اقتاۋ, اقتوبە جانە اتىراۋ گارنيزونىڭ اسكەري قىزمەتشىلەرى اۋعان سوعىسىندا قازا بولعانداردىڭ ەسكەرتكىشتەرىنە گۇل شوقتارىن قويۋ راسىمدەرى مەن سالتاناتتى ميتينگتەرگە قاتىستى.
بەينەۋدەگى سالتاناتتى ءىس-شارالاردىڭ اياقتالۋىمەن اۋعان سوعىسىنىڭ 25 ارداگەرى 99116 اسكەري ءبولىمىنىڭ «بەكەت اتا» وقۋ پوليگونىنا بەت بۇرىپ, اسكەري ءبولىمنىڭ ومىرلىك تىنىسىمەن تانىستى, ساربازدارمەن سۇحبات جاساپ, اسكەري اسحانادان اۋىز ءتيدى.
ال, اقتوبە قالاسىندا ورنالاسقان س.جيەنباەۆ اتىنداعى كىتاپحانادا ينتەرناتسيوناليست جاۋىنگەرلەر 30238 اسكەري ءبولىمىنىڭ ساربازدارى مەن № 16 ورتا مەكتەپتىڭ «بۇركىت» اسكەري-پاتريوتتىق كلۋبىنىڭ تالىمگەرلەرىمەن كەزدەسۋ وتكىزدى. ارداگەرلەر ولارعا وزدەرىنىڭ جاۋىنگەرلىك جولى تۋرالى, سوعىس قيىندىقتارى مەن ەرلىك, باتىلدىق ۇلگىلەرى تۋرالى اڭگىمە ايتىپ بەردى.
قازىرگى تاڭدا قازاقستان رەسپۋبليكاسىنىڭ قارۋلى كۇشتەرىندە سول سۇراپىل سوعىستىڭ كۋاگەرى بولعان ءبىراز اسكەري قىزمەتشىلەر قىزمەت ەتۋدە, ولاردىڭ باسىم بولىگى باسشىلىق قۇرامىندا.
گۇلايىم شىنتەمىرقىزى,
«Egemen Qazagstan»
ماڭعىستاۋ وبلىسى
