- گران-پري كەزەڭىنەن مەدال الۋ ءۇشىن ءبىر ۇپايىم كەم بولدى. مەن سكيتتە شەبەرلىگىمدى شىڭداپ ءجۇرمىن, بۇل وليمپيادا ويىندارىنىڭ باعدارلاماسىنا ەنەدى. كۋۆەيتتە بارلىعى جاقسى ۇيىمداستىرىلدى. تەك فينالدا قاتتى جەل سوعىپ, كەرى اسەرىن تيگىزدى. ايتپەسە, جۇلدەگە تالاسۋدىڭ رەتى كەلگەن ەدى.
كەز-كەلگەن سپورتشى سەكىلدى, مەنىڭ دە وليمپيادا ويىندارىنا قاتىسقىم كەلەدى. تورتجىلدىق ويىندارىنا جولداما الۋ قيىن بولسا دا, تىرىسىپ باعامىن. ءبىزدىڭ سپورتتا ليتسەنزيا الەم جانە ازيا چەمپيوناتى, سونداي-اق, الەم كۋبوگى كەزەڭدەرىندە ساراپقا سالىنادى. ءوز باسىم سارى قۇرلىق چەمپيوناتىندا وسى ماقساتىمدى ورىنداسام دەگەن ويدامىن. الايدا, وڭاي بولماسى ءسوزسىز. ويتكەنى. ازيا چەمپيوناتىندا ءبىر عانا جولداما ويناتىلادى. ازيادا ءبىزدىڭ باستى قارسىلاستارىمىز قىتاي, كۋۆەيت, تايلاند,كاتار, وڭتۇستىك كورەيا سپورتشىلارى بولماق.
ستەند اتۋ سپورتى ەلىمىزدە ۇلكەن تانىمالدىققا يە ەمەس. ءوزىم الماتى وبلىسى, ىلە اۋدانى, ىنتىماق اۋىلىندا تۋىپ ءوستىم. ستەند اتاتىن الاڭقاي ءبىزدىڭ ۇيگە جاقىن ورنالاسقان. العاشقى اسكەري دايىندىق ساباعىنان بەرەتىن ۇستازىمىز ستەند اتۋدى ۇيرەتتى دە, مەنىڭ قىزىعۋشىلىعىم وياندى. 2015 جىلدان بەرى ۇلتتىق قۇراما ساپىندا ءتۇرلى جارىستارعا قاتىسىپ ءجۇرمىن. كۋۆەيتتەگى گران-پري دوداسىمەن بىرگە وقۋ-جاتتىعۋ جيىندارى دا اياقتالدى. ەندى جوسپار بويىنشا كەلەسى تۋرنيرگە دايىندالامىز, - دەيدى اسەم ورىنباي.
ەسكە سالا كەتەيىك, كۋۆەيتتەگى گران-پري تۋرنيرىندە قازاقستاندىق ولگا پانارينا قولا مەدال جەڭىپ الدى.
