كونفەرەنتسيا «قازاقستان رەسپۋبليكاسى مەن كورەيا رەسپۋبليكاسى اراسىنداعى ستراتەگيالىق ارىپتەستىكتى دامىتۋدىڭ جاڭا سولتۇستىك ەكونوميكالىق ىنتىماقتاستىعىنىڭ كورىنىسى» دەگەن تاقىرىپ اياسىندا ءوربىدى. اتالمىش كونفەرەنتسياعا قازاقستان مەن وڭتۇستىككورەيالىق عالىمدار مەن ساراپشىلار قاتىستى. وڭتۇستىك كورەيا تاراپىنان بىرقاتار بەلگىلى پروفەسسورلار, سونىڭ ىشىندە ديپلوماتيالىق اكادەميا پروفەسسورى كو نام چجە, ەنسە ۋنيۆەرسيتەتىنىڭ پروفەسسورى كو تۋ سانگ, سىرتقى ىستەر ءمينيسترىنىڭ ەۋرازيا ءبولىمىنىڭ ءبىرىنشى حاتشىسى چە كي چون جانە باسقالارى قاتىستى. قازاقستاندىق تاراپتان ەۋرازيالىق زەرتتەۋ ينستيتۋتىنىڭ اعا عىلىمي قىزمەتكەرى داۋرەن ابەن, قىتايتانۋ ورتالىعىنىڭ جەتەكشىسى جانە قىتايتانۋشى ءادىل قاۋكەنوۆ, «ەلباسى قورىنىڭ جانىنداعى الەمدىك ەكونوميكا جانە ساياسات ينستيتۋتىنىڭ» قىتاي جانە ازياتانۋ باعدارلاماسىنىڭ جەتەكشىسى رۋسلان ءىزىموۆ, «قوعامدىق پىكىر» زەرتتەۋ ينستيتۋتىنىڭ ديرەكتورى بوتاگوز راقىشەۆا بايانداما جاساپ, پىكىر الماسىپ, كورەيلىك تاراپتىڭ سۇراقتارىنا جاۋاپ بەردى. وسى كونفەرەنتسيادا قازاقستان رەسپۋبليكاسىنىڭ وڭتۇستىك كورەياداعى توتەنشە جانە وكىلەتتى ەلشىسى باقىت دۇيسەنباەۆ ءسوز سويلەپ, قازاقستان مەن وڭتۇستىك كورەيا اراسىنداعى ديپلوماتيالىق جانە ساۋدا-ەكونوميكالىق بايلانىستار مەن ىنتىماقتاستىققا كەڭىرەك توقتالدى. كونفەرەنتسياعا قازاقستاندا ديپلوماتيالىق قىزمەتتە بولعان ەكس ەلشى پەك چۋ حەن مەن تانزانيا ەلىندە ەلشى بولعان سون گىم ەن مىرزا مودەراتور بولدى. ەكس-ەلشى پەك چۋ حەن قازاقستان رەسپۋبليكاسىنىڭ حالىقارالىق دەڭگەيدەگى بەدەلىنە توقتالا كەلىپ, مەملەكەتىمىزدىڭ جۇرگىزىپ وتىرعان قوعامدىق كەلىسىم جانە ۇلتارالىق تاتۋلىق ساياساتىنا ۇلكەن باعا بەردى. ءتىپتى مەملەكەت باسشىسىنىڭ وسى جۇرگىزىپ وتىرعان ساياساتى حالىقارالىق قاۋىمداستىق پەن بۇۇ-دا زور باعاعا يە بولىپ, پان گي مۋن بۇۇ باس حاتشىسى بولعان جىلدارى قازاقستان ساياساتىنىڭ وسى مودەلىن ناسيحاتتاۋ باعىتىندا جۇمىستار جاسالعاندىعىن اتاپ ءوتتى. ايگىلى ديپلومات پرەزيدەنتىمىزدىڭ ساياساتىنا قاتتى قىزىعۋشىلىق تانىتقانىن جاسىرمادى. وسى رەتتە ن.ءا.نازارباەۆتىڭ كوشباسشىلىق ءرولى مەن مىندەتىن, ىشكى جانە سىرتقى ساياساتتا تەپە-تەڭدىكتى ساقتاپ, الپاۋىتتار اراسىندا مايدان قىلشىق سۋىرعانداي سۇڭعىلا ساياسات جۇرگىزىپ, تمد ەلدەرىنىڭ ىشىندە ەرەكشە بەلسەندىلىك تانىتىپ, قازاقستاننىڭ بەدەلىن حالىقارالىق ارەنادا كوتەرگەن باسشى رەتىندە جوعارى باعالايتىنىن ايتتى.
