«ۇيدە وتىرىپ اۋكتسيونعا قاتىستىم»
جاقىندا قازتالوۆ اۋدانىنىڭ جالپاقتال اۋىلىندا تۇراتىن قانات مۇساعاليەۆ ۇيىندە وتىرىپ اۋىلدا ازىق-ت ۇلىك دۇكەنىن اشۋ ءۇشىن جەر تەلىمىن ساتىپ الدى.
– اۋكتسيون ۋاقىتى بەكىتىلگەن ساعات 11.00-دە كومپيۋتەرىمدى قوسىپ قويدىم. جەر قاتىناستارى ءبولىمىنىڭ ماماندارى ەلەكتروندى اۋكتسيوننىڭ قالاي وتەتىنىن ەگجەي-تەگجەيلى ءتۇسىندىرىپ بەرگەن بولاتىن. اسىرەسە ارنايى دايىندالعان ۆيدەونۇسقاۋلىقتىڭ پايداسى كوپ بولدى. الدىن الا كەرەكتى قۇجاتتاردى بازاعا جۇكتەدىك. جارناسىن تولەدىك. ەش قيىن ەمەس ەكەن. كەرىسىنشە وتە ىڭعايلى. اۋكتسيونعا ءۇش ادام قاتىستىق. ساتىلاپ باعا ۇسىنىپ, سوڭىندا 0,07 گا جەر تەلىمىنە 222 مىڭ 894 تەڭگە ۇسىنىپ, جەڭىسكە جەتتىم, – دەيدى ق.مۇساعاليەۆ.
قانات – «تۇلپار» شارۋا قوجالىعىنىڭ جەتەكشىسى. بۇدان بۇرىن دا اۋىل شارۋاشىلىعى ماقساتىنداعى جەر تەلىمىن پايدالانۋ قۇقىعىن بەرۋ بويىنشا بايقاۋلارعا, جەر اۋكتسيوندارىنا قاتىسقان. «بۇرىنعى ءداستۇرلى جۇيەنىڭ ابىگەرى كوپ ەدى. قانشاما قاعاز تولتىرىپ, تالاي كابينەتتىڭ تابالدىرىعىن توزدىرىپ جۇرەتىنبىز», دەيدى شارۋاقور جىگىت.
قانات قازىر ەلەكتروندى اۋكتسيوندا جەڭىپ العان جەر تەلىمىنە دۇكەن عيماراتىن سالۋدىڭ قامىنا كىرىسىپ كەتتى.
2018 جىلى وبلىستىڭ 11 اۋدانىندا 304 جەر تەلىمى بويىنشا اۋىل شارۋاشىلىعى ماقساتىنداعى جەردى پايدالانۋ قۇقىعىن بەرۋدىڭ 28 كونكۋرسى ءوتتى. سونداي-اق جالپى اۋماعى 47,2 گا بولاتىن 103 جەر تەلىمىن كوممەرتسيالىق ماقساتقا جالعا الۋ قۇقىعىن ساتۋ بويىنشا 18 اۋكتسيون ۇيىمداستىرىلدى.
جەر تۋرالى بىلگىڭ كەلسە, پورتالعا كىر
پرەزيدەنت «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا 2019 جىلى مەملەكەتتىك قىزمەتتەردىڭ 80 پايىزىن, 2020 جىلى 90 پايىزىن ەلەكتروندى فورماتقا كوشىرۋدى تاپسىردى.
وبلىستىق جەر قاتىناستارى باسقارماسىندا بۇل باستاما جاقسى جولعا قويىلعان. ماسەلەن, وبلىستا جەر قاتىناستارى سالاسىندا بيىل كورسەتىلگەن 9154 قىزمەتتىڭ 56 پايىزى, ياعني 5167-ءسى ەلەكتروندى فورماتتا بولىپتى.
«تسيفرلى قازاقستان» باعدارلاماسى شەڭبەرىندە باتىس قازاقستان وبلىستىق جەر قاتىناستارى باسقارماسى www.zem.kz پورتالىن ىسكە قوستى. پورتالدا كونكۋرس جانە اۋكتسيون ارقىلى ۇسىنىلاتىن بوس جەر تەلىمدەرىنىڭ سىزبالارى, جەكە تۇرعىن ءۇي قۇرىلىسى ءۇشىن جەر تەلىمدەرىن الۋعا كەزەككە تۇرعاندار ءتىزىمى, ورال قالاسى جانە بارلىق اۋداندارداعى جەر پايدالانۋشىلار تۋرالى مالىمەت بار. بۇل پورتالعا ەلەكتروندى تسيفرلى قولتاڭباسى بار كەز كەلگەن ازامات كىرىپ, وزىنە قاجەتتى اقپاراتتى الا الادى, – دەيدى وبلىستىق جەر قاتىناستارى باسقارماسىنىڭ باسشىسى ءاليا مۇحانبەتجانوۆا.
