ءامىر احەتوۆ: «اۋىل حالقىنا قىزمەت كورسەتسەك دەيمىز»
سەيسەنبى, 15 مامىر 2012 7:48
ەلورداداعى «بولاشاقتىڭ گوسپيتالىنىڭ» ءبىرى – «رەسپۋبليكالىق دياگنوستيكالىق ورتالىق» اكتسيونەرلىك قوعامى. ۇلتتىق مەديتسينالىق حولدينگ قۇرامىنا كىرەتىن بۇل ورتالىق پايدالانۋعا بەرىلگەن كۇننەن باستاپ حالىققا دياگنوستيكالىق قىزمەت كورسەتىپ كەلەدى. جۇمىستارى قانشالىقتى ناتيجەلى بولۋدا, قانداي جەتىستىكتەرى بار ەكەنىن بىلمەك نيەتپەن اكتسيونەرلىك قوعامنىڭ باسقارما ءتوراعاسى ءامىر احەتوۆكە جولىققانبىز.
سەيسەنبى, 15 مامىر 2012 7:48
ەلورداداعى «بولاشاقتىڭ گوسپيتالىنىڭ» ءبىرى – «رەسپۋبليكالىق دياگنوستيكالىق ورتالىق» اكتسيونەرلىك قوعامى. ۇلتتىق مەديتسينالىق حولدينگ قۇرامىنا كىرەتىن بۇل ورتالىق پايدالانۋعا بەرىلگەن كۇننەن باستاپ حالىققا دياگنوستيكالىق قىزمەت كورسەتىپ كەلەدى. جۇمىستارى قانشالىقتى ناتيجەلى بولۋدا, قانداي جەتىستىكتەرى بار ەكەنىن بىلمەك نيەتپەن اكتسيونەرلىك قوعامنىڭ باسقارما ءتوراعاسى ءامىر احەتوۆكە جولىققانبىز.
– ءامىر امانتاي ۇلى, ءوزىڭىز باسقاراتىن دياگنوستيكالىق ورتالىق جايىندا كوپشىلىك قاۋىم تولىعىراق ءبىلسىن دەگەن ماقساتپەن الدىمەن ورتالىق تۋرالى ايتا كەتكەنىڭىزدى ءجون ساناپ وتىرمىن.
– راس, دياگنوستيكالىق ورتالىق جايىندا ەلىمىزدىڭ تۇكپىر-تۇكپىرىندە تۇراتىن كوپشىلىكتىڭ بىلگەنىن ءبىز دە قالايمىز. نەگە دەسەڭىز, استانالىقتار قارالاتىن, ەمدەلەتىن مەكەمەلەر مۇندا وتە كوپ. ولاردىڭ اراسىندا اقىلىسى دا, مەملەكەتتىك بيۋدجەت قارجىلاندىرىپ وتىرعاندارى دا بار. بۇل تۇرعىدا استانالىقتارعا جاقسى مۇمكىندىك جاسالعان. ال شالعايداعى اۋداندار مەن اۋىلدارعا دياگنوستيكالىق اپپاراتتار ءالى 100 پايىز جەتكىزىلگەن جوق. سوندىقتان ءبىز ءوز پاتسيەنتتەرىمىزدىڭ نەگىزىنەن, ياعني 80 پايىزى اۋىل تۇرعىندارى بولۋىن قالايمىز.
ورتالىق تۋرالى ايتار بولساق, ءبىزدىڭ ورتالىق ءبىر مەزگىلدە 500 ادام قابىلداي الاتىن ەلىمىزدەگى ەڭ ءىرى دياگنوستيكالىق مەكەمە. اپپاراتتارىمىز ەۋروپا, اقش, جاپونيا سىندى دامىعان مەملەكەتتەردەن ساتىپ الىنعان. بۇل اپپاراتتارمەن ساۋلەلى دياگنوستيكانىڭ 5 ءتۇرى, ۋدز مەن فۋنكتسيونالدى دياگنوستيكانىڭ 42 ءتۇرى, لابوراتوريالىق زەرتتەۋلەردىڭ 500 ءتۇرى, ەندوسكوپيالىق زەرتتەۋلەردىڭ 10 ءتۇرى جانە ەلىمىزدە تۇڭعىش رەت پوزيتروندى-ەميسسيولىق توموگراف ارقىلى راديويزوتوپتى دياگنوستيكا جۇرگىزىلەدى. بىزدە 500-گە جۋىق مامان ەڭبەك ەتەدى.
