وتباسى قۇندىلىقتارىن قالىپتاستىرىپ, اتا-انا مەن بالانىڭ اراسىنداعى قارىم-قاتىناستى جاقسارتۋعا جانە پسيحواكتيۆتى زاتتاردان ساقتانۋ جولدارىنا ارنالعان كۋرستى مەكتەپ پسيحولوگتارى جانە پەداگوگ-كۋراتور بيبىگۇل ارىستانوۆا جۇرگىزدى. شارانى ۇيىمداستىرۋداعى باستى ماقسات – وتباسى مۇشەلەرىنىڭ قارىم-قاتىناسىن جاقسارتىپ, اتا-انا بالانى, بالا اتا-انانى ءتۇسىنىپ, جانۇياداعى ىنتىماقتاستىق پەن بەرەكەنى يكەمدىلىك ارقىلى دامىتۋ.
- كۋرس 10-14 جاستاعى بالالار مەن ولاردىڭ اتا-انالارىنا ارنالعان. ساباق بارىسىندا ءبىز جاسوسپىرىمدەردىڭ كۇيزەلىسىنىڭ ەرەكشەلىكتەرىن, اينالاسىنداعى ورتامەن قارىم-قاتىناسىن, وزىنە دەگەن سەنىمنىڭ قالىپتاسۋىن زەرتتەدىك. سونداي-اق, وتباسىداعى شەكتەۋلەرگە, كونفليكت جاعدايىنداعى بالانىڭ ءوزىن-ءوزى ۇستاۋىنا نازار اۋدارىپ, بالانى كۇشپەن تاربيەلەمەۋ جولدارىن قاراستىردىق. باعدارلامانىڭ ەڭ ماڭىزدى تۇسى بۇل – توپتىق ديناميكا. كوماندا مۇشەلەرى ءوزىنىڭ جانىنداعى ادامنىڭ مىقتى تۇستارىن تابا ءبىلدى, - دەيدى پسيحولوگ تىلەكتەس ورازبەرگەنقىزى.
مەكتەپ پەداگوگ-پسيحولوگتارىنىڭ سوزىنشە, كۋرستىڭ ەكى دارىسىنەن كەيىن-اق, توپ مۇشەلەرى اۋىزبىرشىلىك تانىتىپ, ءوزارا جاقىن ءتىل-تابىسا باستاپتى. سونىمەن قاتار, ساباق بارىسىندا اتا-انالار بالالارىن جاڭا قىرىنان تانىعاندارىن دا اتاپ ءوتتى.
- بالالارعا سترەسس دەگەننىڭ نە ەكەنىن, ودان شىعۋ جولدارى, وتباسىلىق ءتارتىپتى ساقتاۋ, ۇلكەندەردە تۋىندايتىن قيىندىقتار تۋرالى ايتىلدى. جوبانىڭ ءبىر ەرەكشەلىگى قاتىسۋشىلارعا تەك قانا لەكتسيا وقىلا بەرمەي, ءار ءتۇرلى ويىندار, توپتىق جۇمىستار جاساۋ ارقىلى تۇسىندىردىك, - دەيدى كۋراتور بيبىگۇل اباتقىزى.
ترەنەرلەردىڭ سوزىنشە, جوبانىڭ تيىمدىلىگىن انىقتاۋ ماقساتىندا وتباسىلار ءالى دە باقىلاۋدا بولادى. مۇنىمەن قوسا كۋرس جەتەكشلەرى, كوماندا مۇشەلەرىنىڭ ءبىلىمىن وزگە دە سىنىپتاعى وقۋشلارعا تاراتۋ ماسەلەسىن جولعا قويۋدى جوسپارلاپ وتىر. ايتا كەتەيىك, «بەرىك وتباسى» پسيحولوگيالىق كۋرسىن ۇلىبريتانياداعى وكسفورد برۋكس ۋنيۆەرسيتەتىنىڭ ماماندارى بىرىگىپ جاساعان. قازىرگى تاڭدا جوبا الەمنىڭ 35 ەلىنە ەنگىزىلىپ, ورىس, يسپان, نەمىس, پورتۋگال, فرانتسۋز, قىتاي تىلدەرىنە اۋدارىلعان. 2018 جىلدىڭ قاراشا ايىندا اقتاۋ قالاسىنداعى نازارباەۆ زياتكەرلىك مەكتەبىنىڭ پسيحولوگى تىلەكتەس ماسكاروۆا مەن پەداگوگ-كۋراتور وكسفورد برۋكس ۋنيۆەرسيتەتىنىڭ اعا مۇعالىمى, فيلوسوفيا عىلىمدارىنىڭ دوكتورى دەببي الەن جانە ليندسي كلۋبستان باعدارلاما بويىنشا ءبىلىم العان.
گۇلايىم شىنتەمىرقىزى,
«Egemen Qazaqstan»
ماڭعىستاۋ وبلىسى
