بولات باقاۋوۆ جاڭا ورىنباسارلاردى وبلىستىق اكىمدىكتە وتكەن جينالىستا تانىستىردى. ول ءوزىنىڭ بۇرىنعى ورىنباسارلارى – جايىق شاراباسوۆ پەن داۋرەن ماقاجانوۆ – باسقا جۇمىسقا اۋىسقانى تۋرالى حابارلادى. ايماق باسشىسى ولارعا بىرلەسكەن جۇمىستارى ءۇشىن العىس ايتىپ, جاڭا قىزمەتتەرىنە تابىس تىلەدى.
ەندىگى جەردە پاۆلودار وبلىسىنىڭ ينۆەستيتسيالار, ونەركاسىپ جانە كاسىپكەرلىك ماسەلەلەرىن قايرات نۇكەنوۆ باقىلايدى. ول بۇعان دەيىن تۇركىستان وبلىسى اكىمىنىڭ ءبىرىنشى ورىنباسارى, ەكىباستۇز جانە اقسۋ قالالارىنىڭ اكىمى بولعان ەدى.
– مەملەكەت باسشىسىنىڭ بىزگە جۇكتەگەن باستى مىندەتتەرىنىڭ ءبىرى – كاسىپكەرلىكتى قولداۋ بولىپ تابىلادى, – دەدى وبلىس اكىمى قايرات نۇكەنوۆكە. – ءسىز قالالار مەن اۋدانداردىڭ اكىمدەرىمەن ينۆەستيتسيالار تارتۋ بويىنشا تىعىز ارەكەتتەسىپ, ءىرى كاسىپورىندارمەن جۇمىستى بەلسەندىرۋىڭىز قاجەت.
ايماقتىڭ اگروونەركاسىپ كەشەنى سالاسىن بۇعان دەيىن «قازاگرو» ۇلتتىق بابسقارۋ حولدينگىنىڭ باسشىسى بولعان رۇستەم قۇرمانوۆ باسقارادى.
– ءبىرىنشى كەزەكتە ءسىز اۋىل شارۋاشىلىعىنا ينۆەستيتسيا تارتۋمەن اينالىسۋىڭىز قاجەت, – دەدى وعان بولات باقاۋوۆ. – بيىلعى جىلى بىزدە بىرنەشە ءىرى جوبا جوسپارلانعان. ولار: سۋارمالى ەگىستىك القاپتارىن ۇلعايتۋ, قىزىلشا وڭدەيتىن زاۋىتتىڭ قۇرىلىسى جانە تاعى باسقالارى. سونىمەن بىرگە, اۋىل شارۋاشىلىعى ونىمدەرىن قايتا وڭدەۋدى ارتتىرۋعا جانە ەكسپورت كولەمىن ۇلعايتۋعا نازار اۋدارۋ قاجەت.
