Olympic.kz سايتىنا سۇحبات بەرگەن باس باپكەر قازاق سپورتىنداعى وتكەن جىلعى وزگەرىستەردىڭ ءوز جەمىسىن بەرىپ جاتقانىن ايتىپ, وليمپيادا الدىنداعى جوسپارلارمەن ءبولىستى.
«ارينە, جاڭا جۇيە قولدانىسقا ەنگەن سوڭ, ازداعان قيىنشىلىقتار كەزدەستى. بۇل تابيعي پروتسەسس. بىراق قازىر ءبىزدىڭ سپورتتا ايتارلىقتاي وزگەرىس بارى بايقالادى. قازىرگى ساتتە قانداي دا ءبىر پروبلەما جوق, ءبارى ىڭعايلى. جۇمىس بارىسىندا قاجەتتى جايتتاردىڭ بارلىعى دەر كەزىندە شەشىمىن تابادى», - دەيدى كرۋگلىحينا.
«موگۋلدان كوماندا الدىنداعى باستى مىندەت – وليمپيادا ويىندارىنا ەرلەر قۇرامىن تولىق اپارۋ. تورتجىلدىق دوداسىنا ءار كوماندادان 4 ايەل مەن 4 ەر ادام قاتىسۋىنا مۇمكىندىك بار. ءبىز قىزدار سانىن دا كوبەيتۋگە تىرىسامىز. بۇگىندە ۇلتتىق قۇراماعا ىرىكتەۋ جۇرگىزىلىپ جاتىر. ال ەرلەر كومانداسى تولىعىمەن جاساقتالدى, سوندىقتان, ليتسەنزيا سانىن تورتكە جەتكىزەمىز دەگەن ءۇمىت باسىم. ەلىمىزدەگى ەڭ مىقتى دەگەن سپورتشىلاردى الەم كۋبوگى كەزەڭدەرى مەن الەم چەمپيوناتىنا قاتىستىرۋدامىز», - دەيدى باس باپكەر.
سونداي-اق, بەلگىلى مامان الەم چەمپيوناتىنداعى ەستە قالارلىق جايتتاردى دا اتاپ ءوتتى.
«الەم چەمپيوناتىنا ءبىز قارقىندى دايىندىق جۇرگىزدىك. بىلتىرعى مامىردان باستاپ كوماندا قۇرامىن جاساقتاي باستادى. ءبىز الەم جانكۇيەرلەرىنە كوماندا كوشباسشىلارىنان بولەك, تالانتتى جاس دارىندارىمىز بارىن دا كورسەتكىمىز كەلدى. مۇنىڭ ءبارى گالىشەۆا, كولماكوۆا جانە رەيحەردتىڭ الاڭسىز سىنعا ءتۇسۋى ءۇشىن جاسالدى. وسىلايشا, ءبىز الەمدىك موگۋلدان الار ۇلەسىمىز بار ەكەنىن دالەلدەدىك», - دەدى كرۋگلىحينا.
