- ءبىزدىڭ تاتار ۇلتىنىڭ قولونەرگە باي ەكەندىگى بەلگىلى,-دەدى قاميليا راشيتقىزى,-بۇل شارامىزدىڭ باستى ماقساتى تاتار حالقىنىڭ سالت-داستۇرىنە وراي ەرەكشەلىكتەردى ساقتاپ, دامىتۋ بولىپ تابىلدى. ءبىز بۇدان بۇرىن «ابيەمنەڭ تەلاكلارە, ناسيحاتلارە» دەپ جەلتوقسان ايىندا, ال قاڭتاردا «تاتار حالىك اشلارى بيك تاملە ءھام فايدالى» دەگەن شارالارىمىزدى دا وتكىزگەنبىز.
كاميليا راشيتقىزىنىڭ ايتۋىنشا, تاتار حالقىنىڭ بۇگىنگى باس قوسۋىندا ۇلتتىق كيىمدەرىنىڭ تۇرلەرىنەن, قولونەرىنەن كورمە ۇيىمداستىرىلىپ وتىر. وسىعان وراي تاتارلار وزدەرىنىڭ كورمەلەرىندەگى بۇيىمداردى اجەلەرىنىڭ ساندىقتارىنان سارى مايداي ساقتاپ, بۇگىنگە جەتكىزىپ وتىرعاندىقتارىن ايتتى. جاسالۋ تاسىلدەرىمەن جاستاردى تانىستىردى.
ايتا كەتۋ كەرەك, بۇل جولى تاتار ورتالىعىنا بۇكىلوداقتىق تاتار كونگرەسسىنىڭ اتقارۋشى ورتالىعىنىڭ توراعاسى ر. زاكيروۆ جانە قازاقستان رەسپۋبليكاسىنداعى تاتارسىننىڭ وكىلەتتى ەلشىسى د. ۆالەەۆتار دا ارنايى كەلىپ قاتىستى. ولار تاتار قوعامدىق ورتالىعىنىڭ جۇمىسىمەن تانىسىپ, «اق قالفاق» حانىمدار كلۋبىنىڭ مۇشەلەرى جاساعان ۇلتتىق ۇلگىدەگى سىيلىقتارىنا يە بولدى. جيىن سوڭىندا سەمەي تاتارلارى وسىنداي باس قوسۋلاردى ءجيى ۇيىمداستىرىپ تۇرساق دەگەن وتىنىشتەرىن ايتتى.
راۋشان نۇعمانبەكوۆا,
«ەگەمەن قازاقستان»
سەمەي
