بۇرىن-سوڭدى حابارلاعانىمىزداي, مەكتەپ اسحانالارىنىڭ بىرقاتار وزەكتى ماسەلەلەرىن شەشۋ جانە اتا-انالار كوميتەتىنىڭ, اسحانالاردى جالعا الۋشىلاردىڭ, مەكتەپ اكىمشىلىگى وكىلدەرى مەن ءبىلىم باسقارماسى وكىلدەرىنىڭ ءىس-ارەكەتىن ۇيلەستىرۋ ءۇشىن «نۇر وتان» پارتياسى «مەكتەپ اسحانالارى» جوباسىن دايىنداعان ەدى.
وعان اتا-انالار قوعامداستىعىنىڭ الەۋمەتتىك جەلىلەردە جازعان بالالاردى تاماقتاندىرۋدىڭ ساپاسىنا كوڭىلى تولماۋشىلىعىنا بايلانىستى پىكىرلەرى سەبەپ بولدى. وتكەن جىلى پارتيا ءبىز تىلگە تيەك ەتكەن ماسەلەلەردى شەشۋگە ءتيىس ارنايى جوبا ازىرلەپ, تۇجىرىمداماسىن بەكىتىپ, سودان كەيىن ناقتى دايىندىق جۇمىس جۇرگىزگەن. ناتيجەسىندە 2018 جىلدىڭ سوڭىندا نۇروتاندىقتار مەكتەپ اسحانالارىنداعى تيىم سالىنعان بىرقاتار ازىق-ت ۇلىكتەردىڭ ءتىزىمىن ۇزارتۋعا قول جەتكىزدى (سوسيسكالار, كولباسا ونىمدەرى, گامبۋرگەرلەر, سونداي-اق, جاساندى قوسىمشالارى بار تاعامدار قوسىلدى), ال, جاڭا جىلدان باستاپ «مەكتەپ اسحانالارى» دەپ اتالاتىن پارتيالىق جوبا رەسمي تۇردە باستاۋ الدى. قۇرامىندا اتا-انالار, پارلامەنتاريلەر, «نۇر وتان» پارتياسى وڭىرلىك فيليالدارىنىڭ, باق, ۇەۇ مەن مەمورگانداردىڭ وكىلدەرى بار ۆەدومستۆوارالىق ساراپشىلار توبى بۇكىل ەلىمىز بويىنشا مەكتەپتىڭ تاماقتاندىرۋ ورىندارىنا مونيتورينگ جۇرگىزۋگە كىرىسىپ كەتتى. ۇيىمداستىرۋ ماسەلەلەرى مەن جوبانى ىسكە اسىرۋدىڭ العاشقى كۇندەرىنىڭ ناتيجەسىن تالقىلاۋ ءۇشىن «نۇر وتان» مەكتەپ اسحانالارىن تاماقتاندىرۋعا بايلانىستى رەسپۋبليكالىق ساراپشىلار توبىنىڭ ءبىرىنشى كەڭەسىن وتكىزدى. بۇل ماسەلەنى باقىلاۋعا العان پارتيا حاتشىسى يليا تەرەنچەنكونىڭ توراعالىق ەتۋىمەن وتكەن وتىرىستا كەزدەسۋدىڭ قاتىسۋشىلارى ءوز يدەيالارىمەن ءبولىسىپ, مەكتەپ اسحانالارىنىڭ جۇمىسىن ۇيىمداستىرۋ سالاسىنداعى, مەكتەپ اسحانالارى مونيتورينگىنىڭ قاپىلدىعى, مەكتەپ اسحانالارى مەن اس ازىرلەيتىن جەرلەردە بەينەباقىلاۋ ورناتۋ, سونداي-اق, بەيىندى نورماتيۆتىك قۇقىقتىق اكتىلەرگە وزگەرىس ەنگىزۋ تۋرالى ويلارىن ورتاعا سالدى.
