ايماقتار • 07 اقپان، 2019

ورالدا زەينەتكەر ايەلدى توناعان قىلمىسكەر ۇستالدى

235 رەتكورسەتىلدى

4 اقپان كۇنى كەشكى ساعات 5-تەن وتە ورال قالاسى گاگارين كوشەسىندەگى 99-ءۇيدىڭ اۋلاسىندا قىلمىس بولدى. تەپسە تەمىر ۇزەتىن جاس جىگىت اۋلادا، ەسىك الدىندا دەمالىپ وتىرعان زەينەتكەر ايەلگە قول جۇمساپ، ۇرىپ قۇلاتىپ، قالتاسىنان «Homtom HT16» ماركالى ۇيالى تەلەفونىن الىپ كەتكەن.

1945 جىلى تۋعان قورعانسىز ايەلگە قارسى جاسالعان وسى قىلمىس اۋلادا ورناتىلعان بەينەباقىلاۋ كامەراسىنا باستان اياق جازىلىپ قالىپتى.

بەتى-دەنەسى كوگەرىپ-ءىسىپ، دەنە جاراقاتىن العان جابىرلەنۋشىنى پوليتسيا قىزمەتكەرلەرى ورال قالالىق كوپبەيىندى اۋرۋحانانىڭ جاراقات بولىمىنە جەتكىزىپ، وعان العاشقى مەديتسينالىق جاردەم كورسەتىلگەن. «ول امبۋلاتوريالىق ەم-دوم الادى»، - دەپ حابارلادى جەرگىلىكتى دەنساۋلىق ساقتاۋ باسقارماسىنىڭ ءباسپاسوز قىزمەتى.

«جەدەل-ىزدەستىرۋ ءىس-شارالارى ناتيجەسىندە ورال قالاسى پب پاترۋلدىك-پوليتسياسى باتالونىنىڭ قىزمەتكەرلەرى وسى قىلمىستى جاساعان ءۇشىن 1981 جىلى تۋعان كۇدىكتىنى انىقتاپ، ۇستادى. كۇدىكتى ۋاقىتشا ۇستاۋ يزولياتورىنا قاماۋعا الىندى. اتالعان فاكتى بويىنشا قىلمىستىق كودەكستىڭ 191-بابى 2-بولىمىنە (توناۋ) سايكەس سوتقا دەيىنگى تەرگەۋ جۇرگىزىلۋدە» دەپ حابارلادى بقو پوليتسيا دەپارتامەنتى ءباسپاسوز قىزمەتىنىڭ وكىلى ءاليا ناۋرىزعاليەۆا.

2018 جىلى ورال قالاسىنداعى بەينەباقىلاۋ كامەرالارى ارقىلى 16 104 زاڭبۇزۋشىلىق انىقتالعان بولاتىن.

قازبەك قۇتتىمۇرات ۇلى،

«ەگەمەن قازاقستان»

باتىس قازاقستان

سوڭعى جاڭالىقتار

ۇقساس جاڭالىقتار