قالا كوشەلەرىنىڭ ءبىرى. اسقار كەتىپ بارا جاتىر. ادەمى كيىنگەن. كوڭىل كۇيى قالىپتى. بىراق اسىعىس. جان-جاعىنداعى ادامدارعا ءمان بەرىپ قارامايدى. بىرىنەن سوڭ بىرىنەن وزىپ كەلەدى.
ەكىنشى ايالدامادان وتكەندە ءجۇرىسى وعاشتاۋ قىز بالانى قۋىپ جەتتى. شالبارىنىڭ ىشقىرى تۇسىڭكى, ۇستىندەگى كيىمى كىر. ءبىر جاعىنا قاراي قيسايىپ, اياعىن سىلتىپ باسىپ بارادى. اسقار وزا بەرە قىزعا ەرىكسىز نازارىن اۋداردى. تومەن قاراپ بارا جاتقان قىزدىڭ جۇزىنەن اقىل-ەسى كەم ەكەنىن بايقادى. دەنەسى تىتىركەنىپ كەتتى. تەز-تەز باسقان كۇيى, الدىنا قاراپ ءجۇرىپ كەتتى. كوڭىلىن كىربىڭ شالعانداي. بىراق ارتىنا بۇرىلىپ قاراعان جوق. تەلەفونىنا ءبىر كوز سالىپ قويىپ, جۇرە بەردى.
ءبىر مەزگىلدە اسقار تۋرا ارتىنان سىلتىپ باسقان اياق الىستى ەستىگەندەي بولدى. بىراق جالت بۇرىلىپ ارتىنا قاراۋدى ويلاعان دا جوق. ىلە-شالا الگى اياق الىس تۋرا جانىنان ەستىلدى. اۋرۋ قىز ك ۇلىپ, اسقاردان وزىپ بارا جاتىر ەكەن. اسقاردىڭ ءجۇرىسى باياۋلاپ, قىز وزا بەرگەندە ءبىرجولا توقتاپ قالدى. ءارى تاڭعالعان, ءارى شوشىعان كۇيدە قازديدى دا قالدى. بىراۋىق قىزدىڭ سوڭىنان قاراپ تۇردى دا, جولدىڭ كەلەسى بەتىنە شىعىپ, ءارى قاراي ءجۇرىپ كەتتى. الايدا, ارتىنا قاراماستان ءماز بولىپ كەتىپ بارا جاتقان قىزعا كوزى تۇسە بەردى. ۇزىن كوشە تاۋسىلار ەمەس.
اسقاردىڭ كوڭىلى الەم-تاپىرىق بولدى. ءبىر كەزدە كۇرت شەشىم قابىلدادى دا, جولدىڭ قىز كەتىپ بارا جاتقان بەتىنە قايتا ءوتىپ, ادىمداي باسىپ, قىزدان وزىپ كەتتى. اسقار وزىپ بارا جاتقاندا قىز اۋزى قيسايىپ, داۋسى دۇرىس شىقپاي, بۋلىعىپ ك ۇلىپ ءماز بولدى. اسقار دا جىميدى. بىراق قىزدىڭ بەتىنە تۋرا قاراۋعا جۇرەگى داۋالامادى.
اسقار ءجۇرىسىن باياۋلاتتى. قىز ءبىر اياعىمەن جەردى سىزىپ-سىزىپ كەتەتىن جۇرىسىمەن ەنتىگىپ, اسقاردان وزىپ كەتىپ تاعى كۇلدى. كۇلكىسى مۇرنى ءبىتىپ قالعان ادامدىكىندەي. اسقار جانە ءبىر رەت وزدى. ءسويتىپ قىزعا وزۋعا تاعى ءبىر مۇمكىندىك بەردى. قىز وزىپ كەتكەن سوڭ ورنىندا تۇرىپ قالدى دا, قىزعا ء«اي» دەپ ايقايلاپ بەلگى بەرەدى. قىز قاراعان جوق. اسقار ىسقىردى. قىز ەندى قارادى. ك ۇلىمسىرەي قارادى. اسقار قولىن بۇلعاپ, مەن بىلاي جۇرەمىن دەگەندەي وڭ جاقتى نۇسقادى. قىز كوڭىلى تۇسكەندەي بولدى. سودان سوڭ قولىن بۇلعاپ جىميدى.
اسقار شولاق كوشەمەن بۇرىلدى دا, ءۇيدى اينالىپ تاسادا تۇرىپ قالدى. جىلارمان كۇيدە تۇر. قىزدى ايادى. ءارى ونىڭ كۇلگەنىنە قۋانعان سياقتى. تۇسىنىكسىز حال. ءومىردىڭ بايانسىزدىعىنا كوز جەتكەندەي سەزىم.
قىز اسقار كەتكەن جاققا قاراپ تۇر.
ارمان المەنبەت