اڭگىمە بارىسىندا پارتيا حاتشىسى ەلىمىزدىڭ وڭىرلەرىندە قۇرىلعان مەكتەپ اسحانالارى بويىنشا رەسپۋبليكالىق ساراپشىلار توبى مەن ۆەدومستۆوارالىق ساراپشىلار توبىنىڭ جۇمىسىن قاداعالاۋشىلىق ءىس-ارەكەتپەن شاتاستىرۋدىڭ قاجەتى جوق ەكەنىن اتاپ وتكەندى ءجون سانادى. - كەيبىر باق ءبىزدىڭ مەكتەپ اسحانالارى مەن ونى جالعا الۋشىلاردى تەكسەرىپ جاتقانىمىزدى جازىپ ۇلگەردى. بۇل تۇبەگەيلى قاتە تۇسىنىك. ءبىز تەكسەرىس ەمەس, مونيتورينگ جۇرگىزىپ جاتىرمىز. قايتالاپ ايتامىن! ءبىز ەشكىمدى دە جازالامايمىز, قانداي دا ءبىر كەمشىلىكتەردى جويۋعا بايلانىستى كەڭەس قانا بەرەمىز. جەكەلەگەن جاعدايلاردا ءبىز ءوز ۇسىنىستارىمىزدى وكىلەتتى ورگاندارعا جىبەرەمىز. الايدا, ءبىزدىڭ بيزنەستىڭ ىسىنە ارالاسۋعا قۇقىمىز جوق. ءتىپتى, «نۇر وتان» پارتياسىنىڭ باسىمدىققا يە ماقساتتارىنىڭ ءبىرى – قازاقستاندىق قولداۋ كورسەتۋ. ونىڭ ىشىندە مەكتەپ اسحانالارى سالاسىندا جۇمىس ىستەپ جاتقان كاسىپكەرلەر دە بار - دەپ مالىمدەدى يليا تەرەنچەنكو.
بۇل ەسكەرتۋلەر قۇرامىندا مەكتەپ وقۋشىلارىنىڭ اتا-انالارى, قۇقىققورعاۋشىلار, دەپۋتاتتار, مەملەكەتتىك قىزمەتكەرلەر جانە نۇروتاندىقتاردىڭ وزدەرى دە بار ساراپشىلاردىڭ اراسىندا قىزۋ پىكىرتالاس تۋعىزدى. ءبىر جاعىنان الىپ قاراعاندا بالالاردىڭ دەنساۋلىعىنان ارتىق ەشتەڭە دە جوق. جانە قانداي دا ءبىر كاسىپكەردىڭ كىناسىنان اسحانادا تاماقتانعان وقۋشىلاردىڭ جاپپاي ۋلانۋ وقيعاسى ورىن العاندا, شاعىن جانە ورتا بيزنەستى دامىتۋ ماسەلەسىنىڭ باسىمدىققا يە بولعانى ءۇشىن كىنالىنى جاۋاپكەرشىلىكتەن بوساتۋ تۋرالى اڭگىمە قوزعاۋ قانشالىقتى قيسىندى؟ ەكىنشى جاعىنان نورمادان بولماشى عانا اۋىتقۋشىلىق بولعانى ءۇشىن جۇمىس ورىندارىن قۇرىپ وتىرعان مەكتەپ اسحانالارىن جالعا الۋشىلاردىڭ ليتسەنزياسىن تارتىپ الىپ, ونى جۇمىس ىستەتپەي تاستاۋ دۇرىس پا؟
بۇل ماسەلەدە بيزنەستىڭ ىسىنە ارالاسۋ بولىپ تابىلاتىن شەكارا قايدا؟ ۇزاققا سوزىلعان تالقىلاۋلاردىڭ ناتيجەسىندە رەسپۋبليكالىق ساراپشىلار توبىنىڭ مۇشەلەرى مەكتەپ اسحانالارىنا مونيتورينگ جۇرگىزۋ قاجەت دەگەن مامىلەگە كەلدى. الايدا, بۇل ماسەلەدە مەكتەپ وقۋشىلارىنىڭ قابىلدانعان ستاندارت بويىنشا تاماقتانىپ, شاعىن جانە ورتا بيزنەستىڭ دا توقتاۋسىز دامي بەرگەنى ماڭىزدى. ايتالىق, قانداي دا ءبىر كەمشىلىكتەر انىقتالعان جاعدايدا كاسىپكەرلەردىڭ ونى تۇزەۋىنە ەكىنشى مۇمكىندىك بەرىلۋى ءتيىس.
