جالپى ءبىلىم بەرەتىن پاندەر بويىنشا قر ءبىلىم جانە عىلىم مينيسترلىگىنىڭ قولداۋىمەن «دارىن» رەسپۋبليكالىق عىلىمي-پراكتيكالىق ورتالىعى وتكىزگەن بايقاۋ جيىرما جىل قاتارىنان جالعاسىن تاۋىپ كەلەدى. بيىلعى جىلعى بايقاۋ بارىسىندا عىلىمي جوبالاردى قورعاۋدىڭ اشىقتىعى بارىنشا قامتاماسىز ەتىلىپ, سەكتسيالار جۇمىسى ونلاين-رەجيمدە ءوتتى. وسىعان وراي اتالعان مينيسترلىك جانە «دارىن» ورتالىعىنىڭ الەۋمەتتىك جەلىلەردەگى اككاۋنتتارىنداعى بەينە-كورسەتىلىمدەر 18 سەكتسيا بويىنشا 131 891 رەت قارالدى.
عىلىمي زەرتتەۋلەر بايقاۋىنىڭ اشىلۋ سالتاناتىندا ءسوز سويلەگەن قر بعم ۆيتسە-ءمينيسترى ەلميرا سۋحانبەرديەۆا رەسپۋبليكا وڭىرلەرىنەن جينالعان تالانتتى بالالاردىڭ سانى جىلدان-جىلعا ارتىپ كەلە جاتقاندىعىنا قۋانىشىن ءبىلدىرىپ, بۇل بايقاۋدىڭ ءادىل دەڭگەيدە وتەتىندىگىنە سەنىم ارتقان-دى. ءارى بۇدان بۇرىنعى ايتىلعان كەمشىلىكتەردى بولدىرماس ءۇشىن بايقاۋدىڭ ونلاين رەجيمدە قاداعالاناتىندىعىن اتاپ وتكەن بولاتىن. بايقاۋ بارىسىندا فيزيكا-ماتەماتيكا عىلىمىنىڭ دوكتورى, پروفەسسور, ۇعا اكادەميگى مۇحتارباي وتەلباەۆ بارلىق قاتىسۋشىلار ءۇشىن بايقاۋعا قاتىسۋدىڭ ءوزى جوعارى مارتەبە ەكەنىن ءارى بۇگىنگى جاستار وتاندىق عىلىمنىڭ كەلەشەگى, دەپ اتاپ وتسە, تاريحي ەسكەرتكىشتەر مەن تۋريستىك باعىتتار بويىنشا جوبانىڭ جەتەكشىسى تاريح عىلىمدارىنىڭ دوكتورى, پروفەسسور جاكەن تايماعامبەتوۆ «رەسپۋبليكانىڭ ءار وڭىرىنەن كەلگەن, وزىق جەتىستىكتەرى بار وقۋشىلار ءۇشىن ۇلكەن الاڭدا سايىسۋ ارينە وڭاي ەمەس. دەگەنمەن دە قازىلار القاسى ءادىل باعاسىن ايتۋعا كۇش سالدى»,- دەدى ءوز سوزىندە.
وقۋشىلاردىڭ عىلىمعا دەگەن قىزىعۋشىلىعىن ارتتىرۋ ماقساتىندا «عىلىمي-تەحنيكالىق پروگرەسس – ەكونوميكالىق ءوسۋدىڭ نەگىزگى بۋىنى», «ەكونوميكالىق جانە الەۋمەتتىك پروتسەستەردى ماتەماتيكالىق مودەلدەۋ», «تازا تابيعي ورتا – قازاقستان - 2050 ستراتەگياسىن ىسكە اسىرۋدىڭ نەگىزى», «قازاقستاننىڭ تاريحي ەسكەرتكىشتەرى جانە بولاشاق دامۋى بار ساياحات باعدارلارى» سياقتى ءتورت باعىتتا وتكەن ءبىلىم دوداسىندا جەڭىمپازداردى انىقتاۋعا وتاندىق جوعارى وقۋ ورىندارىنىڭ پەداگوگ-عالىمدارى اتسالىستى.
كونكۋرستىڭ قورىتىندى كەزەڭىنە وراي رەسپۋبليكانىڭ بارلىق وڭىرلەرىنەن ۇزدىك دەپ تابىلعان 625 جوبا ۇسىنىلىپ, 811 دارىندى وقۋشىلار ىرىكتەلدى. وسىلايشا ۇزدىك وقۋشىلار باق سىناسىپ, 773 جاس زەرتتەۋشى 601 عىلىمي جوبالارىن قورعادى.
كونكۋرستىڭ «ۇزدىك كوماندا» اتاعى جانە گران-پري يەگەرى نازارباەۆ زياتەركەرلەر مەكتەپتەرىنىڭ كومانداسىنا بەرىلدى. ال كوماندالىق ءبىرىنشى ورىندى الماتى قالاسى, ەكىنشى ورىندى پاۆلودار وبلىسى يەلەنسە, ءۇشىنشى ورىندى جامبىل جانە شىعىس قازاقستان وبلىستارى ءبولىستى. قر ءبىلىم جانە عىلىم مينيسترلىگىنىڭ I دارەجەلى ديپلومدارى جانە التىن مەدالدارمەن 49 جوبانى دايىنداعان 60 جەڭىمپاز, ءىى دارەجەلى ديپلومدارى جانە كۇمىس مەدالدارمەن 79 جوبا بويىنشا 103 جۇلدەگەر, ءىىى دارەجەلى ديپلومدارى جانە قولا مەدالدارمەن 130 جوبا بويىنشا 176 جۇلدەگەر ماراپاتتالدى.
كونكۋرس قورىتىندىسى بويىنشا جەڭىمپازدار ەلىمىزدىڭ قۇراما كومانداسى قاتارىندا 12-17 مامىر ارالىعىندا فەنيكس قالاسىندا - اريزونا شتاتىندا جىل سايىن وتەتىن «Intel ISEF-2019» وقۋشىلاردىڭ حالىقارالىق عىلىمي جوبالار كونكۋرسىندا ءوز جۇمىستارىن ۇسىناتىن بولادى.
كونكۋرستىڭ جەڭىمپازدارى مەن جۇلدەگەرلەرىنىڭ ءتىزىمىن https://daryn.kz/olympiads/view/4/2904 cىلتەمەسى ارقىلى كورۋگە بولادى.
ەلۆيرا سەرىكقىزى,
«ەگەمەن قازاقستان»
الماتى
