گ.ابدىقالىقوۆا كەزدەسۋ بارىسىندا قازاقستان مەن ارمەنيانى تاريحي جانە مادەني قارىم-قاتىناستار تىعىز بايلانىستىراتىنىن اتاپ ءوتتى. ونىڭ ىشىندە جەمىستى ىنتىماقتاستىق ەۋرازەق, ۇقشۇ, تمد جانە باسقا دا ينتەگراتسيالىق بىرلەستىكتەر اياسىندا جۇزەگە اسىپ كەلەدى.
مەملەكەتتىك حاتشى ەلشىنى قازاقستانداعى قىزمەتىنە تاعايىندالۋىمەن جانە ارمەنياداعى پارلامەنتتىك سايلاۋدىڭ وتۋىمەن قۇتتىقتاپ, جاڭادان سايلانعان زاڭ شىعارۋشى ورگاننىڭ بەلسەندى قىزمەتى قازاقستان-ارمەنيا سەرىكتەستىگىنىڭ ودان ءارى نىعايا تۇسۋىنە وڭ ىقپال ەتەتىنىنە سەنىم ءبىلدىردى.
گ.ابدىقالىقوۆا ەكى ەلدىڭ ەۋرازيالىق ينتەگراتسيا اياسىنداعى ءوزارا ءىس-ارەكەتى تاۋار اينالىمىنىڭ ءوسۋ قارقىنىنا سەپتىگىن تيگىزىپ وتىرعانىن ايتتى. 2018 جىلعى 10 ايدىڭ قورىتىندىسى بويىنشا, قازاقستان مەن ارمەنيا اراسىنداعى تاۋار اينالىمى 10,4 ملن اقش دوللارىن قۇراپ, 2017 جىلمەن سالىستىرعانداعى ءوسىم 19,5 پايىزعا جەتكەن. ونىڭ ىشىندە ەكسپورتتىڭ ۇلەسى 4,9 ملن دوللار بولسا, يمپورت 5,5 ملن دوللاردى قۇراعان.
– ءبىزدىڭ مادەني-گۋمانيتارلىق ىنتىماقتاستىعىمىزدىڭ قازاقستان مەن ارمەنيا قارىم-قاتىناسىندا ەرەكشە ماڭىزى بار. تۇراقتى تۇردە مادەني, عىلىمي جانە سپورتتىق ءىس-شارالار وتكىزىلىپ, جاستار مەن ءبىلىم مەكەمەلەرى اراسىندا تىعىز بايلانىس جولعا قويىلۋدا. قازاقستاندا تۇرىپ جاتقان ارميان دياسپوراسى – ءبىزدىڭ مادەني-گۋمانيتارلىق قاتىناسىمىزدىڭ ماڭىزدى دانەكەرى, – دەي كەلە, مەملەكەتتىك حاتشى ەلىمىزدىڭ ءاربىر وبلىس ورتالىعىندا ارميان ۇلتتىق-مادەني بىرلەستىكتەرىنىڭ تابىستى جۇمىس ىستەپ جاتقاندىعىن اتاپ ءوتتى.
كەزدەسۋ سوڭىندا مەملەكەتتىك حاتشى گۇلشارا ابدىقالىقوۆا ارمەنيانىڭ توتەنشە جانە وكىلەتتى ەلشىسى گاگيك گالاچيانعا ەكىجاقتى ءوزارا ارەكەتتەستىكتى ودان ءارى نىعايتۋ ىسىندە تابىس تىلەدى.
گ.گالاچيان بۇل قىزمەتىنە وتكەن جىلدىڭ قاراشا ايىندا ارمەنيا پرەزيدەنتىنىڭ جارلىعىمەن تاعايىندالعان بولاتىن.
سەرىك ابدىبەك,
«Egemen Qazaqstan»
