زياتكەرلىك ارميا جاساقتالادى
سەيسەنبى, 2 قازان 2012 7:05
اسكەري قىزمەت وتكەرۋ – وتان-انا الدىنداعى ابىرويلى بورىش. كوكتە كوك بايراعىمىزدى جەلبىرەتىپ, تاۋەلسىزدىگىمىزدى قورعاۋ ءۇشىن, ەڭ الدىمەن, ايبىنى اسقاقتاعان ارميا قاجەت. كاسىبي شەبەرلىگى جوعارى, رۋحى مىعىم, جىگەرلى اسكەر عانا ەلىنىڭ سەنىمىن اقتاپ, جەرىنىڭ تىنىشتىعىن ساقتاي الادى.
سەيسەنبى, 2 قازان 2012 7:05
اسكەري قىزمەت وتكەرۋ – وتان-انا الدىنداعى ابىرويلى بورىش. كوكتە كوك بايراعىمىزدى جەلبىرەتىپ, تاۋەلسىزدىگىمىزدى قورعاۋ ءۇشىن, ەڭ الدىمەن, ايبىنى اسقاقتاعان ارميا قاجەت. كاسىبي شەبەرلىگى جوعارى, رۋحى مىعىم, جىگەرلى اسكەر عانا ەلىنىڭ سەنىمىن اقتاپ, جەرىنىڭ تىنىشتىعىن ساقتاي الادى.
ەلباسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆتىڭ «قازىرگى الەمدە سانى كوپ ارميالاردىڭ قاجەتى شامالى. ىڭعايلى, ۇتقىر, جاقسى جابدىقتالعان, ازىرلىگى مول ارميا كەرەك. ارميا حالقىمىز ماقتاناتىنداي بولسىن. ارميامىزدىڭ بەدەلىن ارتتىرا تۇسەيىك», دەگەن ءسوزى قاي ۋاقىتتا دا وزەكتىلىگىن جوعالتپاق ەمەس.
قازاقستان رەسپۋبليكاسىنىڭ قورعانىس ءمينيسترى ادىلبەك جاقسىبەكوۆتىڭ نۇسقاۋىمەن ەگەمەن ەلىمىزدىڭ قورعانىسىن ارتتىرۋدا ەلەۋلى جۇمىستار اتقارىلۋدا. سونىڭ بىرەگەيى – زاپاستاعى وفيتسەرلەردى كەلىسىم-شارت بويىنشا اسكەر قاتارىنا تارتۋ. بۇل ورايدا قورعانىس مينيسترلىگىنىڭ اپپاراتى ۇگىتتەۋ-ناسيحاتتاۋ جۇمىستارىن قولعا الدى. بيىلعى جىلدىڭ ءساۋىر ايىنان باستاپ قورعانىس مينيسترلىگىنىڭ كادرلار دەپارتامەنتى قازاقستان رەسپۋبليكاسى قارۋلى كۇشتەرىن جاساقتاۋدىڭ جاڭا جۇيەسىن قولدانىسقا ەنگىزۋدە. اقش, ۇلىبريتانيا, فرانتسيا سىندى الدىڭعى قاتارلى دامىعان مەملەكەتتەردەن باستاۋ العان بۇل جۇيە وتاندىق ارميانى وسى جۇيەگە ساي جاساقتاۋعا تۇرتكى بولدى.
