراماتۋرگ ەلەن ءالىمجان.
ءبىر قاراعاندا, قويىلىم كوڭىلدى كورىنىستەرگە قۇرىلعان. ءوزارا كوڭىل كوتەرىپ وتىرعان ەڭلىكگۇل, گۇلبيبى جانە اياجان دەگەن ءۇش كەلىنشەك ەر-ازاماتتارىنىڭ ادالدىعىنا كوز جەتكىزبەك بولىپ, ءتۇرلى قۋلىقتارعا بارادى. بىراق وسى ءبىر كورىنىستىڭ ءوزى بۇگىنگى قوعامدا, ءاربىر وتباسىندا كەزدەسىپ جاتاتىنى بەلگىلى. ال ساحناداعى ءۇش كەلىنشەكتىڭ بەينەسىن سومداعان گاۋھار سۇلتانبەكوۆا, ينديرا مۇستافاەۆا جانە نازىم اقىلوۆا وزدەرىنە تيەسىلى ءرولدى لايىقتى مەڭگەرگەنىن كورسەتسە, جاسۇلان قامباتىروۆ ءوزى سومداعان بەينەسى ارقىلى ءاربىر ازاماتتىڭ ءوز وتباسىنا ءتيىستى كوڭىل ءبولۋى كەرەكتىگىن ۇعىندىرادى. بۇل تۇرعىدا وبلىستىق قازاق دراما تەاترىنىڭ شىعارماشىلىق ۇجىمى وسى قويىلىم ارقىلى ومىردەگى وتباسى قۇندىلىعىن العا شىعارعان. كومەديانىڭ قويۋشى-رەجيسسەرى – قازاقستاننىڭ ەڭبەك سىڭىرگەن قايراتكەرى نۇرلان جۇمانيازوۆ, ال قويۋشى-سۋرەتشىسى ايگەرىم رامازان.
حاميت ەسامان,
«Egemen Qazaqstan»
جامبىل وبلىسى
