– ناريمان, بىلتىر الەم چەمپيوناتىندا ۇزدىك بەستىككە ەندىڭىز. بۇعان دەيىنگى بىرىنشىلىكتە 54-ورىنعا تۇراقتاساڭىز, بۇل جولى جۇلدەگە ءسال عانا جەتپەي قالدى. ءتىپتى العاشقى ناتيجەلەر بويىنشا كوش باسىندا دا تۇردىڭىز. چەمپيونات ءسىز ءۇشىن قانشالىقتى ءساتتى ءوتتى؟
– راس, بۇعان دەيىنگى بىرىنشىلىكپەن سالىستىرعاندا العاشقى بەس سپورتشىنىڭ قاتارىنا ەنۋىم مەن ءۇشىن جاقسى كورسەتكىش. بۇل تىنىمسىز ەڭبەكتىڭ ارقاسى دەپ بىلەمىن. سويتە تۇرا دوحادا وتكەن الەم چەمپيوناتىندا ۇزدىك ۇشتىككە ەنۋگە جاقسى مۇمكىندىگىم بولدى. ەستەرىڭىزدە بولسا, تاۋەلسىز قازاقستاننىڭ تاريحىندا 1997 جىلى شۆەيتساريانىڭ لوزاننا قالاسىندا سەرگەي فەدورەنكو التىن مەدال يەلەنگەن ەدى. سودان بەرى بۇل سپورتتا ەسەمىز كەتىپ ءجۇر. سوندىقتان وسى ءبىر ولقىلىقتىڭ ورنىن تولتىرسام دەگەن ارمانىم ورىندالماي قالعانىنا ازداپ كوڭىل كۇيىم ءتۇستى.
– وسىناۋ ءبىر ساتتە اكەڭىز جەكە باپكەر رەتىندە سىزگە نە ايتتى؟
– ەلىمىزدە بارلىعى الدىمەن اكەمدى وسى ناتيجەمەن قۇتتىقتادى. سەبەبى بەسىنشى ورىن قازاقستاننىڭ دا سپورتتىق گيمناستيكادا الار ۇلەسىنىڭ بارىن ايقىندايدى. مەنى دە قۇتتىقتاپ جاتتى. جالپى, اكەمنىڭ بۇل ناتيجەگە كوڭىلى تولدى. ول مەنىڭ قولىمنان كەلگەننىڭ ءبارىن جاساعانىمدى كوردى.
– ءسىز وسى الەم بىرىنشىلىگى الدىندا باستى قارسىلاس رەتىندە وليمپيادا چەمپيونى, كەيىننەن دوحادا كۇمىسكە قول جەتكىزگەن بريتاندىق ماكس ۋيتلوكتى اتادىڭىز. بىراق مامانداردىڭ كوپشىلىگى ونىڭ قيمىلىنا ءمىن تاعىپ جاتادى. ءسىزدىڭ ويىڭىزشا, ونىڭ باسىم تۇسى قايسى؟
– قازىر سپورتتىق گيمناستيكا ەرەجەلەرىنە وزگەرىستەر ەنگىزىلۋدە. باستى نازاردى كومبيناتسيانىڭ قيىندىعىنا ەمەس, تازالىعىنا اۋداراتىن بولىپ ءجۇر. بۇل تۇرعىدا بريتاندىقتىڭ قيمىلدارى ءمىنسىز دەي المايسىڭ. دەنەنى تىك ۇستايتىن ساتتەردە ول بۇگىلىپ قالۋى مۇمكىن. تورەشىلەر دە, باپكەرلەر دە مەنىڭ تىك تۇرۋىما جوعارى باعا بەرەدى. سوندىقتان ۋيتلوك تاڭداعان ەلەمەنتتەر ەڭ قيىن سانالعانىمەن, جاڭا ەرەجەلەر بويىنشا ماڭىزدى جارىستاردا جەڭىسكە جەتۋ قيىنداي تۇسەدى دەپ ويلايمىن.