– دارىگەر ماماندار تۋرالى وسى كۇنى ەل-جۇرت كوپ سىن ايتادى. قالادا دا, اۋىلدا دا دارىگەرلەر شەتەلدىك اپپاراتتاردى دۇرىس مەڭگەرە الماي جاتىر, دياگنوزدى ناقتى قويا المايدى دەگەن سوزدەردى قۇلاعىمىز شالىپ قالادى. سىزدەردە دارىگەرلەرگە قانداي تالاپ قويىلادى؟ ورتالىقتىڭ ەلىمىزدەگى ەڭ ءىرى دياگنوستيكالىق مەكەمە ەكەنىن ءوزىڭىز ايتتىڭىز. وسىنداعى ماماندار سول دارەجەگە لايىق پا؟
– ءبىز ءۇشىن مامانداردىڭ الەۋەتى ەڭ باستى ورىندا. ءبىز, اسىرەسە, جۇمىسقا قابىلداعاندا وتە قاتال تالاپ قويامىز. ولار كەشە عانا ۋنيۆەرسيتەت قابىرعاسىنان شىققان جاستار ەمەس, تاجىريبەسى بار بىلىكتى ماماندار بولۋلارى كەرەك. وسىندا ورنالاسقان سوڭ دا مامانداردىڭ بىلىكتىلىگىن ۇدايى ارتتىرىپ وتىرامىز. ماسەلەن, 2010 جىلى 77 قىزمەتكەر, بىلتىر 90 قىزمەتكەر ارنايى دايارلىق كۋرستارىنان ءوتتى. اسىرەسە, مامان دارىگەرلەردىڭ شەتەلدەردەن وقىپ قايتۋىن قاداعالايمىز. تەك وسى ەكى جىلدا 34 قىزمەتكەرىمىز شەتەلدەردە بولىپ, بىلىمدەرىن جەتىلدىرىپ قايتسا, سونىڭ 28-ءى دارىگەرلەر. شەتەلدىك ارىپتەستەردى شاقىرىپ شەبەرلىك سىنىپتارىن ۇيىمداستىرۋ ءداستۇرى بىزدە دە بار. وسى جىلداردا سونداي اتى-ءجونى مەديتسينا الەمىنە بەلگىلى تۇلعالاردىڭ 13-ءىن شاقىرىپپىز.
ءوزىمىز دە حالىقارالىق كونفەرەنتسيالارعا قاتىسىپ تۇرامىز. وسى ايتىلعان جايلاردىڭ ارقاسىندا ورتالىعىمىزدا جىلدان-جىلعا جۇمىس الەۋەتى ارتىپ كەلەدى. سوڭعى جىلدارى ەمدەۋدىڭ 38 جاڭا ءادىسى مەن 4 يننوۆاتسيالىق تەحنولوگيا تاجىريبەگە ەنگىزىلدى. سونداي-اق, ءبىز دارىگەرلەردى ىنتالاندىرۋعا دا ايرىقشا ءمان بەرەمىز. ويتكەنى, ول كاسىبي دەڭگەيى جوعارى ماماندار قاتارىن ارتتىرۋعا ىقپال ەتەدى. وتكەن جىلى ءدارىگەرلەردىڭ ايلىعىن 37 پايىزعا, ورتا بۋىن مامانداردىڭ ايلىق جالاقىسىن 11 پايىزعا كوبەيتتىك. ولاردىڭ الەۋمەتتىك قاجەتتىلىكتەرى ءۇشىن وتكەن جىلى 3 ميلليون تەڭگە جۇمسالدى. مۇنداي شارالار مامانداردى تۇراقتاندىرۋعا قول جەتكىزەدى دەپ ەسەپتەيمىن. بىلتىر بىزدە الدىڭعى جىلدارمەن سالىستىرعاندا مامانداردىڭ كەتىپ قالۋ دەڭگەيى 4 پايىزعا قىسقاردى. وندا دا ولار جۇمىس ۇناماعاسىن نە ءتىل تابىسا الماعاسىن ەمەس, وتباسى جاعدايىنا بايلانىستى, باسقا قالاعا كوشۋىنە بايلانىستى كەتتى.
