وتا اتاۋلىنى ءوزىمىز جاسايمىز – دەيدى وبلىستىق كارديوحيرۋرگيا ورتالىعىنىڭ تاجىريبەلى دارىگەرلەرى
بەيسەنبى, 3 مامىر 2012 7:42
وبلىستىق كارديولوگيالىق ورتالىققا ات باسىن ارنايى تىرەۋىمىزگە پەتروپاۆل قالاسىندا تۇراتىن زەينەتكەر قازي داۋلەتباەۆ قوزعاۋ سالدى. ول بىزبەن حابارلاسىپ, ەلباسىمىز بەن وسىندا ەڭبەك ەتەتىن اق جەلەڭدى ابزال جاندارعا العىسىن جاۋدىرىپ باقتى. «سانالى عۇمىرىمدى سوت سالاسىنا ارناعان جانمىن, قاراعىم! سەكسەننىڭ سەڭگىرىنە كەلسەم دە كوزىم اشىق, كوكىرەگىم وياۋ. ەل جاڭالىقتارىن اركەز قاداعالاپ, وي ەلەگىنەن وتكىزىپ وتىرامىن.
بەيسەنبى, 3 مامىر 2012 7:42
وبلىستىق كارديولوگيالىق ورتالىققا ات باسىن ارنايى تىرەۋىمىزگە پەتروپاۆل قالاسىندا تۇراتىن زەينەتكەر قازي داۋلەتباەۆ قوزعاۋ سالدى. ول بىزبەن حابارلاسىپ, ەلباسىمىز بەن وسىندا ەڭبەك ەتەتىن اق جەلەڭدى ابزال جاندارعا العىسىن جاۋدىرىپ باقتى. «سانالى عۇمىرىمدى سوت سالاسىنا ارناعان جانمىن, قاراعىم! سەكسەننىڭ سەڭگىرىنە كەلسەم دە كوزىم اشىق, كوكىرەگىم وياۋ. ەل جاڭالىقتارىن اركەز قاداعالاپ, وي ەلەگىنەن وتكىزىپ وتىرامىن. پرەزيدەنتتىڭ قاي جولداۋىن الساق تا, دەنى ساۋ ۇلت – جالپىۇلتتىق مىندەت رەتىندە قويىلىپ, مەديتسينا سالاسىن دامىتۋعا بايلانىستى قاداۋ-قاداۋ شارۋالار اتقارىلىپ كەلەدى. دەنساۋلىق ساقتاۋدىڭ بىرەگەي ۇلتتىق جۇيەسى قابىلدانىپ, ەندى, مىنە, قازاقستاندىقتاردىڭ ورتاشا ءومىر ءسۇرۋ جاسىن 72-گە دەيىن جەتكىزۋ مىندەتى قويىلىپ وتىر. جۇرەك-قان تامىرلارى, وبىر, تۋبەركۋلەز سيياقتى اسا قاتەرلى اۋرۋلاردى جەرگىلىكتى جەرلەردە ەمدەي الاتىن كۇنگە دە جەتتىك. ءوڭىمىز تۇگىلى ءتۇسىمىزگە ەنبەيتىن عاجايىپ وزگەرىستەرگە كۋا بولىپ وتىرعانىما شۇكىرشىلىك دەيمىن». قاريانىڭ بۇلايشا شاتتانا, شالقي سويلەۋىنىڭ سىرى جوق ەمەس ەكەن. بىلتىر جۇرەگى سىر بەرىپ, وپەراتسيا ۇستەلىنە جاتۋىنا تۋرا كەلگەن. جاناشىرلار تاراپىنان رەسەيدە, استانادا ەمدەلۋ ءجونىندە ارقيلى ۇسىنىستار ايتىلعانىمەن, قازەكەڭ اتالمىش ەمحانانىڭ دارىگەرلەرىنە سەنىم ارتقان. وتا ويداعىداي جاسالىپ, جاسىنىڭ ۇلعايعانىنا قاراماستان از كۇندە ساۋىعىپ شىققان. اندا-مىندا سابىلىپ, شىعىندانباعان. مۇنداي ريزاشىلىق سوزدەر از ايتىلمايدى.
