- بۇگىنگە دەيىن ءبىزدىڭ مەكەمە 9 كاسىپكەرمەن جالپى قۇنى 164 ملرد 393 ملن تەڭگە بولاتىن كەلىسىمگە قول قويدى. «Protecting Business and Investments» جوبالىق كەڭسەسىنە 13 كاسىپكەردەن لاۋازىمدى تۇلعالاردىڭ ءىس-ارەكەتىنە قاتىستى وتىنىشتەر ءتۇسىپ, بيزنەسمەندەردىڭ قۇقىقتارى تولىعىمەن قورعالدى,-دەيدى دەپارتامەنت باسشىسى توقتامىس جۇماعۇلوۆ. مىسالى, «جىلى ءۇي اتىراۋ» جشس-نەن اتىراۋ وبلىستىق مەملەكەتتىك كىرىستەر دەپارتامەنتىنىڭ لاۋازىمدى تۇلعالارىنىڭ ءىس-ارەكەتتەرىنە قاتىستى جوبالىق كەڭسەگە ءوتىنىش ءتۇسىپ, ماتەريال جيناقتالىپ, سىبايلاس جەمقورلىققا قارسى ءىس-قيمىل ۇلتتىق بيۋروسى اتىراۋ وبلىستىق دەپارتامەنتىمەن مەملەكەتتىك كىرىستەر دەپارتامەنتىنىڭ ىشكى قاۋىپسىزدىك قىزمەتىنە ەكونوميكالىق تەرگەۋ قىزمەتىندەگى تەرگەۋشىلەردىڭ ءىس-ارەكەتتەرىنىڭ زاڭدىلىعىن تەكسەرۋ ءۇشىن جولدانعان. ناتيجەسىندە ەكونوميكالىق تەرگەۋ قىزمەتىنىڭ «جىلى ءۇي اتىراۋ» جشس-نە جۇرگىزگەن قىلمىستىق تەرگەۋ جۇمىستارى توقتاتىلىپ, كاسىپكەردىڭ قۇقىعى قورعالدى. سول سەكىلدى, «المالى قۇس» جشس-نەن سۋبسيديا ماسەلەسى بويىنشا وبلىستىق اۋىل شارۋاشىلىعى باسقارماسى قىزمەتكەرلەرىنىڭ ءىس-ارەكەتىنە قاتىستى تۇسكەن ءوتىنىش نەگىزىندە دەپارتامەنتتىڭ ارالاسۋىمەن اتالعان سەرىكتەستىك سۋبسيدياعا قول جەتكىزدى.
جالپى ايماقتا سىبايلاس جەمقورلىققا قارسى مادەنيەتتى, ادامداردىڭ ساناسىندا سىبايلاس جەمقورلىققا قارسى تۇرۋ ويىن قالىپتاستىرۋ ماقساتىندا اتقارىلىپ جاتقان شارالاردىڭ قاتارى كوپ. وتكەن جىلدىڭ وزىندە اتالعان دەپارتامەنت 2238 شارا وتكىزدى. ەلباسى جولداۋىندا اتاپ كورسەتكەن تاپسىرمالار اياسىندا «سىبايلاس جەمقورلىقتان ادا وڭىرلەر», «اتىراۋ-ادالدىق الاڭى» جوبالارى دا قوعام دەرتىمەن كۇرەسكە باعىتتالعان.
باقىتگۇل باباش,
«ەگەمەن قازاقستان»
اتىراۋ