– وزگە كوماندالاس ارىپتەستەرىڭىزدىڭ ونەرىنە توقتالساق. جىگىتتەر العاشقى جيىرمالىققا ءىلىنىپ, ەندى كەلەسى جىلى وليمپيا ويىندارىنا جولداما ساراپقا سالىناتىن بىرىنشىلىككە قاتىسادى...
– باستاپقىدا بىزگە العاشقى 24 كوماندانىڭ قاتارىنا ەنۋ تۋرالى تاپسىرما بەرىلدى. ۇلكەن جاۋاپكەرشىلىك جۇكتەلگەندىكتەن ءبىراز قوبالجىپ, ءتيىستى ناتيجە كورسەتە الماي قالامىز با دەپ ۋايىمدادىق. بىراق ۋاقتىلى بويىمىزدى جيىپ, توپ-16 كوماندانىڭ قاتارىنان تابىلدىق. ەندى الداعى الەم چەمپيوناتىندا العاشقى 12 كوماندانىڭ قاتارىنا قوسىلىپ, وليمپيا ويىندارىنا جولداما يەلەنۋ جايلى ماقسات قويدىق.
– ءسىز ادەتتە وزىڭىزگە ىڭعايلى ەلەمەنتتەردى قالاي تاڭدايسىز؟
– گيمناستيكادا بار بارلىق ەلەمەنتتەردىڭ جيىنتىعىن ابدەن زەرتتەپ شىعامىن. بۇرىن بارلىعىن قاتار تەكسەرىپ كورە بەرەتىنمىن. ناتيجەسىندە, قايسىسى قولايلى, قايسىسى اۋىر – سولاردى وزىمشە انىقتايتىنمىن. وسى ارقىلى سيرەك كەزدەسەتىن ەلەمەنتتەردىڭ قوسىندىسىن جاساپ الدىم. بۇگىندە مەن جاسايتىن كومبيناتسيا گيمناسشىلاردىڭ اراسىندا ەڭ كۇردەلىسى سانالادى. كۇندەلىكتى جاتتىعۋلاردىڭ ارقاسىندا ءاربىر ەلەمەنتتى اسا ءبىر قيىندىقسىز جاسايتىن دەڭگەيگە جەتتىم. ءار سپورتشى ەلەمەنت تاڭداۋدا ءوزىنىڭ دەنە ءبىتىمىن ەسكەرەدى, سول سەكىلدى مەن دە بويىمنىڭ, قولدارىمنىڭ ۇزىندىعىن ءتيىمدى پايدالانىپ, وزىمە قولايلى ەلەمەنتتەردىڭ باسىن بىرىكتىردىم.
– ءسىزدىڭ جەكە The Kurbanov دەپ اتالاتىن ەلەمەنتىڭىز بارىن وقىرماندار ەستىپ تە جۇرگەن بولار. ارىپتەستەرىڭىزدىڭ اراسىندا سول ەلەمەنتتى قايتالاعاندارى بار ما جانە ولار قانشالىقتى ءسىزدىڭ كوڭىلىڭىزدەن شىقتى؟
– رەسەي جانە باسقا ەلدەردەن دوستارىم, تانىستارىم سول جاتتىعۋدى جاساعاندارىن ۆيدەوعا ءتۇسىرىپ جىبەرىپ جاتادى. بىراق ونىڭ ءبارى تەك جاتتىعۋ كەزىندە جاسالعان. وكىنىشكە قاراي, تازالىق جاعى ءالى اقساپ تۇرعانىن بايقايمىن. رەسمي جارىستاردا ازىرگە ەشكىم قايتالاعان جوق.