– وسى مەكەمەدە دياگنوستيكادان ءوتۋ ءۇشىن نە ىستەۋ كەرەك؟ ەلىمىزدىڭ شالعاي اۋىلدارىنان كەلگەن سىرقات ادامدار ارى-بەرى جۇرەم دەپ ودان سايىن جاعدايىن ناشارلاتىپ الماي ما؟
– ءبىز بەس ادامنىڭ تورتەۋىن تەگىن دياگنوستيكادان وتكىزەمىز. تەگىن ەمدەلۋدىڭ ءبىر عانا شارتى بار – ول كۆوتا نەمەسە جەرگىلىكتى اۋرۋحانانىڭ جولداماسى. بىلتىر ءبىز 330 مىڭنان اسا ادامدى قابىلدادىق. ال الدىڭعى جىلى بۇل كورسەتكىش 262 مىڭ بولاتىن. مۇندا دەنساۋلىعىن ەگجەي-تەگجەيلى تەكسەرتەتەتىن ادامداردىڭ سانى جىل سايىن ءوسىپ كەلەدى. سونىڭ ىشىندە اقىلى قىزمەتكە دە سۇرانىس كوپ. ول دياگنوستيكالىق ورتالىقتىڭ باس ديرەكتورىنىڭ بۇيرىعىمەن بەكىتىلگەن باعا تىزىمىنە سايكەس جۇرگىزىلەدى. وسى جەردە بىلتىر ءبىزدىڭ ورتالىق ۇلتتىق مەديتسينالىق حولدينگتىڭ ەنشىلەس ۇجىمدارىنىڭ اراسىندا حالىققا قىزمەت كورسەتۋ جونىنەن ءبىرىنشى ورىن العانىن ايتا كەتسەم دەيمىن.
سىرقات ادامداردىڭ جاعدايىنا كەلسەك, راسىندا دا مۇندا ءبىر عانا اۋرۋمەن كەلەتىن ادامدار سانى از. كوبى جىلدار بويى اۋرۋىنىڭ ۇستىنە اۋرۋ جاماعان جاندار. ولاردى دياگنوستيكادان وتكىزۋ بارىسىندا وسىنداعى كۇندىزگى ستاتسيونارعا جاتقىزامىز. ال, جاعدايلارى مۇلدە ناشار بولسا, حولدينگتىڭ باسقا دا ورتالىقتارىندا, ماسەلەن, نەيروحيرۋرگيا, انا مەن بالا ۇلتتىق عىلىمي ورتالىقتارىندا جاتىپ, ەمدەلىپ شىعۋلارىنا كومەكتەسەمىز.
– ورتالىق اشىلعالى بەرى قول جەتكىزىلگەن جەتىستىكتەر تۋرالى اڭگىمەلەپ بەرسەڭىز.
