دارىگەرلەردەن مۇنداي توسىن سىيدى كۇتپەگەن بالالار العاشىندا: «حيميا تەراپيا تاعى بولا ما؟», «ينە قاشان؟» دەگەن ۇرەيمەن قارسى العان. ال دارىگەرلەر كىشكەنتاي ەمدەلۋشىلەردى اۋرۋدىڭ الدىندا كۇرەسكەر بولۋعا شاقىرىپ, سوندا عانا ونى جەڭۋگە بولاتىنىن ەرەكشە ارەكەتپەن ءتۇسىندىردى. وسى جولدا دارىگەردى دوس دەپ قابىلداۋعا ۇگىتتەدى.
دەنساۋلىق ساقتاۋ مينيسترلىگىنىڭ مالىمەتىنشە, جىل سايىن شامامەن 600 بالادا وبىر اۋرۋىنىڭ دياگنوزى انىقتالادى ەكەن. بالالارعا بۇل قيىندىقتى جەڭۋگە ادەتتە اتا-انالارى مەن دارىگەرلەر كومەكتەسەدى. بۇل جولى ەرىكتىلەر دە قولداۋدان تىس قالمادى. جوعارىدا اتالعان كوڭىلدى بي «Help Today» قوعامدىق قورى ۆولونتەرلەرىنىڭ كومەگىمەن جۇزەگە اسىرىلعان. قور ديرەكتورى ەلميرا اليەۆا: «بۇل بالالارعا مەرەكە بولدى. العاشىندا ولار ءبيشى-دارىگەرلەردى كورىپ, قايران قالدى. بالالار دارىگەرلەردى ۇنەمى ينەسىمەن, ءتۇرلى قورقىنىشتى قۇرالدارىمەن كورەتىندىكتەن, ولارعا ۇركىپ قارايدى. بىراق بۇل جولى باسقاشا بولدى. بالالار دارىگەرلەرمەن بىرگە بيلەدى», دەيدى.
قور دەنساۋلىق سالاسىنا قاتىستى يگى ىستەرمەن اينالىسادى. ونداعى ۇجىم, بۇدان بولەك, قاتەرلى ىسىكپەن اۋىراتىن بالالاردى قولداۋ رەتىندە «مەن – جەڭىمپاز» جوباسىن ۇيىمداستىرىپتى. ول جوبادا ەرتە جاستا وسىنداي دەرتكە شالدىعىپ, ونى جەڭىپ شىققان ناقتى كەيىپكەرلەر تۋرالى بەينەروليكتەر جاسالعان. «بۇل بالالار مەن ولاردىڭ اتا-اناسىنا ساۋىعىپ كەتۋگە سەنىم سىيلاۋدى كوزدەيدى. ماسەلەن, ءبىر بەينەروليكتەگى ابدۋللام الين قازىر 20 جاستا. ول قاتەرلى ىسىكتى ومىرىندە 2 رەت جەڭگەن. 3 جانە 5 جاسىندا پەدياتريا جانە بالالار حيرۋرگياسى عىلىمي ورتالىعىندا كۇردەلى ەم العان. كەيىپكەرىمىز بۇگىندە جوو-دا وقيدى, سپورتپەن شۇعىلدانادى ءارى وزگە ەمدەلۋشىلەردى جەڭىسكە جەتۋگە يتەرمەلەيدى», دەيدى ە.اليەۆا.
دارىگەرلەردىڭ كوڭىلدى ءبيى تۇسىرىلگەن ۆيدەونى ەلميرا الەۋمەتتىك جەلىدەگى پاراقشاسىنا جاريالاعان. وندا بالالاردىڭ ءبىر ءسات اۋرۋىن ۇمىتىپ, شاتتىققا بولەنگەنىن كورۋگە بولادى.
ايدانا شوتبايقىزى,
«Egemen Qazaqstan»