بۇل جۇيە قازاقستاندىق ارميانى جاساقتاۋدا زاپاستاعى وفيتسەرلەر اراسىنان كاسىبي دارەجەسى جوعارى, دەنساۋلىعى مىقتى, ءوز وتانىنىڭ ناعىز پاتريوتتارىن ىرىكتەۋگە, ءارى اسكەري اتاقتى ماقتانىشپەن الىپ جۇرۋگە لايىق وفيتسەرلەر قۇرامىمەن تولىقتىرۋعا مۇمكىندىك بەرەدى. باتىس ەلدەرىنىڭ ءتاجىريبەلەرىن سارالاي وتىرىپ, كەڭەس وكىمەتىنەن قالعان ەسكى جۇيەنى تاراتىپ, جاڭا زامانعا ساي جاڭا باستامانى لايىق دەپ تانىدىق. جاڭا جۇيەنىڭ ەرەكشەلىگى:
1) قۇجاتتاردى قاراۋ جانە رەسىمدەۋ مەرزىمى قىسقارادى;
2) اسكەرگە شاقىرۋ ءۇردىسى ورتالىقتاندىرىلادى;
3) قۇجاتتارمەن جۇمىس ىستەۋدە زاماناۋي تەحنولوگيالار قولدانىلادى;
4) سىبايلاس جەمقورلىققا جول بەرمەۋ, باسقا دا باسىمدىقتار قاراستىرىلادى.
مەملەكەت كەلىسىم-شارت بويىنشا اسكەري قىزمەتكە قابىلداناتىن ازاماتتاردى تۇرعىن ۇيمەن قامتاماسىز ەتۋگە, جالداپ تۇرعان جاعدايدا جاردەماقى تاعايىنداۋعا كەپىلدىك بەرەدى. اسكەري قىزمەتشىلەردىڭ بالالارىنا تۇرعىلىقتى جەرى بويىنشا مەكتەپ جاسىنا دەيىنگى مەكەمەلەردەن كەزەكتەن تىس ورىن بولىنەدى. اسكەري قىزمەتشى مەن ونىڭ وتباسى ءۇشىن مەديتسينالىق قىزمەت كورسەتۋ مەملەكەت قاراجاتى ەسەبىنەن ءجۇزەگە اسىرىلادى. سونداي-اق, مەملەكەت ەسەبىنەن كيىم-كەشەكپەن قامتاماسىز ەتىلەدى, قىزمەتى بويىنشا اۋىسقاندا, اسكەري قىزمەتتەن شىعارىلعان جاعدايدا جۇگىن تاسىمالداۋعا, ەم قابىلداۋ ستاتسيونارىنا بارعاندا جانە كەرى قايتۋ جولىنىڭ قاراجاتى وتەلەدى. كەلىسىم-شارت بويىنشا اسكەري قىزمەت وتكەرۋشىلەر ءۇشىن 2 ايلىق جالاقى مولشەرىندەگى ساۋىقتىرۋ تولەماقىسىمەن قوسا, 40 كۇنگە دەيىنگى جىل سايىنعى كەزەكتى دەمالىس بەرىلەدى. قازاقستان رەسپۋبيكاسىنىڭ زاڭنامالىق اكتىلەرىندە كوزدەلگەن تارتىپپەن جىل سايىنعى نەگىزگى دەمالىستان باسقا دا قوسىمشا دەمالىستار ۇسىنىلادى. قاجەت بولعان جاعدايدا سىرقاتى بويىنشا جانە وتباسى جاعدايىنا بايلانىستى دەمالىس الۋعا دا قۇقىلى.
قازىرگى ۋاقىتتا قورعانىس مينيسترلىگىنىڭ كادرلار دەپارتامەنتى قارۋلى كۇشتەردى جاساقتاۋدىڭ جاڭا جۇيەسىنىڭ پراكتيكالىق كەزەڭىن جالعاستىرۋدا. ەلىمىزدىڭ بارلىق اۋماعىن قامتيتىن بۇل ءىس-شارالار كەيبىر جەرلەردە ءوز مارەسىنە جەتىپ ۇلگەردى. ءاسكەري قىزمەت وتكەرۋگە نيەت ءبىلدىرۋشىلەردىڭ جالپى سانى – 635. ونىڭ ىشىندە الماتى قالاسى مەن الماتى وبلىسىندا 30 شىلدە – 11 تامىز ارالىعىندا وتكىزىلدى. 255 كانديداتتىڭ ىشىنەن 126 ادام ىرىكتەلدى. وڭتۇستىك قازاقستان, قىزىلوردا جانە جامبىل وبلىستارىندا 20-31 تامىز ارالىعىندا جۇرگىزىلدى. 380 كانديداتتىڭ ءىشىنەن 194 ادام ىرىكتەلدى. استانا ءجانە قاراعاندى قالالارى بويىنشا 10-16 قىركۇيەك ارالىعىندا ىرىكتەۋدەن وتكەن كانديداتتاردىڭ جالپى سانى – 232.
