ءبىر حالىقپىز, ءبىر باۋىرمىز
بەيسەنبى, 18 قازان 2012 7:47
وسى جىلدىڭ 25 ساۋىرىندە «ەگەمەن قازاقستان» گازەتى مەنىڭ ءبىر بەتتىك ماقالامدى جاريالادى. مەن سول تولعانىسىمدى «ىرىستىڭ ورداسىن ىنتىماعىمىز قولداسىن» دەپ اتاعان ەدىم. مۇنداعى «ىرىستىڭ ورداسى» دەپ وتىرعانىم, البەتتە, قاسيەتتى قازاق جەرى, كەڭ بايتاق قازاقستانىمىز.
بەيسەنبى, 18 قازان 2012 7:47
وسى جىلدىڭ 25 ساۋىرىندە «ەگەمەن قازاقستان» گازەتى مەنىڭ ءبىر بەتتىك ماقالامدى جاريالادى. مەن سول تولعانىسىمدى «ىرىستىڭ ورداسىن ىنتىماعىمىز قولداسىن» دەپ اتاعان ەدىم. مۇنداعى «ىرىستىڭ ورداسى» دەپ وتىرعانىم, البەتتە, قاسيەتتى قازاق جەرى, كەڭ بايتاق قازاقستانىمىز.
ول بۇگىندە ىرىستىڭ عانا ەمەس, باقىت پەن شاتتىقتىڭ, تاتۋلىق پەن دوستىقتىڭ دا بەرەكەلى ءھام مەرەكەلى ورداسىنا اينالىپ وتىرعاندىعى امبەگە ايان. شىن ءمانىندە دە تاۋەلسىزدىك جىلدارىندا پرەزيدەنت نۇرسۇلتان نازارباەۆتىڭ ساليقالى ساياساتى ارقاسىندا ورتاق ءۇيىمىزدى – ءبىزدىڭ قازاقستانىمىزدى وسى ارادان ءوز جەرۇيىعىن تاپقان, تاڭدايىنا تاعدىر تالقانىنىڭ ءتاتتى ءدامىن تاتىرعان ىنتىماقتىڭ قولداپ وتىرعانى دا انىق.
1937 جىلى ارمەنيادان وسىندا جەر اۋدارىلعان ارميان وتباسىلارىنىڭ, ولاردىڭ كەلەشەك ءومىرگە كەلگەن ۇرپاقتارىنىڭ ماڭدايىنىڭ باعى بار ەكەن. سەبەبى, بىزدەر قيىن شاقتا مەيىرىمدى دە باۋىرمال قازاق حالقىنىڭ ورتاسىنا تۇستىك. ولار ءبىزدى جاۋراساق – جىلىتتى, قارنىمىزدى اشىرمادى, بارىمەن ءبولىستى, مەيىرىم شۋاعىن ايامادى. ءسويتىپ, ەجەلگى قازاق جەرى ءبىزدىڭ دە ءوز ۇيىمىزگە, باۋىر باسقان وتانىمىزعا اينالدى. ءوز باسىم كوپتەگەن اتاق-ابىرويعا, تابىسقا جەتكەنىمدى جاسىرمايمىن. ەلباسىنىڭ ءوزى مەنى دوسىم دەپ سانايدى. سونىڭ بارلىعى قازاق حالقىنىڭ ارقاسى, قازاق جەرىنىڭ شاپاعاتى دەپ ايتار ەدىم. ولاي بولسا, مەن قازىر دە, بولاشاقتا دا ەڭ الدىمەن قازاقستانعا قىزمەت ەتەمىن.
ءبىزدىڭ اۋلەت قازاقتىڭ ەلى مەن جەرىنە تامىر تارتىپ, قوسىلىپ كەتتى. مەن سياقتى قازى-قارتانى كەرتىپ جەپ, قىمىزدى ساپىرىپ ءىشىپ, جانى قازاق بولىپ كەتكەن ارمياندار كوپتەپ سانالادى. ءوزىم قازاق جەرىندە تۋعاندىقتان دا قازاقستاندى بارلىق جان-تانىممەن شىنايى تۇردە تۋعان وتانىم دەپ ەسەپتەيمىن. بالالارىما دا وسىنى وسيەت ەتۋدەمىن. ويتكەنى, قازاق حالقى – ناعىز سابىرلى, ساليقالى, اڭقىلداعان ادال حالىق. قازاقتاردىڭ سالت-ءداستۇرىن, ادەت-عۇرپىن, ناۋرىز سياقتى ىرىس-بەرەكە مەن تازالىقتى تۋ ەتكەن جايسان مەرەكەلەرىن قۇرمەتتەيمىن. وتكەندەگى 30 كۇن ورازاسى, ورازا ايتى كەزىندە دە قازاق باۋىرلارىمىزبەن تىلەكتەس ءارى نيەتتەس بولدىق.
يسلام قازاقستان حالقىنىڭ باسىم بولىگى ۇستانعان حاق ءدىن بولعاندىقتان, ەلىمىزدەگى بارشا مۇسىلمان قاۋىمىن الدا كەلە جاتقان قۇربان ايت مەيرامىمەن قۇتتىقتاعىم كەلەدى. ءبىز – ءبىر حالىقپىز, ءبىر باۋىرمىز. تاعدىرىمىز ورتاق. قاي-قايسىمىزدىڭ دا ءدىلىمىز دە, ءدىنىمىز دە ىزگىلىككە نەگىزدەلگەن, جارقىن بولاشاقتى كوكسەيدى. سول بولاشاققا ءبىر حالىق, ءبىر باۋىر بولىپ قادام باسا بەرۋدەن جازبايىق.
ارتۋش كاراپەتيان,
قازاقستان حالقى اسسامبلەياسى توراعاسىنىڭ ورىنباسارى,
«نايري» ارميان مادەني بىرلەستىكتەرى اسسوتسياتسياسىنىڭ توراعاسى,
«ۆينياك» جشس ديرەكتورى.
الماتى.
