سول كەزدە «اراي» توبىنىڭ قۇرامىندا بولعان باتىرحان شۇكەنوۆ روزا رىمباەۆا, بولات سىزدىقوۆ, بايعالي سەركەباەۆ, نادجيب ۆيلدانوۆ باستاعان ءبىر توپ قازاقستاندىق انشىمەن بىرگە 1983 جىلى جاۋىنگەرلەردىڭ رۋحىن كوتەرۋ ماقساتىندا اۋعانستاننىڭ قاندى سوعىس ورىن العان ۇرىس الاڭىنا گاسترولدىك ساپارمەن بارىپ, قانداعار, قۇندىز, باعرام, كابۋل قالالارىنىڭ گوسپيتالدارى مەن اشىق
الاڭىندا كونتسەرت قويدى. بۇل ساپاردىڭ قاۋپى مەن قيىندىعى جونىندە ءانشىنىڭ اۋعان دالاسىنا بىرگە بارعان دوسى ءارى ارىپتەسى بولات سىزدىقوۆ ءوز ەستەلىگىندە: ء«بىزدىڭ ەڭ قاۋىپتى گاسترولدىك ساپارىمىز اۋعان جەرىندە بولدى. ءبىز ول جەردە قاندى سوعىس ورىن العان ۇرىس الاڭى قانداعار, قۇندىز, باعرام, كابۋل قالالارىنىڭ گوسپيتالدارى مەن اشىق الاڭىندا كونتسەرت قويدىق. ول گاسترولدىك ساپاردا تىكۇشاقپەن سپيرال جاساپ كوتەرىلۋگە ءماجبۇر بولدىق. سەبەبى تولاسسىز جاۋعان جاۋ وعى بىزگە دە باعىتتالدى», دەپ جازادى.
بەيبىت ومىردە عانا ەمەس, حالىق باسىنا كۇن تۋعان قيىن-قىستاۋ شاقتاردا دا ازاماتتىق بورىشىن ۇمىتپاي, ەلىنىڭ جانىنان تابىلعان ءانشىنىڭ سوعىسقا قاتىسقان جاۋىنگەرلەردىڭ رۋحىن كوتەرۋگە باعىتتالعان ەرلىك ءىسى ەسكەرىلىپ, «اۋعان سوعىسىنىڭ ارداگەرى» ەستەلىك مەدالى تاعايىندالعان بولاتىن. ءوزىنىڭ شىعارماشىلىق جولىن «قازاقكونتسەرت» گاسترولدىك-كونتسەرتتىك بىرلەستىگىندە باستاعاندىقتان, باتىرحان شۇكەنوۆتىڭ مەدالى مەكەمەنىڭ قايتا قۇرىلۋىنا بايلانىستى 2016 جىلى ورتالىق مەملەكەتتىك ارحيۆكە بەرىلىپ, 2019 جىلدىڭ باسىندا جاڭادان قۇرىلعان مادەنيەت جانە سپورت مينيسترلىگىنىڭ «قازاقكونتسەرت» مەملەكەتتىك كونتسەرتتىك ۇيىمىنا قايتا تابىستالادى.
ءانشىنىڭ ومىردەن وتۋىنە بايلانىستى, ونەر يەسىنە باعىتتالعان قۇرمەت اناسىنا كورسەتىلىپ, «قازاقكونتسەرت» مەملەكەتتىك كونتسەرتتىك ۇيىمىنىڭ ديرەكتورى جەڭىس سەيدوللا ۇلى مەرەكەلىك مەدالدى ديليارا شۇكەنوۆاعا سالتاناتتى تۇردە تابىس ەتتى.
– بارلىعىڭىزعا راحمەت! مەن باتىردى جوق دەپ جۇرسەم, بالام ءالى ءتىرى ەكەن. سەندەردى كورگەندە ءوزىمدى باقىتتى سەزىندىم. ول اۋعان جەرىندەگى گاسترولدىك ساپارىن ءجيى ەسىنە الاتىن. «ەلگە ءتىرى ورالماي قالامىن با» دەگەن قورقىنىشى بولعانىن دا ايتقان. بۇل مەدال باتىردىڭ ءتىرى كەزىندەگى ءومىرىمدى ەسكە تۇسىرگەندەي. ۇلىم ۇرىس
الاڭىنان كەلگەندە قۋانا قارسى الىپ, امان كەلگەنىنە شۇكىرلىك ايتقانىمىز كۇنى كەشەگىدەي جادىمدا سايراپ تۇر. امال قانشا؟! بۇل ومىرگە كىم كەلىپ, كىم كەتپەدى. ولاردىڭ ىزدەۋسىز قالعانى قانشاما؟! ال باتىردىڭ ىزدەۋشىسى بار. ونىڭ ءانى, شىعارماشىلىعى حالىقتىڭ جادىندا, جۇرەگىندە ساقتاۋلى. وسىعان مىڭ مارتە شۇكىر دەيمىن. باتىردىڭ ولمەيتىن ەكىنشى ءومىرى باستالدى», دەدى ديليارا شۇكەنوۆا تولقىنىسىن جاسىرا الماي.
سونداي-اق ءىس-شارا بارىسىندا قازاق ونەرىنىڭ دامۋىنا ولشەۋسىز ۇلەس قوسقان قازاقستاننىڭ ەڭبەك سىڭىرگەن قايراتكەرى, اتاقتى ءانشى ءارى كومپوزيتور, «اۋعان سوعىسىنىڭ ارداگەرى» مەدالىنىڭ يەگەرى باتىرحان شۇكەنوۆتىڭ اناسىنا مادەنيەت جانە سپورت ءمينيسترى ارىستانبەك مۇحامەدي ۇلىنىڭ اتىنان قۇتتىقتاۋ تەلەگرامماسى جەتكىزىلدى.
نازەركە جۇماباي,
«Egemen Qazaqstan»
