بۇل باستاما «قازاقستانداعى تۋبەركۋلەزدى باقىلاۋ جۇيەسىن رەفورمالاۋ مەن تۋبەركۋلەزدىڭ دارىگە ءتوزىمدى نىساندارىنىڭ مەنەدجمەنتىن كۇشەيتۋ ارقىلى تۋبەركۋلەز اۋىرتپالىعىن تومەندەتۋ» باعدارلاماسى شەڭبەرىندە جيتس-پەن, تۋبەركۋلەزبەن جانە بەزگەكپەن كۇرەسۋ جونىندەگى جاھاندىق قوردىڭ گرانتىنىڭ ارقاسىندا جۇزەگە اسىپ وتىر.
– شەتەلدىك ازاماتتار, ولاردىڭ اراسىنداعى كوپشىلىگى ءبىزدىڭ ەلىمىزدە تۇرۋعا رۇقسات الماعان ەڭبەك ميگرانتتارى انتيرەتروۆيرۋستىق پرەپاراتتاردى (ارۆ) تەگىن الادى. مەديتسينا قىزمەتكەرلەرى جاناما رەاكتسيالار مەنەدجمەنتىن, ەڭ ءتيىمدى ءدارى-دارمەكتەر مەن ەمدەۋ سىزبالارىن تاڭداپ, كەڭەس بەرۋ ءۇشىن ۇدايى كلينيكالىق مونيتورينگ جۇرگىزىپ وتىر. ونىڭ ىشىندە ايتۆ ينفەكتسياسى بار جۇكتى ايەلدەر ەرەكشە باقىلاۋدا, – دەيدى الماتى قالالىق جيتس الدىن الۋ جانە وعان قارسى كۇرەس ورتالىعىنىڭ باس دارىگەرى مارات توكەەۆ.
قالالىق مەديتسينا قىزمەتكەرلەرىنىڭ بۇل باستاماسى ايتۆ-جۇقپاسىنىڭ ستاتيستيكالىق دامۋ دەرەكتەرىنىڭ جاعدايىن كورسەتەدى. مەگاپوليستە تىركەلەتىن جاعدايلاردىڭ تورتتەن ءبىرى – الىس-جاقىن شەتەلدەر مەن قازاقستاننىڭ باسقا قالالارىنان كەلگەن ازاماتتاردىڭ ۇلەسىندە.
تۋبەركۋلەز بەن ايتۆ ادام ءولىم-ءجىتىمىنىڭ باستى سەبەپشىسى بولىپ وتىرعاندىقتان, ايتۆ-ينفەكتسياسىن ەمدەۋدىڭ تيىمدىلىگىن تەجەيتىن كەدەرگىلەردىڭ ءبىرى, ياعني ناۋقاستاردىڭ ارۆ-پرەپاراتتارىن تۇراقتى قابىلداۋعا ق ۇلىقسىزدىعى ماماندارىد الاڭداتىپ وتىر.
الماتى قالالىق جيتس ورتالىعىنىڭ قىزمەتكەرلەرى قوعامدىق ۇكىمەتتىك ەمەس ۇيىمداردىڭ اۋتريچ-قىزمەتكەرلەرىمەن جانە ۆولونتەرلەرىمەن بىرلەسە وتىرىپ, ەڭبەك ميگرانتتارىن قوسا العاندا, حالىقتىڭ نەگىزگى توپتارى اراسىندا ايتۆ-عا جەدەل تەستىلەۋ وتكىزىپ كەلەدى. ياعني كەڭەس بەرەدى, اقپاراتتىق ماتەريالدار تاراتادى, ترەنينگتەر ۇيىمداستىرادى. سونداي-اق ايتۆ-ينفەكتسياسىنىڭ بەرىلۋ جولدارى جانە ودان قورعانۋ شارالارى تۋرالى حابارلايدى. دوستىق كابينەتتەر مەن سەنىم پۋنكتتەرى ارقىلى الدىن الۋ قۇرالدارىن تاراتادى.
ايناش ەسالي,
«ەگەمەن قازاقستان»
الماتى
