ءاربىر ادام ءوز ماماندىعىنا, جالپى ءوزى قىزىعاتىن تاقىرىبىنا وراي, تالعامى مەن قابىلەتىنە قاراي تولاسسىز جارىق كورىپ جاتقان قىرۋار ونىمدەر تىزبەگىنەن قاجەتتى كىتاپتارىن تاڭداي ءبىلۋىنىڭ ءوزى دە – ونەر. مۇمكىندىگىنشە كىتاپتى تالعاممەن ءارى كوپ وقۋ پارىز, ارينە. بىراق قازىرگى قوعامداعى پىكىر جاستاردىڭ كىتاپ وقىماۋىنا بىرىنشىدەن, الەۋمەتتىك جەلىلەر كەدەرگىسىن كەلتىرۋدە دەسە, ەكىنشىدەن, قازىر ساپالى شىعارمانىڭ از ەكەندىگىن العا تارتادى.
جولىمىز ءتۇسىپ كىتاپحاناعا بارعاندا جاستاردىڭ كوبى وقۋ زالىنداعى كىتاپتاردان قاجەتتى ماعلۇماتتارىن كوشىرىپ الىپ, جوندەرىنە جۇرە بەرەتىنىن بايقايمىز. كوشەدەن كىتاپ قۇشاقتاپ جۇرگەن جاستاردى دا كەزدەستىرۋ قيىن. وعان قوسا بۇگىن كىتاپتاردى ينتەرنەت جەلىسىنە ەنگىزۋ دە زامان تالابىنا ساي قۇبىلىس بولىپ وتىر. قازىرگى كەزدە نەبىر كىتاپتاردىڭ عالامتورداعى نۇسقالارى دا بار. بىراق مۇقاباسىن قولىڭمەن ۇستاپ, پاراقتاپ ەركىن وقي بەرەتىن كىتاپتان ارتىق ەشنارسەنىڭ جوقتىعىن اشىق مويىنداۋىمىز كەرەك. قانشا دەگەنمەن, بۇگىندە ۋاقىتى وتە تىعىز حالىق ءۇشىن ينتەرنەت جەلىسى وڭاي بولىپ تۇر. الايدا وقۋعا نيەتتەنگەن ادام وزىنە قاجەتتى كىتاپتى دۇنيەنىڭ قاي بۇرىشىنان, قانداي باعاعا بولسىن تاۋىپ الادى.
بىراق كىتاپقۇمار ادامنىڭ ميلليونەر بولۋى دا مۇمكىن ەكەن. جاستاردى كىتاپ وقۋعا ىنتالاندىرۋ ماقساتىندا تاراز قالالىق «جامبىل-تاراز» گازەتى جىل باسىندا جالپى جۇلدە قورى 3 ميلليون تەڭگە بولاتىن كىتاپ وقۋ بايقاۋىن جاريالادى. ءيا, بۇل باستاما دا جاستاردى كىتاپ وقۋعا باۋليتىن جاقسى امالدىڭ ءبىرى. ارنايى اقىلداستار القاسى قۇرىلىپ, القا توراعاسى بولىپ جازۋشى, قازاقستاننىڭ ەڭبەك سىڭىرگەن قايراتكەرى نەسىپبەك ءداۋتاي ۇلى بەكىتىلدى. «اقىلداستار القاسى بىرلەسىپ وتىرىپ, 100 كىتاپتان تۇراتىن ءتىزىم جاسادىق. ونىڭ تەڭ جارتىسى قازاق, قالعانى ورىس تىلىندە ۇسىنىلادى. ال بايقاۋعا قاتىسۋشى 5-7 سىنىپ وقۋشىلارى كەمىندە 15, 8-11 سىنىپ وقۋشىلارى 20 كىتاپتى وقۋ جىلىنىڭ سوڭىنا دەيىن وقىپ شىعۋى ءتيىس. بۇل مەجەدەن اسقان ادام بايقاۋ جەڭىمپازى اتانىپ, ميلليون تەڭگە يەلەنەدى. جەڭىمپاز وقىلعان كىتاپتار بويىنشا سۇراق قويۋ ادىسىمەن انىقتالادى», دەيدى گازەتتىڭ باس رەداكتورى ەلميرا مىرزا-عالي.
ارينە اۋليەاتا وڭىرىندە مۇنداي مازمۇندى باستامانىڭ كوتەرىلگەنى قۇپتارلىق. ناتيجەسىندە تاراز ولكەسىندە مەكتەپ وقۋشىلارى اراسىندا كىتاپقۇمارلار ورتاسى قالىپتاسىپ كەلەدى. ماسەلەن, تاراز قالاسىنداعى باۋىرجان مومىش ۇلى اتىنداعى №45 گيمنازيانىڭ 9-سىنىپ وقۋشىسى قازىنا ابدىسەيىت تولەن ابدىكتىڭ «وڭ قول» شىعارماسىنىڭ اسەرىمەن ءبولىستى. وقۋشى المانىڭ تاعدىرى ءوزىن قاتتى ويلانتقانىن ايتادى. «جالپى, ءبىر ءتاننىڭ ىشىندە ەكى جاننىڭ قاتار ءومىر ءسۇرۋىن العاش ەستۋىم. وقىعان قىزىقتى اڭگىمەلەرىمنىڭ ىشىنە «وڭ قول» شىعارماسىن دا جاتقىزا الامىن», دەيدى ول. سونىمەن قاتار №46 ورتا مەكتەپتىڭ 10-سىنىپ وقۋشىسى نۇرلىباعىم قۇدايبەرگەن ۋيليام شەكسپيردىڭ «رومەو مەن دجۋلەتتا» كىتابىن الەمدەگى ەڭ ادەمى ماحاببات حيكاياسىنا جاتقىزادى. «مەنىڭ ويىمشا, رومەونىڭ تاعدىرىنا كاپۋلەتتي اۋلەتىنىڭ قىزدارىنا عاشىق بولۋ جازىلعان سەكىلدى. نەگە دەسەڭىز, رومەو دجۋلەتتاعا عاشىق بولماس بۇرىن روزالينا اتتى قىزعا عاشىق بولادى. الايدا بۇل ماحاببات تەك ويدا عانا بولادى. ال دجۋلەتتانىڭ ورنى مۇلدە بولەك», دەيدى اتالعان بايقاۋعا قاتىسۋشى نۇرلىباعىم.
بۇگىندە ەلىمىزدە ادەبيەتتى دامىتۋ باعىتىندا ۇيىمداستىرىلىپ جاتقان شارالار كوپ. بىراق كىتاپ وقۋ ءۇشىن قىرۋار قاراجات تىگىپ, جاستاردى كىتاپتىڭ قاسيەتىنە باۋلۋ دا ءبىر عانيبەت. ناتيجەسىندە وقۋشىلاردىڭ كىتاپقا دەگەن قىزىعۋشىلىعى ارتىپ, جاستار اراسىندا وقىرماندار ورتاسى قالىپتاسادى. بۇل دا بۇگىنگىدەي كىتاپ وقىلمايدى دەگەن ۋاقىتتا جاستارعا كىتاپ وقىتۋدىڭ تاپتىرماس ءادىسى.
حاميت ەسامان,
«Egemen Qazaqstan»
جامبىل وبلىسى