– جەتىستىكتەر بارشىلىق. سونىڭ بىرەگەيى – يادرولىق مەديتسينانى ەنگىزۋىمىز. قازىر ورتالىقتىڭ بازاسىندا ونكولوگيالىق اۋرۋلاردى ەرتە ساتىسىندا انىقتايتىن عاجايىپ دياگنوستيكالىق قۇرال-جابدىق جۇمىس ىستەپ تۇر. قازىرگى تاڭدا وسى اپپاراتتىڭ كومەگىمەن ونكولوگيالىق اۋرۋلاردىڭ ەرتە ساتىسىندا دياگنوزىن قويىپ جاتىرمىز. وسى ۋاقىتقا دەيىن 1500 ادامنان سول اۋرۋلاردىڭ العاشقى بەلگىلەرى انىقتالدى. بۇلاي ەرتە ساتىدا انىقتاۋ ءبىزدىڭ ورتالىق ەمەس, مەملەكەتىمىز ءۇشىن دە پايدالى دەپ ويلايمىن. ويتكەنى, ونكولوگيالىق اۋرۋلاردى ەمدەۋگە وتە كوپ قاراجات جۇمسالادى. ال ونى ەرتەرەك انىقتاساق, ەمدەۋ دە وڭاي, جۇمسالاتىن قاراجات تا ازايادى. بىراق, اڭگىمە تەك اپپارات ارقىلى دياگنوزدى قويۋمەن تۇيىقتالماۋى كەرەك. حولدينگ بازاسىنا ونكولوگيالىق اۋرۋلاردى ەمدەگەندە قاتار جۇرەتىن جوعارى تەحنولوگيالى تەراپيا ادىستەرىن ەنگىزۋ كۇن تارتىبىندە تۇر. بۇل راديويزوتوپتى تەراپيا, ستەوروتاكسيكالىق راديوحيرۋرگيا, پروتوندى تەراپيا سىندى الەمنىڭ دامىعان مەملەكەتتەرى قولداناتىن سوڭعى ۇلگىدەگى تەراپيالىق ەمدەۋ ادىستەرى. وسى تۇرعىدان كەلگەندە جاڭا يننوۆاتسيالىق تەحنولوگيالاردى ەنگىزۋ, سونىڭ ىشىندە ساۋلەلى راديوحيرۋرگيانى ەنگىزۋ وتە وزەكتى بولىپ وتىر. ستەوروتاكسيكالىق راديوحيرۋرگيانىڭ (كيبەر پىشاق, گامما پىشاق) حيرۋرگيالىق تاسىلمەن سالىستىرعاندا ارتىقشىلىقتارى كوپ. ول بىرىنشىدەن ءينۆازيۆتى ەمەس, جالپى انەستەزيا بەرىلمەيدى, ينفەكتسيالىق جۇقپالاردىڭ ءورشۋ قاتەرى از.
– وسىعان بايلانىستى تاعى ءبىر سۇراق ەلباسىمىز بيىلعى جولداۋىندا مەديتسينا سالاسى بويىنشا ەندىگى جەردە الدىڭعى كەزەكتە شەشىلۋى ءتيىس ماسەلەنىڭ قاتارىنا ونكولوگيالىق اۋرۋلاردى ەمدەۋ مەن ودان بولاتىن ءولىم-ءجىتىمدى ازايتۋ ءماسەلەسىن شىعارىپ ەدى. بۇل ءۇشىن ۇكىمەتكە تاپسىرما بەرىلدى, ۇلتتىق مەديتسينالىق حولدينگ ارقاۋىندا استانا قالاسىنان ونكولوگيالىق ورتالىق اشۋ كەرەكتىگى ايتىلعان بولاتىن.
