شارانى كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى گەورگي كيم اشتى.
«جابىرلەنۋشىلەرگە وتەماقى قورى تۋرالى» 2018 جىلعى 10 قاڭتاردا قابىلدانعان زاڭ قىلمىستىق قۇقىق بۇزۋشىلىقتاردىڭ جەكەلەگەن قۇرامى بويىنشا جابىرلەنۋشىلەرگە باستاپقى بىرجولعى وتەماقى تولەۋ, جابىرلەنۋشىلەرگە وتەماقى قورىن قۇرۋ ارقىلى وتەماقى تولەۋدىڭ قۇقىقتىق, الەۋمەتتىك جانە ۇيىمدىق نەگىزدەرىن بەلگىلەۋ سالاسىندا تۋىندايتىن قاتىناستاردى رەتتەۋگە باعىتتالعان.
قۇجات جابىرلەنۋشىلەردىڭ قۇقىقتارىن قورعاۋ تەتىگىن قالىپتاستىرۋ, ولارعا جانە ولاردىڭ زاڭدى وكىلدەرىنە بەلگىلەنگەن ماتەريالدىق كومەك كورسەتۋ, سونداي-اق قارجىلاندىرۋ جانە وتەماقى قورىنداعى قارجى رەسۋرستارىن شوعىرلاندىرۋ ارقىلى قاراجاتتاردى تولەۋ ءتارتىبىن جۇيەلەندىرۋ ءۇشىن قولايلى قۇقىقتىق شارتتاردى قالىپتاستىرادى.
بارلىق ەرەجەلەر قولدانىسقا ەنگىزىلگەننەن كەيىن زاڭ جابىرلەنۋشىلەردىڭ قۇقىقتارى مەن زاڭدى مۇددەلەرىن قورعاۋدى كۇشەيتۋگە جانە سونىڭ ناتيجەسىندە تۇرعىنداردىڭ قىلمىستىق تەرگەۋ جانە سوت ورگاندارىنا سەنىمىنىڭ ارتۋىنا الىپ كەلەدى.
«جابىرلەنۋشىلەرگە وتەماقى قورى تۋرالى» زاڭدى ىسكە اسىرۋعا بايلانىستى ماسەلەلەر بويىنشا قارجى ءمينيسترىنىڭ ورىنباسارى تاتيانا ساۆەلەۆا, قىلمىستىق ىستەر جونىندەگى سوت القاسىنىڭ توراعاسى اباي راحمەتۋلين مەن باس پروكۋروردىڭ ورىنباسارى مارات احمەتجانوۆ ءسوز سويلەدى.
وتىرىسقا ۇلتتىق قاۋىپسىزدىك كوميتەتىنىڭ, قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ سىبايلاس جەمقورلىققا قارسى كۇرەس بويىنشا ۇلتتىق بيۋرونىڭ, سونداي-اق ىشكى ىستەر جانە قورعانىس مينيسترلىكتەرىنىڭ وكىلدەرى قاتىستى.
وتىرىس قورىتىندىسى بويىنشا جۋرناليستەرگە سۇحبات بەرگەن كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى گەورگي كيم وسى زاڭ ەلباسىنىڭ حالىقتىڭ ءال-اۋقاتىن ارتتىرۋعا باعىتتالعان قازاقستان حالقىنا جولداۋىن ورىنداۋ ماقساتىندا قابىلدانعانىن اتاپ ءوتتى. بۇل قۇجاتتى ىسكە اسىرۋ بارىسىندا تۋىندايتىن ماسەلەلەردى سەناتورلاردىڭ ءبىلۋى ماڭىزدى بولىپ وتىر جانە ءتيىستى مەملەكەتتىك ورگاندار بۇل ماسەلەلەردىڭ شەشىمىن تابۋى ءتيىس. «سالالىق كوميتەت رەتىندە ءبىزدىڭ كوميتەتكە قوردىڭ جاعدايى قانداي ەكەنىن انىقتاۋ وتە ماڭىزدى. ءبىز بۇدان بىلايعى زەردەلەۋ مەن پىسىقتاۋدى قاجەت ەتەتىن ماڭىزدى قۇقىقتىق ەرەكشەلىكتەردى انىقتادىق. زاڭدى قابىلداۋ كەزىندە ازىرلەۋشىلەر الدىندا تۇرعان مىندەتتى شەشۋى ءۇشىن قوردى قارجىلاندىرۋ كوزدەرى تۋرالى ەڭ باستى ماسەلە تۋىندايدى. تولەمدەرگە بايلانىستى تەتىكتەر تۋرالى قارجى مينيسترلىگىنە, قور وپەراتورىنا سۇراقتار قويىلدى. وتىرىستا ايتىلعان بارلىق ەسكەرتۋلەر مەن ۇسىنىستاردى كوميتەت ۇسىنىم رەتىندە ازىرلەپ, ۋاقتىلى پىسىقتاۋ ءۇشىن ءتيىستى مەملەكەتتىك ورگاندارعا جولدايتىن بولادى», - دەدى گ.كيم.
