بايقاۋعا الەۋمەتتىك, قوعامدىق پروبلەمالاردى شەشۋگە جانە وزدەرىنىڭ جومارتتىعىمەن باسقالاردى مەيىرىمدىلىككە ىنتالاندىرۋعا ۇلەس قوسىپ جۇرگەن جەكە جانە زاڭدى تۇلعالار قاتىسا الادى. جوبانى قر تۇڭعىش پرەزيدەنتى – ەلباسىنىڭ قورى, قازاقستاننىڭ ىسكەر ايەلدەر قاۋىمداستىعى جانە «حابار» اگەنتتىگى بىرلەسىپ جۇزەگە اسىرىپ وتىر.
ء«بىزدىڭ ماقساتىمىز – ەلىمىزدەگى ازاماتتىق باستامالاردى قولداپ, ازاماتتىق جانە ادامگەرشىلىك بورىشىنا ادال ەرەكشە تۇلعالاردى تانىتۋ جانە ولاردىڭ ىستەرىن ەلىمىزگە, جاستارعا ناسيحاتتاۋ. بايقاۋ ەلىمىزدىڭ بۇكىل اۋماعىندا وتكىزىلىپ جاتىر» دەدى استانا قالاسى اكىمدىگىنىڭ ءباسپاسوز ورتالىعىندا وتكەن جيىندا قر تۇڭعىش پرەزيدەنتى – ەلباسى قورى اتقارۋشى ديرەكتورىنىڭ ورىنباسارى سۇلتان ايتجانوۆ.
ۇيىمداستىرۋشىلاردىڭ ايتۋىنشا, بىلتىر قاراشادا باستالعان بايقاۋعا قاتىسۋشىلاردى ىرىكتەۋ جۇمىسى وسى جىلدىڭ اقپان ايىنا دەيىن جۇرگىزىلەدى. جەڭىمپازدار العىس ايتۋ كۇنى (1 ناۋرىز) مەرەكەسىنىڭ قارساڭىندا بەلگىلى بولادى.
«استانا قالاسىنداعى ىسكەر ايەلدەر قاۋىمداستىعى «جاس قاناتتار» ۇيىمىنىڭ كوشباسشىسى اسەل قاپالوۆا لاۋرەاتتار بەس اتالىم بويىنشا انىقتالاتىنىن جەتكىزدى. اتاپ ايتقاندا, سالت-داستۇرگە بايلانىستى قايىرىمدىلىق قىزمەت كورسەتكەن ادامدارعا قولداۋ كورسەتۋگە باعىتتالعان «اسار» اتالىمى, ءبىلىم بەرۋ, ەكولوگيا جانە كورىكتەندىرۋ سالاسىندا تۋعان ولكەگە كومەك كورسەتەتىن جاندارعا تاعايىندالعان «تۋعان جەر» سىيلىعى, تەگىن كومەك كورسەتىپ, يگى ىستەر اقتارىپ جۇرگەن جاندارعا ارنالعان «مەيىرىم جولىندا» اتالىمى بار. سونداي-اق ەرلىك جاساپ, جانكەشتىلىك تانىتقان باتىرلارعا بەرىلەتىن «باتىل جۇرەك» جانە قايىرىمدىلىقتى دارىپتەگەن جۋرناليستەر مەن ۇجىمعا بەرىلەتىن «قايىرىمدىلىق تاريحى» اتالىمى دا بار.
مايگۇل سۇلتان,
«Egemen Qazaqstan»
