«جازعا سالىم ديماشتىڭ كونتسەرتى وتەدى ەكەن» دەگەن ۇزىنقۇلاقتان ءسۇيىنشى حاباردى ەستىگەن جانكۇيەرلەردەن كونتسەرتتىڭ ءوتۋ بارىسى تۋرالى مىڭداعان ساۋال تولاسسىز ءتۇسىپ جاتقان كورىنەدى. سوندىقتان اتالعان كونتسەرتكە جاۋاپتى ۇيىمداستىرۋشى توپ ازىرلىك جۇمىستارى تۋرالى رەسمي حابار تاراتۋدى ءجون ساناپتى. ال «قازاقستان» رترك اق وسى كونتسەرتتىڭ باستان-اياق ۇيىمداستىرىلۋى مەن ءتۇسىرىلىم جۇمىستارىن قولعا الىپ, ۇلكەن جاۋاپكەرشىلىكتى قادامعا بارىپ وتىر.
– بۇل جولعى كونتسەرتتى ۇلكەن دايىندىقپەن وتكىزگىمىز كەلەدى. قازىر بىرنەشە شىعارماشىلىق توپپەن جۇمىس ىستەپ, ءارتۇرلى ۇسىنىستاردى قابىلداپ جاتىرمىز. مۇمكىندىگىنشە, الەمدىك شوۋ-كونتسەرتتەردە قولدانىلاتىن سونى تاجىريبە مەن جاڭا تەحنولوگيالاردى پايدالانامىز. سەبەبى كونتسەرت ەڭ الدىمەن ديماشتىڭ ءوز حالقىنا, ءوز تىڭداۋشىلارىنا ارنالىپ وتىر, – دەدى «قازاقستان» رترك اق باسقارما توراعاسى ەرلان قارين.
استانا كۇنى قارساڭىنا جوسپارلانىپ وتىرعان بۇل كونتسەرتتە قازاقتىڭ حالىق اندەرىمەن بىرگە, قازاقستاندىق جانە شەتەل كومپوزيتورلارىنىڭ شىعارمالارى ءتۇرلى تىلدە شىرقالادى. ودان بولەك ديماشتىڭ ءوز جانىنان شىعارعان اۆتورلىق تۋىندىلارى دا كورەرمەن نازارىنا ۇسىنىلماق.
– قازاق ىرىمشىل حالىقپىز عوي. الداعى ماقساتتاردى جايىپ سالعاندى ءجون كورمەيمىز. دەگەنمەن ايتىپ وتەيىن, كومپوزيتور يگور كرۋتوي ەكەۋمىز ايتىپ جۇرگەن «ليۋبوۆ ۋستاۆشيح لەبەدەي» اتتى انىنە بەينەبايان تۇسىرگەلى جاتىرمىز. ودان كەيىن امەريكالىق بىرنەشە كومپوزيتوردان كەلگەن تاماشا اندەرگە دە كليپ ءتۇسىرۋ جوسپاردا بار. مەنىڭ ساحنادا ورىنداپ جۇرگەن اندەرىم كومپوزيتوردىڭ عانا ەمەس, مەنىڭ دە جۇرەگىمنەن وتكەن اندەر. ال ول اندەردى بىردەن كەزىكتىرۋ قيىنعا سوعادى», – دەگەن ءانشى قاشانعى سىپايى ادەبىنە سالىپ جىلى جىميادى.
بۇل كۇندەرى «ونەرىڭ ورگە ءجۇزسىن» دەگەن قالىڭ قازاقتىڭ تىلەگى وسى بالانىڭ ۇستىندە دەسەك ارتىق ايتقانىمىز ەمەس. حالقىنىڭ ۇستەم بولعان مەرەيى مەن مەيىرىن سەزگەن ديماش تا, ءسات سايىن جاڭا ءبىر اقجولتاي قۋانىشىمەن ءسۇيىندىرىپ كەلەدى. ونىڭ الدىڭعى جىلى «استانا ارەنادا» وتكەن «باستاۋ» اتتى العاشقى كونتسەرتىنە 25 مىڭنان استام حالىق جينالعان بولاتىن. ءانشىنىڭ جاقىن ارادا جارىق كورەتىن جاڭا مۋزىكالىق البومى, رەسەي ەستراداسىنىڭ شامشىراعى, تالانتتى كومپوزيتور يگور كرۋتويمەن بىرلەسىپ ءتۇسىرىلىپ جاتقان كليپى تالانتىمەن تاس جارعان ورەندى جاڭا بيىكتەرگە شىعاراتىنى انىق.
ايا ءومىرتاي,
«Egemen Qazaqstan»
