وسى ماسەلەنى رەتتەۋ ءۇشىن وڭىردە ارنايى جۇمىلدىرۋشى توپتار قۇرىلدى. ونىڭ مۇشەلەرى تۇرمىسى تومەن, تابىسى از, تۇراقتى باسپانا ماسەلەسى شەشىمىن تاپپاعان وتباسىلاردىڭ ۇيلەرىنە بارىپ, جاي-كۇيلەرىمەن تانىسۋدى تۇراقتى ىسكە اينالدىرىپ كەلەدى. ونىڭ قۇرامىندا قوعام قايراتكەرلەرى, ءماسليحات دەپۋتاتتارى, كاسىپكەرلەر, قوعامدىق قورلار مەن مەملەكەتتىك ورگانداردىڭ وكىلدەرى بار.
سونداي-اق بۇل قۇرامعا ايماقتاعى ابىرويى جوعارى, ومىردەن كورگەنى مەن تۇيگەنى مول زەينەت جاسىنداعى ادامدار دا ەندى. سولاردىڭ ءبىرى, پروكۋراتۋرا ورگاندارىنىڭ ارداگەرى ءماريا تاجىباەۆا مۇقتاج جاندارعا كومەك كورسەتۋ ءىسىنىڭ بەل ورتاسىندا ءجۇر. «مەن زەينەتتەمىن. ايتسە دە توپ قۇرامىندا ەل-جۇرتقا قولىمنان كەلگەن كومەگىمدى تيگىزۋدى قاجەت دەپ تاپتىم. سوندا بايقاعانىم, بىرقاتار وتباسىلار مەن مۇقتاج جاندار وزدەرىنىڭ زاڭدى قۇقىقتارىن بىلە بەرمەيدى. ولارعا وسى تۇرعىدان زاڭدىق كەڭەس بەرۋدى پارىزىم دەپ سانايمىن. تۇتاستاي العاندا قاراپايىم تۇرعىندار جەرگىلىكتى بيلىكتىڭ وزدەرىن ەلەۋسىز قالدىرماعانى ءۇشىن ريزاشىلىقتارىن بىلدىرۋدە» دەيدى ول.
– جۇمىلدىرۋشى جۇمىس توپتارى تۇرمىس دەڭگەيلەرى تومەن وتباسىلاردىڭ جاي-كۇيىمەن تانىسقاننان كەيىن ءتيىستى شەشىم قابىلدايدى. قاجەت جاعدايدا ولارعا ءارتۇرلى ماتەريالدىق كومەك بەرۋ شارالارىن ۇيىمداستىرادى. بۇل ماسەلە جۇمىلدىرۋشى توپتار مۇشەلەرىنىڭ قاتىسۋىمەن قالالىق اكىمدىك جانىندا تۇرمىسى تومەن وتباسىلارعا كومەك كورسەتۋ جونىندە قۇرىلعان شتابتىڭ ماجىلىسىندە تالقىلانىپ, تۇبەگەيلى شەشىمىن تابادى, − دەدى اقتوبە قالاسىنىڭ اكىمى ءىلياس يسپانوۆ.
وڭىردە دەربەس باسپاناسى جوق, پاتەر جالداپ تۇراتىن كوپ بالالى انالارعا بيزنەس وكىلدەرى مەن كاسىپكەرلەر كومەك كورسەتۋدە. مىسالى, تاياۋدا «اقتوبەسترويەكسپەرت» جشس-نىڭ ديرەكتورى جاستالاپ جانبەۋوۆ قۇرقىلتايدىڭ ۇياسىنداي تار, ۋاقىتشا باسپانادا تۇراتىن سەگىز بالانىڭ اناسى, «التىن القا» يەگەرى سالتانات سادۋوۆاعا پاتەر ساتىپ الىپ بەردى. بۇل ءۇشىن ول «قولقانات اقتوبە» قوعامدىق قورىنا قاجەتتى قاراجاتتى اۋداردى. وسى ارادا كوپ بالالى انانىڭ ەرى, ەكىنشى توپتاعى مۇگەدەك ءارى ەكى پەرزەنتى ارنايى مەكتەپتە وقيتىن مۇگەدەك بالالار ەكەنىن دە ايتا كەتكەن ءجون.
سونداي-اق اقتوبە قالاسىندا جالدامالى پاتەردە تۇراتىن التى بالانىڭ اناسى گالينا نوۆيكوۆاعا جەر تەلىمىنىڭ سەرتيفيكاتى بەرىلدى. ەندىگى كەزەكتە اقتوبەنىڭ اتىمتاي جومارتتارىنىڭ ءبىرى, جەكە كاسىپكەر ايبەك امىرباەۆ بەرىلگەن جەر تەلىمىنە وعان ءۇي سالىپ بەرۋدى كوزدەپ وتىر. ايماقتا تۇرمىسى تومەن كوپ بالالى وتباسىلارعا الەۋمەتتىك كومەك كورسەتۋ ءىسىنىڭ وزگە دە مىسالدارى جەتكىلىكتى. جۇمىلدىرۋشى توپتار مەن اقتوبە قالالىق اكىمدىگى جانىنان قۇرىلعان شتاب مۇشەلەرى العا قويعان ماقساتتارىن ىسكە اسىرۋ ءۇشىن ناقتى مەكەن-جايلارعا بارىپ, قاراپايىم تۇرعىنداردىڭ وتىنىشتەرىنە قۇلاق ءتۇرىپ ءجۇر.
تەمىر قۇسايىن,
«Egemen Qazaqstan»
اقتوبە