– سۇراعىڭىزدى ءتۇسىندىم. ونكولوگيالىق اۋرۋلار تەك ءبىزدىڭ ەلىمىزدە ەمەس, بۇكىل الەمدە ۇلكەن الاڭداۋشىلىق تۋدىرىپ وتىر. جىل سايىن الەمدە 8 ميلليونعا جۋىق ونكولوگيالىق اۋرۋلاردىڭ جاڭا جاعدايى تىركەلسە, جىل سايىن 5,2 ميلليون ادام وسى اۋرۋلاردىڭ زاردابىنان ومىرمەن قوشتاسۋدا. ءبىزدىڭ ەلىمىزدە دە بۇل اۋرۋلاردىڭ ۇلەسى ۇلكەن. ويتكەنى وسى اۋرۋلاردان بولاتىن ءولىم-ءجىتىم ەكىنشى ورىندا تۇر. جىل سايىن 20 مىڭ ادام قايتىس بولسا, جىل سايىن 30 مىڭ ادام جاڭادان ءتىركەلۋدە. سوندىقتان ۇلتتىق مەديتسينالىق حولدينگ ارقاۋىندا ونكولوگيالىق عىلىمي ورتالىق قۇرۋ ءبىز ءۇشىن ۇلكەن جەتىستىك بولار ەدى. قازىر سوعان جۇمىس ىستەلىپ جاتىر. ول وسى دياگنوستيكالىق ورتالىقتىڭ ىشىنەن قۇرىلادى. ءويتكەنى, بىزدە جوعارى تەحنولوگيالىق اپپاراتتاردىڭ تۇگەلگە جۋىعى بار. وعان جوعارىدا ايتىلعان ەمدەۋ ادىستەرى قوسىلسا, ەلىمىز ونكولوگيالىق اۋرۋلاردى ەرتە ساتىسىندا ەمدەۋ بويىنشا وزىق مەملەكەتتەردىڭ قاتارىنا قوسىلارى داۋسىز.
– جۋىردا عانا حولدينگتىڭ انا مەن بالا ۇلتتىق عىلىمي ورتالىعى «دجي-سي-اي» ساپا سەرتيفيكاتىن الدى. وعان ونى ءۇش جىل بويى باسقارعان اۆستريالىق «ۆامەد» كومپانياسىنىڭ ۇلەسى بار ەكەنىن بىلەمىز. دياگنوستيكالىق ورتالىققا وسىنداي كومپانيالاردىڭ ءبىرىنىڭ كومەگى كەرەك ەمەس پە؟
– بۇل – دەنساۋلىق ساقتاۋ مينيسترلىگى مەن حولدينگتىڭ اۋرۋحانالىق جۇيەنى حالىقارالىق باسقارۋعا بەرۋ جونىندەگى العاشقى جوباسى. ول «انا مەن بالا» ۇلتتىق عىلىمي ورتالىعىنا ەنگىزىلدى. كومپانيا ورتالىققا 3 جىل كولەمىندە ءتيىمدى مەنەدجمەنت قالىپتاستىرىپ, حالىقارالىق ساپا ستاندارتتارىن ەنگىزۋى ءتيىس بولاتىن. ورتالىق ساپا سەرتيفيكاتىنا قول جەتكىزدى. ال, باسقارۋعا كەلسەك, بىزدە دەنساۋلىق ساقتاۋ سالاسىنا باسشىلىق جاسايتىن بۇرىنعى جۇيە ابدەن ەسكىرگەنىن قازىر مەديتسينا ماماندارىنىڭ كوبى مويىندايدى. اۆستريالىق كومپانيانى باسشىلىققا تارتۋ سول ءۇشىن كەرەك بولدى. بىراق بۇل سونداي كومپانيالاردى ەلىمىزدىڭ بۇكىل ەمدەۋ مەكەمەلەرىنە تارتۋ كەرەك دەگەن ءسوز ەمەس. ماسەلەن, ءبىزدىڭ دياگنوستيكالىق ورتالىقتى بوتەن ءبىر ەلدىڭ كومپانياسىنا باسشىلىققا بەرۋدىڭ قاجەتتىلىگى جوق. ءبىز الدىڭعى ۇلگىدەن دە ۇيرەنۋگە ءتيىس نارسەلەردى كەرەگىنشە الدىق.