كونفەرەنتسيا بارىسىندا كورەي عالىمدارى قازاقستاننىڭ دامۋى مەن وڭتۇستىك كورەيامەن ستراتەگيالىق ارىپتەستىگىنىڭ باعىتتارىنا توقتالدى. الەۋمەتتىك ەكونوميكا سالاسىنىڭ مامانى, عالىم لي سان چجۋن قازاقستاننىڭ «نۇرلى جول» باعدارلاماسىنىڭ وڭ ناتيجە بەرگەندىگىن, وسى باعدارلامادان كەيىن كەلەسىدە قانداي باعدارلاما شىعاتىنىنا قىزىعۋشىلىق تانىتتى. كورەيا مەن قازاقستان بيزنەسى ىنتىماقتاستىعىنا قاتىستى داۋرەن ابەن «كورەيلىك كاسىپكەرلەر قازاقستاندىق كورەيلەرمەن عانا ىنتىماقتاستىق جاساماي, قازاق كومپانيالارىمەن دە ارىپتەستىكتى كەڭ كولەمدە جۇزەگە اسىرىپ, ارىپتەستىك اياسىن ءارتاراپتاندىرۋ كەرەكتىگىنە» باسا نازار اۋدارتتى. كورەي عالىمدارى مەن قازاق عالىمدارىنىڭ اراسىندا وڭتۇستىك كورەيانىڭ شانحاي ىنتىماقتاستىق ۇيىمىنا كىرۋ, كىرمەۋى تۋرالى دا ءسوز بولدى. تاراپتاردىڭ ويىنشا ول ۋاقىت ەنشىسىندەگى ماسەلە. جالپى, وڭتۇستىك كورەيا ەلىنىڭ ءبىر كەزدە «ازياداعى ءوزارا ىقپالداستىق جانە سەنىم شارالارى جونىندەگى كەڭەسكە» كىرۋگە نيەتى بولعاندىعى ايتىلدى. قازىرگى تاڭدا ول نيەت ءۇندىستاننىڭ مۇشە بولۋىنا بايلانىستى باسەڭسىپ, وڭتۇستىككورەيالىق ديپلوماتتاردى ءارتۇرلى ويعا قالدىرىپ وتىرعاندىعى جاسىرىن ەمەستىگى ءسوز بولدى. الايدا كەيىنگى جىلدارى ەكى ەل اراسىنداعى قارىم-قاتىناستىڭ بۇرىنعىعا قاراعاندا سايابىرسىپ قالعاندىعىن, ساۋدا-ەكونوميكالىق كورسەتكىشتەر جوعارعى دەڭگەيدە بولسا دا, بۇل مەجەنى توقمەيىلسىپ, مىسە تۇتىپ قالماۋ كەرەك دەگەن عالىمداردىڭ پىكىرلەرى ەستىلدى. قازىرگى ستراتەگيالىق قارىم-قاتىناستى ودان ءارى جەتىلدىرىپ, جانداندىرىپ وتىرۋ كەرەكتىگى, ونىڭ ماڭىزدىلىعى مەن ومىرشەڭدىگى تۋرالى وي قوزعالدى. وتىرىستا ەكى ەل اراسىندا الداعى ۋاقىتتا ىسكەرلىك كەڭەس قۇرىپ, وعان ەلدەرىمىزدىڭ بىلىكتى ماماندارىن, كورەيتانۋشى, ورتالىق ازياتانۋشى زەرتتەۋشىلەردى, ءتۇرلى سالانىڭ ساراپشىلارىن تارتۋ قاجەتتىگى باسا ايتىلدى.
داستان اقاش,
ارنايى «Egemen Qazaqstan» ءۇشىن
وڭتۇستىك كورەيا,
سەۋل قالاسى
