ينسۋلتقا ۇشىراعان اۋرۋلار, ونكولوگيانىڭ 4 جانە 3-ءىنشى ستادياسىنداعى سىرقاتتار وتە كوپ. بىراق, «حوسپيستە» سەمەي قالاسى بويىنشا نەبارى 30 توسەكتىك ورىن بار. سول 30 ورىن دا تولىپ كەتكەن. حوسپيس-يرلانديا ەلىنىڭ قارجىلاي كومەگى ارقىلى تۇرعىزىلعان اۋرۋحانا. ايتا كەتۋ كەرەك, ۇكىمەتىمىز سوڭعى كەزدە مەديتسينا سالاسىن ىرگەلى دامىتىپ وتىر. ەگەر 2010 جىلدىڭ بيۋدجەتى مەن قازىرگى بيۋدجەتتى سالىستىرسا ايىرماسى جەر مەن كوكتەي.
- وبلىستىق اكىمدىك تاراپىنان سەمەيدىڭ مەديتسينا سالاسىنا كوڭىل ءبولۋ جوعارى دەڭگەيدە, اۋرۋحانالار جاڭا تەحنولوگيالارمەن جابدىقتالعان, - دەدى عاليا جۋاسباەۆا, - دەسەك تە, مەن وسى حوسپيسكە جۇمىسقا كىرگەن كەزدە مۇنداي جاعداي باسقاشا ەكەنىن كوردىم. بىزگە توسەك تارتىپ جاتقان اۋرۋ ادامدار تۇسەدى. سونداي ادامداردى جاقىندارى اۋدارىپ, توڭكەرىپ, تازالاپ, جاعداي جاساماعانىن بايقايمىز. ياعني تۇرعىندار, اۋرۋ ادامدى ۇيدە قالاي كۇتۋ كەرەك دەگەن ماسەلەدەن بەيحابار بولىپ وتىر. بىزگە كەپ تۇسكەن ناۋقاستىڭ مۇنداي جاعدايدا قالىپقا كەلۋى وتە قيىن. ەگەر ءبىز جىلىنا 240-250 ناۋقاس قابىلداساق, ونىڭ 60-تان استامى قايتىس بولادى. ەكى نە ءتورت بولمەلى ءۇيى بار ادامداردىڭ ءبىر تۋىسى اۋىرىپ السا, ءبىر بولمە تولىقتاي ناۋقاسقا بەرىلەدى. بالاسى بار ۇيلەردە بۇل قيىن. وندا اۋىرىپ جاتقان ادامدا مۇگەدەكتىك بولماسا, سول ادامعا قاجەتتى گيگيەنالىق پامپەرس سياقتى قۇرالداردى اقشاعا ساتىپ الۋعا تۋرا كەلەدى. ماسەلەن, بىزدە ءبىر زەينەتكەر اتا بار. بايبىشەسىنىڭ كوزى كورمەيدى, ۇزاق جىلدان بەرى توسەك تارتىپ جاتىر. مۇگەدەكتىگى جوق بولعاندىقتان وعان ءبارىن ساتىپ اپەرۋگە تۋرا كەلەدى. سول اقساقال ءوزىنىڭ زەينەتاقىسىنا كيىندىرەدى, ءدارىسىن اپەرەدى, تاماعىن اپەرەدى. مەن وسىنداي ادامدارعا تەگىن كومەكتەر بولسا دەپ ءبىراز جەرگە شىقتىم. بىراق زاڭ بويىنشا مۇگەدەكتىگى بار ادامدارعا عانا ءدارى-دارمەك, تاعى ءبىراز جەڭىلدىك بار ەكەن.
عاليا جۋاسباەۆانىڭ ايتۋىنشا, جاقىندا عانا دەنساۋلىق ساقتاۋ مينيسترلىگىمەن سەلەكتورلىق كەڭەس وتكەن. وندا ەلىمىزدە ءپاللياتيۆتى كومەك بەرۋدى جولعا قويۋ تۋرالى ايتىلىپتى. «نۇر وتان» پارتياسىنىڭ سەمەي قالالىق فيليالىندا وتكەن دوڭگەلەك ۇستەل بارىسىندا «حوسپيس» اۋرۋحاناسىنىڭ باس دارىگەرى عاليا جۋاسباەۆا پارتيالىقتاردان كومەك سۇراپ, كوپتەگەن جاعدايدىڭ باسىن اشىپ ايتتى. سەمەيدە دە ءپاللياتيۆتى مەديتسينانى جانە «ۇيدەگى حوسپيس» جوباسىن قولعا الۋدىڭ ماڭىزدىلىعىنا توقتالدى. سەبەبى اۋرۋحاناداعى 30 ورىن الدەقايدا از بولىپ تۇر.
راۋشان قابجانقىزى
«ەگەمەن قازاقستان»
سەمەي
