قازىرگى تاڭدا تۇركىستان وبلىسىنداعى 843 ەلدى مەكەننىڭ 385-ءى (45,7 %) نەمەسە 1072 ,9 مىڭ. تۇرعىنى (54,3 %) تابيعي گازبەن قامتاماسىز ەتىلگەن. وبلىستا 2018 جىلعا دەيىن بيۋدجەت ەسەبىنەن جالپى 223 نىساندا 5,6 مىڭ شاقىرىمنان استام گاز جۇيەلەرىنىڭ جانە 12 اۆتوماتتى گاز تاراتۋ ستانساسىنىڭ قۇرىلىستارى جۇرگىزىلگەن. وعان قوسا, بىلتىر قوسىمشا 42 ەلدى مەكەندە گاز نىساندارىنىڭ قۇرىلىستارى جۇرگىزىلىپ, تاپسىرىلعان. دەگەنمەن, 2016-2018 جىلدارى قۇبىرلاردىڭ قۇرىلىسى اياقتالعان 78 ەلدى مەكەن «كوگىلدىر وتىنعا» قوسىلماي وتىر. بۇل تۇرعىنداردى الاڭداتادى.
ماجىلىستە وبلىستىق ءماسليحات دەپۋتاتتارى, وبلىستىق ەنەرگەتيكا جانە تۇرعىن ءۇي كوممۋنالدىق شارۋاشىلىعى باسقارماسى باسشىلىعى وسى ماسەلە توڭىرەگىندە ءوز ۇسىنىستارىن ورتاعا سالدى. «قازترانگازايماق» اق-نىڭ تۇركىستان وبلىستىق فيليالى دا بۇل باعىتتا جۇمىستى شيراتاتىن بولدى.
«نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى نۇرماحان جولداسوۆ ەلدىڭ تالاپ-تىلەگىن ۋاقتىلى ورىنداپ, ۇيلەرىنە گاز كىرگىزۋ جۇمىسىن جانداندىرۋ كەرەكتىگىن جەتكىزدى.
«تۇرعىندار تاراپىنان گاز تۇيتكىلدەرىنە قاتىستى شاعىمدار مەن وتىنىشتەر ءجيى تۇسەدى. ياعني, كەمشىلىك بار دەگەن ءسوز. سوندىقتان ءبارىمىز بىرلەسىپ, «كوگىلدىر وتىن» ماسەلەسىن جەدەل شەشۋىمىز قاجەت. بۇل ماسەلە پارتيا باقىلاۋىندا بولادى. پارتيانىڭ وبلىستىق فيليالىنىڭ توراعاسى, ءوڭىر باسشىسى جانسەيىت قانسەيىت ۇلى جىل ەسەبىندە وسى جۇمىستاردى جالعاستىرۋدى تاپسىردى. الداعى ۋاقىتتا وبلىس اۋماعىن جانە تۇركىستان قالاسىن 100 پايىز گازداندىرۋ باعىتىندا جۇمىستار كۇشەيتىلەدى», – دەدى ن.جولداسوۆ.