ىرىكتەۋ كوميسسياسى كانديداتتاردى مەديتسينالىق تەكسەرۋدەن, پسيحولوگيالىق تەستىلەۋدەن, دەنە دايىندىعى بويىنشا سىناقتان وتكىزۋ جانە نورماتيۆتىك-قۇقىقتىق اكتىلەر مەن باسشىلىققا الىناتىن نەگىزگى قۇجاتتاردى ءبىلۋىن تەكسەرۋ ارقىلى تاڭدايدى.
بەكىتىلگەن كەستەگە سايكەس ىرىكتەۋ ءىس-شارالارى 4 وڭىردە ءوتكىزىلۋگە جوسپارلانعان: ءبىرىنشىسى 1-6 قازان ارالىعىندا – اقمولا, سولتۇستىك قازاقستان جانە قوستاناي وبلىستارى ءۇشىن كوكشەتاۋ قالاسىندا وتسە, ەكىنشىسى 15-20 قازاندا شىعىس قازاقستان جانە پاۆلودار وبلىستارى بويىنشا وسكەمەن قالاسىندا; ودان كەيىنگىسى 29 قازان مەن 3 قاراشا ارالىعىندا اتىراۋ مەن ماڭعىستاۋ وبلىستارى ءۇشىن ورتالىعى – اتىراۋ قالاسى; ال سوڭعىسى 5-10 قاراشادا باتىس قازاقستان جانە اقتوبە وبلىستارى بويىنشا ورال قالاسىندا وتكىزىلمەك.
كەلىسىم-شارت بويىنشا اسكەر قاتارىنا وتۋگە نيەت ءبىلدىرۋشىلەر ءوز ءوڭىرى بويىنشا ءىس-شارالارعا ءۇلگەرمەگەن جاعدايدا, وتكىزىلۋ جوسپارلانعان جەرلەرگە بارىپ ءوتىنىش بەرۋگە بولادى. جانە بۇل شارا جىل سايىن جالعاسىن تاپپاق.
بۇل جۇيە بويىنشا اسكەر قاتارىنا كىرۋگە نيەت بىلدىرۋشىلەر تۇرعىلىقتى جەرىنىڭ قورعانىس ىستەرى جونىندەگى بولىمدەرىنە ء(اسكەري كوميسارياتتار) قاجەتتى قۇجاتتارىن وتكىزەدى. سونىمەن قاتار, كادرلار دەپارتامەنتىنىڭ سايتىنا تىركەلۋ ارقىلى ءوز قۇجاتتارىنىڭ باقىلاۋعا الىنعانىن بىلە الادى.
قازاقستاندىق وزىق ويلى, جوعارى ءبىلىمدى ءارى تاجىريبەلى زياتكەرلىك ارميانى جاساقتاۋ – ءبىزدىڭ باستى مىندەتىمىز. زاماناۋي ءاسكەري تەحنيكامەن جابدىقتالعان, سونىمەن قاتار, اقىل-ويى مەن ەرىك-جىگەرى مىقتى اسكەر عانا حالقىن قورعاي الاتىنى انىق.
تالعات مۇحتاروۆ,
قازاقستان رەسپۋبليكاسى
قورعانىس مينيسترلىگى كادرلار
دەپارتامەنتىنىڭ باستىعى, ادىلەت پولكوۆنيگى.