– قاتەلەسپەسەم, تاۋەلسىز قازاقستان تاريحىندا ءوز اتىندا ەلەمەنتى بار العاشقى گيمناسشىسىز. ماقتانارلىق جاعداي. جاڭا ەلەمەنتتى ويلاپ تابۋ قيىن بولدى ما؟
– ماعان دەيىن تاعى ءبىر وتانداسىمىز وسىنداي قۇرمەتكە يە بولعان. بىراق ول كەڭەس مەكتەبىنىڭ تۇلەگى. بىردە اتتىڭ جانىندا ەلەمەنتتەر جايلى ويلاپ تۇرعام. سوندا ات ارقىلى ەكى قولمەن العا ءجۇرۋ دەگەن ەلەمەنت بار, نەگە سونى كەرىسىنشە قايتالاماسقا دەگەن ويعا كەلدىم. ءبىر قىزىعى, بۇعان دەيىن مۇنى ەشكىم جاساپ كورمەپتى. سونان سوڭ حالىقارالىق گيمناستيكا فەدەراتسياسى بۇل جاڭاشىلدىقتى قولداپ, رەسمي جارىستارداعى ەلەمەنتتەر تىزىمىنە قوستى. ارينە, قۋانىشتى جاعداي. ويتكەنى ەرەجەدە The Kurbanov دەگەن ەلەمەنت تۇرادى.
– قۇرداستارىڭىز كوڭىل كوتەرىپ, قىزىق قۋىپ ءجۇر- گەندە, جاس بولساڭىز دا الدىڭىزعا ناقتى ماقسات قويىپ, سوعان قاراي نىق قادام جاسايتىنىڭىز قۋانتارلىق جايت. دەگەنمەن بۇل رەجىمنەن دە جالىعاتىن كەزدەر دە بولاتىن شىعار؟
– تاڭنان قارا كەشكە دەيىن جاتتىعۋ جاساپ, ۇيگە شارشاپ كەلەسىڭ دە, تەك جاقسىلاپ تىنىعۋدى ويلايسىڭ. كۇن ءتارتىبىم ەسىمدى بىلگەلى وسىنداي.
مەنى سپورتقا اكەم اكەلدى. ءوزى دە گيمناستيكامەن شۇعىلدانعان. سوندىقتان مەندە گيمناستيكادان باسقا تاڭداۋ بولعان جوق. بالا كۇنىمدە تەك كۇندەلىكتى جاتتىعۋعا كەلىپ-كەتىپ جۇرسەم, 16 جاسىمنان كەيىن ناتيجەگە جەتۋ كەرەكتىگىن ءتۇسىندىم. سودان بەرى كاسىبي تۇردە دەن قويا باستادىم.
– ال اكەمەن جۇمىس ىستەگەن قانشالىقتى وڭاي؟
– قيىنداۋ. سەبەبى, ۇيدە دە, جاتتىعۋ زالىندا دا, كولىكتە دە تەك گيمناستيكا تۋرالى اڭگىمەلەسەمىز. بۇرىن ءاربىر قاتەلىگىم ءۇشىن ۇرىس ەستيتىنمىن. قازىر كوپ ارالاسا بەرمەيدى. ويتكەنى كىشكەنتاي بالا ەمەس, سپورتشى رەتىندە قارايدى. كورسەتكىشتەرىم ءۇشىن از-ماز ءسوز ەستىپ قالامىن, بىراق بۇرىنعىداي ەمەس.
– ءسىز ءۇشىن وتكەن جىل نەسىمەن ەرەكشەلەندى؟ جوسپارىڭىزدى تولىقتاي جۇزەگە اسىرا الدىڭىز با؟
– ءبىر جاعىنان, بىلتىر مەن ءۇشىن وتە ءساتتى جىل بولدى دەپ ايتا الامىن. الەم كۋبوگى كەزەڭىندەگى جەڭىس, الەم چەمپيوناتىنىڭ فينالى – مەن ءۇشىن ۇلكەن جەتىستىك. بىراق مۇنىڭ ءبارى بىلتىرعى جىلدىڭ كورسەتكىشتەرى, بيىلعى جىلعا تاعى جوسپارلار مەن ماقساتتار بار. الداعى جارىستارعا دەيىن جاتتىعۋ جاساپ, كەم-كەتىكتى تۇزەيمىز.
– اڭگىمەڭىزگە كوپ راحمەت. ساتتىلىك تىلەيمىز!
اڭگىمەلەسكەن ءمادينا اسىلبەك,
جۋرناليست
