16 اقپان, سەنبى كۇنى وبلىس اكىمى بەردىبەك ساپارباەۆ جۇمىس ساپارى كەزىندە جاڭا ورتالىقتا بولدى.
ءوڭىر باسشىسى جەتىم جانە اتا-انا قامقورىنسىز قالعان بالالاردىڭ اتالمىش مەكەمەدەگى تۇرمىسىمەن جانە تاربيەسىمەن تانىستى, ورتالىقتىڭ باسشىلىعىمەن, پەداگوگيكالىق ۇجىمىمەن جانە تاربيەلەنۋشىلەرىمەن كەزدەستى.
«بالالار – قازاقستاننىڭ بولاشاعى, سوندىقتان بىزدەر – ەرەسەكتەر سىزدەردىڭ لايىقتى تاربيە الىپ, دامۋلارىڭىز ءۇشىن ءبارىن جاساۋىمىز قاجەت. ءبىزدىڭ وبلىستا بارلىق ءتيىستى شارالار قابىلدانىپ جاتىر. 2018 جىل باقىتتى بالالىق جىلى بولىپ جاريالانعان بولاتىن. سىزدەر اتا-اناسىز قالعاندىرىڭىز ءۇشىن كىنالى ەمەسسىزدەر. بىراق سىزدەر قۇرداستارىڭىز سەكىلدى جاقسى ءبىلىم مەن تاربيە الۋلارىڭىز كەرەك. ساباقتى جاقسى وقىپ, سپورتپەن, ونەرمەن اينالىسىپ, ءتارتىپتى بولساڭىزدار, مىندەتتى تۇردە ومىردە ءوز ورىندارىڭىزدى تاۋىپ, قازاقستاننىڭ لايىقتى ازاماتى بولاسىزدار. ءبىزدىڭ مىندەتىمىز – سىزدەرگە بارلىق جاعدايدى جاساۋ. كەلەشەكتە ەشبىر بالا مەملەكەت قامقورىنسىز جانە قولداۋىنسىز قالماۋى كەرەك. ەلباسىنىڭ الەۋمەتتىك ساياساتى سوعان باعىتتالعان»,- دەدى ول ورتالىق تاربيەلەنۋشىلەرىمەن اڭگىمە كەزىندە.
وبلىس اكىمى مەكەمەگە سپورتپەن جاتتىعۋ قۇرىلعىسىن تارتۋ ەتىپ, بالالارعا سىيلىقتار مەن تاتتىلەر بەردى.
ورتالىقتا بالالاردى تاربيەلەۋگە جانە وقىتۋعا, بوس ۋاقىتتارى مەن دەمالىسىن ۇيىمداستىرۋعا, مەديتسينالىق, پسيحولوگيالىق قولداۋ كورسەتۋگە قاجەتتى جاعدايلار جاسالعان. ۇستازدار مەن پسيحولوگتار بالالارعا ماماندىق تاڭداۋعا, ءوز بەتىمەن ءومىر سۇرۋگە كومەكتەسەدى. ورتالىققا 3-18 جاس ارالىعىنداعى بالالار قابىلدانادى. بۇگىنگى تاڭدا مۇندا 33 تاربيەلەنۋشى تۇرادى.