جەرگە كوكتەن كوزقاراس
ورالدا www.zem.kz پورتالىنىڭ ىسكە قوسىلعانىنا ءبىر جىلداي ۋاقىت ءوتتى. بۇل جوبا «اتامەكەن» كاسىپكەرلەر پالاتاسى مەن وبلىس اكىمدىگىنىڭ اراسىندا وڭىردەگى بيزنەس كليماتتى جاقسارتۋ, سىبايلاس جەمقورلىق ىقتيمالىن جويۋ ماقساتىندا قولعا الىنعان ەدى. وڭىردەگى جەر ماسەلەسىنە قاتىستى اقپاراتتىڭ بارلىعى وسى رەسۋرستا جيناقتالعان.
– وتكەن جىلى «قازاقستان عارىش ساپارى» ۇلتتىق كومپانياسى» اق باسشىلارى وبلىسقا كەلدى. سول كەزدە وبلىس اۋماعىنا عارىشتان مونيتورينگ جاساۋ ءۇشىن ارنايى گەوپورتال قۇرۋ جونىندە ماسەلە كوتەرىلدى. گەوپورتالدىڭ تيىمدىلىگى عارىشتىق تۇسىرىلىمدەر ارقىلى وبلىس اۋماعىنداعى اۋىل شارۋاشىلىعى جەرىنىڭ, جالپى جەر رەسۋرستارىنىڭ پايدالانىلۋى, جەردى زاڭسىز يەلەنۋ, تىركەلمەگەن قۇرىلىستاردى انىقتاۋ ت.ب. كوپتەگەن ساۋالدار ايدان انىق بولادى. عارىش تۇسىرىلىمدەرى اپتا سايىن جاڭعىرتادى. سول ارقىلى كوكتەمدە قانشا القاپ جىرتىلدى, ول جەردە قانداي اۋىلشارۋاشىلىق جۇمىسى ءجۇردى, قانداي داقىل ەگىلدى, القاپتىڭ ارامشوپپەن لاستانۋى قانداي دەڭگەيدە, جەر دۇرىس پايدالانىلىپ جاتىر ما, مىنە, وسىنىڭ ءبارىن باقىلاۋ مۇمكىن بولادى. زاڭسىزدىق بولسا, ءبىز گەوپورتال مالىمەتىن ايعاق قىلىپ, جوسىقسىز جەر پايدالانۋشىلاردى جاۋاپكەرشىلىككە تارتا الامىز. 2019 جىلى ىسكە قوسىلاتىن بۇل گەوپورتال دەرەكتەرى قاراپايىم تۇرعىندار ءۇشىن دە وڭتايلى بولادى, دەيدى ءاليا بيعازىقىزى.
جەر تەك پايدالانعان ادامعا بەرىلەدى
پايدالانىلماي, بوس جاتقان جەردى انىقتاۋ, كەرى قايتارۋ جانە قايتادان اۋىل شارۋاشىلىعى اينالىمىنا قوسۋ باعىتىنداعى جۇمىس اق جايىق وڭىرىندە دە جۇيەلى ءجۇرىپ جاتىر.
– جەردى تولىقتاي يگەرۋ جانە اۋىل شارۋاشىلىعى ونىمدەرى ءوندىرىسىنىڭ ءوسىمىن قامتاماسىز ەتۋ ماقساتىندا 2012-2018 جىلدار ىشىندە 1 ملن 480,5 مىڭ گەكتار جەر انىقتالىپ, سونىڭ 1022,1 مىڭ گەكتارى مەملەكەت مەنشىگىنە قايتارىلدى. بۇل جەردىڭ 590,4 مىڭ گەكتارى جاڭا قوجايىندارىن تاۋىپ ۇلگەرگەن. بىراق جەر شالعايلىعىنا, ءونىم ءتۇسىمى تومەندىگىنە بايلانىستى 431,7 مىڭ گەكتار جەر سۇرانىسقا يە بولماي, اۋىل شارۋاشىلىعى اينالىمىنا قوسىلمادى. ونىڭ نەگىزگى بولىگى جانىبەك, قازتالوۆ, اقجايىق, ءبورلى, سىرىم جانە شىڭعىرلاۋ اۋداندارىنا تيەسىلى, – دەيدى ءا.مۇحانبەتجانوۆا.
www.zem.kz سايتىندا جەر پايدالانۋ زاڭدارىن بۇزعان زاڭدى جانە جەكە تۇلعالاردىڭ «قارا ءتىزىمى» دە كورسەتىلگەن. مۇنداي كليەنتتەر ەكى جىلعا دەيىن جەر الۋ ءۇشىن اۋكتسيوندار مەن بايقاۋلارعا قاتىسا المايدى.
قازبەك قۇتتىمۇرات ۇلى,
«Egemen Qazaqstan»
