وسىدان شامالى ۋاقىت بۇرىن كاسىپكەر قۇسمان شالاباەۆ وسى كارتينانىڭ جالعاسىن قازىرگى زامانعا لايىقتاپ ءتۇسىرۋ يدەياسىن كوتەرگەن ەدى. كوپ ۇزاماي ايگىلى كينونىڭ جەلىسىمەن تۇسىرىلگەن «تايلاقتىڭ تاقياسى» اتتى جاڭا فيلم دايىن بولدى. جاقىندا سۋ جاڭا كومەديانىڭ تۇساۋكەسەرى تالدىقورعان قالاسىندا ءوتىپ, كورەرمەنمەن قاۋىشتى.كينو جەلىسى بايىرعى وقيعامەن ساباقتاس ءورىلىپ, «تاقيالى پەرىشتە» تايلاقتىڭ قارتتىق شاعىنداعى ءومىرىن بەينەلەيدى. بۇل جولى تايلاق سۇربويداققا اينالا باستاعان سۇيىكتى نەمەرەسىنە لايىقتى قىز ىزدەپ, جولعا شىعادى. كورەرمەنگە كوز تانىس تاقيالى تايلاق اقساقالدىڭ ارەكەتى بۇگىنگى زاماننىڭ بولمىسىن ءاجۋا مەن استارلى اقيقاتقا سىيعىزىپ, اتا-انا مەن بالا, جاس بۋىن اراسىنداعى ادامگەرشىلىك قۇندىلىقتاردى باعالاۋ سياقتى قاسيەتتەردى سيپاتتايدى.
ءفيلمنىڭ باستى ءرولىن ادىلعازى رايىمبەكوۆ سومدايدى. شاكەن ايمانوۆتىڭ «تاقيالى پەرىشتەسىندە» تايلاق بولىپ ويناعان جاس اكتەر قازىر قادىرمەندى قاريا. تالدىقورعان قالاسىندا تۇرادى. رەجيسسەرلەر بۇل جولى دا «تايلاقتىڭ تاقياسى» ءفيلمىن حالىق سۇيىكتىسىنە اينالعان اكتەردى جاس ۇرپاققا جاڭا قىرىنان تانىتۋدى ماقسات تۇتىپتى.
– بۇل فيلمدە «تاقيالى پەرىشتە» فيلمىندەگى جاس تايلاق, بۇگىندە سەكسەننەن اسقان الىمعازى اقساقالدىڭ قازىرگى بەينەسىن ەل-جۇرتىمەن قايتا قاۋىشتىردىق. بيىل سول ايگىلى كينودا باس كەيىپكەردى سومداعان ءبىرتۋار اكتريسا, قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى ءامينا ومىرزاقوۆا اپامىزدىڭ 100 جىلدىعى يۋنەسكو شەڭبەرىندە تويلانباقشى. ءبىر جاعى جاڭا كارتينا ايگىلى اكتريسانىڭ ونەرىنە دەگەن قۇرمەتتىڭ ايعاعى بولسىن دەدىك, - دەيدى يدەيا اۆتورى جانە ءفيلمنىڭ باس پروديۋسەرى قۇسمان شالاباەۆ.
«تايلاقتىڭ تاقياسىنا» الىمعازى رايىمبەكوۆپەن قاتارقازاقستاننىڭ حالىق ءارتىسى روزا اشىربەكوۆا مەن قازاقستاننىڭ ەڭبەك سىڭىرگەن قايراتكەرى شىنار جانىسبەكوۆا باستى رولگە تۇسكەن ەكەن. كينو اۆتورلارى تۋىندىلارىمەن كانن فەستيۆالىندە باق سىناۋعا بەل بۋىپتى.
قالماحانبەت مۇقامەتقالي,
«Egemen Qazaqstan»
الماتى وبلىسى