وسىدان بەس جىل بۇرىن ۇكىمەتتىڭ قاۋلىسىمەن №2 اۋرۋحانا جانىنان 20 توسەكتىك كارديوحيرۋرگيا جانە 6 توسەكتىك جانساقتاۋ ءبولىمشەلەرى اشىلىپ, ماتەريالدىق-تەحنيكالىق بازانى نىعايتۋ, ءبىلىكتى ماماندار دايىنداۋ باعىتتارىندا جان-جاقتى ۇيىمداستىرۋ جۇمىستارى ۇلكەن قارقىنمەن ءجۇردى. مەملەكەت باسشىسىنىڭ تىكەلەي قولداۋىمەن قولعا الىنعان رەسپۋبليكا تۇرعىندارىنا كارديولوگيالىق جانە كارديوحيرۋرگيالىق قىزمەتتى دامىتۋ باعدارلاماسى تىڭ ىسكە ودان ءارى سەرپىن بەرىپ, بولىمشە دەربەس كارديوحيرۋرگيالىق ورتالىققا اينالدىرىلدى. ونىڭ جابدىقتالۋىنا, وزىق مەديتسينالىق قۇرال جابدىقتار مەن دياگنوستيكالىق كەشەندەر ورناتىلۋىنا جارتى ميللياردتاي تەڭگە جۇمسالدى. دارىگەرلەر رەسەي, ليتۆا ەلدەرىندە كاسىبي ءبىلىكتىلىكتەرىن, شەبەرلىكتەرىن جەتىلدىرىپ قايتتى.
– قىزىلجار وڭىرىندە «سالاماتتى قازاقستان-2015» مەملەكەتتىك باعدارلاماسى ويداعىداي ورىندالىپ كەلەدى. تۋبەركۋلەزبەن سىرقاتتانۋشىلار سانى 1,5 ەسە, ءسابيلەردىڭ شەتىنەۋى 21 پايىزعا ازايدى. ونكولوگيالىق جانە ونكوگەماتولوگيالىق اۋرۋلاردىڭ قازىرگى زامانعى حيميالىق تەراپيا ستاندارتتارىن ەنگىزۋ شارالارىن ويلاستىرۋدامىز. بۇعان دەيىن جۇرەك-قان تامىرلارى كەسەلى الدىڭعى ورىندا كەلسە, ەندى سىرقاتتار مەن ءولىمدى 25 پايىزعا ازايتۋ مۇمكىندىگى تۋدى. بۇعان ورتالىقتىڭ تيگىزىپ وتىرعان ىقپالى زور, – دەدى اڭگىمەلەسكەنىمىزدە وبلىستىق دەنساۋلىق ساقتاۋ باسقارماسىنىڭ باستىعى اناتولي كو.
ونىڭ اشىلۋىنا دەنساۋلىق ساقتاۋ مينيسترلىگىنىڭ وكىلدەرى, استاناداعى ۇلتتىق عىلىمي-مەديتسينالىق ورتالىقتىڭ دارىگەر-عالىمدارى قاتىسىپ اقىل-كەڭەستەر بەردى.
بۇل ورايدا ەلباسى ن. نازارباەۆتىڭ تىكەلەي قولداۋىمەن قولعا الىنعان «سالاماتتى قازاقستان» باعدارلاماسى ۇلت دەنساۋلىعىن نىعايتۋعا باعىتتالعان. وسىناۋ ماڭىزى زور مەملەكەتتىك ءىس-شارا اياسىندا قىزىلجار وڭىرىندە دە مەديتسينالىق قىزمەتتىڭ ساپاسى جاقسارىپ كەلەدى.
ءومىر ەسقالي,.