– ءامىر امانتاي ۇلى, جۇمىس بابىمەن الەمنىڭ تالاي ەلدەرىندە بولىپ جۇرگەن شىعارسىز؟ ولاردىڭ مەديتسيناسى دامىعان دەپ جاتادى. بىراق بۇل قانشالىقتى راس. سول دامىعان مەديتسينانىڭ, ماسەلەن, اقش-تا دەيىك, قاراپايىم حالىققا قولجەتىمدىلىگى قانداي دەڭگەيدە؟
– باسقا عىلىمداردى بىلمەيمىن, بىراق, ءبىز مەديتسينا دامىعان عاسىردا ءومىر ءسۇرىپ جاتىرمىز. ءتۇرلى اۋرۋلاردىڭ ەمى تابىلىپ جاتىر. ءتۇرلى تاسىلمەن ەمدەۋ جولعا قويىلعان. ونىڭ ىشىندە جاڭا تەحنولوگيالار تۋرالى ساعاتتاپ اڭگىمە ايتۋعا بولادى. ءبىر عانا مىسال, ءبىزدىڭ ەلىمىز دەمەي اق قويايىن, جالپى تمد جوعارى مەديتسينالىق قۇرال-جابدىقتارمەن قامتىلۋ بويىنشا دامىعان مەملەكەتتەردەن ون ەسەگە دەيىن قالىپ تۇر. بۇل راسىندا الەمدىك دەڭگەيدەگى مەديتسينانىڭ قارىشتاپ كەتكەنىن بايقاتادى. بۇل ولقىلىقتى تولتىرۋ وڭاي ەمەس. ءبىزدىڭ ءالى ۇيرەنۋى ءتيىس نارسەلەرىمىز كوپ. ال ەندى مەديتسينا دەگەن پريزمانىڭ باسقا قىرىنان قاراساق, بىزدەگى ادامعا جانى اشۋ, ادامگەرشىلىك قاعيداتتارى باسقا ەلدەرگە ۇلگى بولعانداي دەپ ايتا الامىن. ويتكەنى, ەلباسىمىزدان باستاپ قوعامنىڭ باستى بايلىعى ادام دەپ, حالقىنىڭ دەنساۋلىعىنا مىقتاپ كوڭىل ءبولىپ وتىر. الەمنىڭ بىردە-ءبىر ەلىندە ءدال بىزدەگىدەي ءار ادامعا تەگىن مەديتسينالىق كومەك كورسەتىلمەيدى. سول ءۇشىن بيۋدجەتتەن بىزدەگىدەي مول قاراجات بولىنبەيدى. اقش-تى ايتىپ قالدىڭىز. اقش ەمدەلۋ قۇنى وتە جوعارى مەملەكەتتەردىڭ قاتارىنا جاتادى. ونىڭ قاراپايىم حالقى قالتاسى كوتەرىپ, ءوز ەلدەرىندە ەمدەلە المايدى دەسەك, وتىرىك بولمايدى. سول ءۇشىن ولار تايلاند, مالايزيا سياقتى مەملەكەتتەرگە بارىپ ەمدەلەتىنىن وسى كۇنى الەمدەگى بۇقارالىق اقپارات قۇرالدارى جارىسا جازىپ جاتىر. وسى تۇرعىدان كەلگەندە مەملەكەتىمىز ءوز حالقىنا كاپيتاليستىك جۇيە قاعيداتتارىمەن ەمەس, ادامگەرشىلىك نەگىزىنە سۇيەنگەن قاعيداتتارمەن قاراپ وتىرعانىن ءاربىر قازاقستاندىق ءبىلۋى ءتيىس دەپ ويلايمىن. كەيدە مەن كەيبىر تەلەارنالار مەن گازەتتەردە بولماس داۋدى زورايتىپ كورسەتەتىن جۋرناليستەرگە رەنجيمىن. ولار نەگە تەك كەمشىلىكتى عانا كورەدى. ال مەديتسينا سالاسىندا, اسىرەسە, تاۋەلسىزدىك جىلدارىندا جاڭالىق تا, جاقسىلىق تا مول عوي.
– اڭگىمەڭىزگە راحمەت.
اڭگىمەلەسكەن ايگۇل سەيىلوۆا,
