ج. قاسىمبەك 2018 جىلى قۇرىلىس سالاسى تۇراقتى ءوسىم قارقىنىن كورسەتكەنىن جانە 2017 جىلداعى دەڭگەيگە قاراعاندا — 4,1%, ەڭبەك ونىمدىلىگىنىڭ ءوسىمى — 9%-دى قۇراعانىن ايتتى. تۇرعىن ءۇي قۇرىلىسىنا سالىنعان ينۆەستيتسيالار شامامەن 8%-عا ارتتى.
«ايتا كەتەرلىگى, "نۇرلى جەر" مەملەكەتتىك باعدارلاماسى بويىنشا مەملەكەتتىك قاراجاتتىڭ 1 تەڭگەسىنە 6-7 تەڭگە جەكە ينۆەستيتسيالار تارتىلعان. رەكوردتىق 12,5 ملن م² جاڭا تۇرعىن ءۇي پايدالانۋعا بەرىلدى. بۇل 2017 جىلعى دەڭگەيدەن 12%-عا جوعارى. 2018 جىلى ءبىر تۇرعىنعا تۇرعىن ءۇيدى پايدالانۋعا بەرۋ 0,68 م² قۇرادى. بۇل تمد ەلدەرى اراسىنداعى ەڭ جوعارعى كورسەتكىش. سالىستىرىپ قارايتىن بولساق, رەسەيدە – 0,54 م², بەلارۋستە – 0,40 م², وزبەكستاندا – 0,36 م² قۇرايدى. تۇرعىن ءۇي قۇرىلىسىنىڭ قارقىنىن ۇلعايتىپ جاتىرمىز», — دەدى ج. قاسىمبەك.
ونىڭ ايتۋىنشا, 113 مىڭنان استام وتباسى وزدەرىنىڭ تۇرعىن ءۇي جاعدايلارىن جاقسارتتى, سونىڭ ىشىندە 14 مىڭنان استام وتباسى مەملەكەتتىك قاراجات ەسەبىنەن ارەندالىق جانە نەسيەلىك باسپانامەن قامتاماسىز ەتىلدى. بارلىق وڭىرلەردە تۇرعىن ءۇيدى پايدالانۋعا بەرۋدە وڭ قارقىن بايقالادى.
بۇعان قوسا, «7–20–25» باعدارلاماسىن ءساتتى جۇزەگە اسىرۋ ماقساتىندا ينجەنەرلىك كوممۋنيكاتسيالار قۇرىلىسىنا 100 ملرد تەڭگەگە دەيىن قارجىلاندىرۋ ۇلعايتىلدى. استانا, الماتى جانە شىمكەنت قالالارىندا جۇمىس ىستەيتىن جاستار ءۇشىن جىل سايىن كەمىندە 1 مىڭ ارەندالىق پاتەر سالۋ جونىندەگى مەملەكەت باسشىسىنىڭ تاپسىرماسىن ورىنداۋ ءۇشىن قارجىلاندىرۋ تەتىكتەرى مەن كوزدەرى انىقتالدى.
«جالپى, 2019 جىلى 13 ملن م² جاڭا تۇرعىن ۇيلەر سالۋدى جوسپارلاپ وتىرمىز. سونىڭ ارقاسىندا 118 مىڭعا جۋىق وتباسى باسپانامەن قامتاماسىز ەتىلەدى. نەگىزگى مىندەت – 2030 جىلعا دەيىن ءبىر ادام باسىنا ماقساتتى كورسەتكىشتى 30 م² جەتكىزۋ. قازىرگى كەزدە بۇل كورسەتكىش 21,5 م² قۇرايدى», — دەدى مينيستر.
سونىمەن قاتار, ج. قاسىمبەك وتاندىق قۇرىلىس ماتەريالدارىن قولدانۋ ماسەلەسى ەرەكشە باقىلاۋعا الىنعانىن اتاپ ءوتتى.
«ەگەر بۇگىندە تۇرعىن ءۇي قۇرىلىسىندا شامامەن 86% قازاقستاندىق ءونىم بولسا, 3 جىل ىشىندە بۇل كورسەتكىشتى 90%-عا دەيىن كوتەرە الامىز دەپ ەسەپتەيمىز. بۇل قۇرىلىس ماتەريالدارى ءوندىرىسىن ىنتالاندىرادى جانە جالپى قۇرىلىس سالاسىنا قوسىمشا سەرپىن بەرەدى. وتكەن جىلدىڭ قورىتىندىسى بويىنشا قۇرىلىستاعى قازاقستاندىق قامتۋ ۇلەسى 2017 جىلعى دەڭگەيدەن 5%-عا ارتىپ, 77% قۇرادى, ونىڭ ىشىندە تۇرعىن ءۇي قۇرىلىسىندا – 86%», — دەدى ج. قاسىمبەك.
