«وزىمىزدە جۇرەككە كۇردەلى, اشىق وتا جاساۋ, جالپى كارديولوگيالىق قىزمەت كورسەتۋ اۋرۋحاناعا رچل اپپاراتىنىڭ, تامىر ءىشىن تەكسەرەتىن ۋزي جانە تاعى باسقا زاماناۋي جابدىقتاردىڭ بولۋىن تالاپ ەتۋ سەبەبىنەن توقتاتىلعان ەدى. ونىڭ بارلىعى دا قارجىلاندىرۋداعى قيىندىقتاردان ورىن الدى. 2018 جىلى اۋرۋحانالاردا بىردە-ءبىر وتا جاساعان جوقپىز. بارلىق ناۋقاستاردى استاناعا جىبەرىپ وتىردىق» دەيدى وبلىستىق اۋرۋحانانىڭ باس دارىگەرى يۋري مويسەەۆ. ءاۋ باستا وبلىستىق اۋرۋحانانىڭ كارديولوگيا بولىمشەسىندە جىلىنا 5-6 وتا جاسالا باستادى. كەيىن رۋدنىي قالالىق اۋرۋحاناسىنىڭ دارىگەرلەرى دە جۇرەك اقاۋىن وتالىق جولمەن ەمدەي باستادى. بۇرناعى جىلدارى ەكى اۋرۋحانادا جىلىنا 170-كە دەيىن وتا جاسالعان بولاتىن. بىراق جۇرەك اقاۋىنان زارداپ شەككەندەر سانى كوپ بولعاندىقتان, اپتاسىنا 5 ناۋقاسقا دەيىن استاناعا بارىپ ەمدەلۋگە جىبەرىپ وتىردى. كارديولوگيالىق ناۋقاستاردى وتا ارقىلى ەمدەۋ ۋاقىتشا توقتاعانمەن, كادرلار بىلىكتىلىگى تومەندەمەگەن, ولاردى دايىنداۋ, وقىتۋ, تاجىريبەدەن وتكىزۋ جۇمىستارى جالعاسا بەردى.
جاقىندا وبلىستىق اۋرۋحاناعا انگيوگراف اپپاراتى الىندى. ول تامىرداعى قان ءجۇرىسىن انىقتايدى. وبلىستىق اۋرۋحانانىڭ انگيوگرافيا بولىمشەسىنىڭ مەڭگەرۋشىسى بولات قانافيننىڭ ايتۋىنشا, ەلىمىزدىڭ سولتۇستىك وبلىستارىندا بۇل اپپاراتتىڭ بالاماسى جوق.
«ادەتتە, كارديولوگيالىق ورتالىقتار بارلىق وبلىستا جۇمىس ىستەيدى. ولاردا جۇرەك-قان تامىرلارى اۋرۋلارىن انىقتايتىن اپپاراتتار بار, بىرەۋ ەمەس, بىرنەشە بولۋى دا ىقتيمال. بىراق ءبىز الىپ وتىرعان جاپوندىق اپپارات قازاقستان وڭىرلەرى اراسىندا شىمكەنت پەن بىزدە عانا بار. پايدالانۋعا وتە ىڭعايلى, زاماناۋي ۇزدىك قۇرال. ونىمەن جۇمىس ىستەۋدىڭ ساپاسى رەسپۋبليكاداعى ورتالىقتاردان ەش كەم سوقپايدى» دەيدى بولات قانافين.
ەندى جۇرەك اقاۋىنان زارداپ شەككەن قوستانايلىقتار سىرتقا شابىلماي, وبلىس ورتالىعى مەن رۋدنىي قالاسىنداعى اۋرۋحانالاردا ەم الاتىن بولادى.
«استانادا اۋرۋلارعا وتانى ساپالى جاسايدى, بىراق ناۋقاستارعا قارجى جاعىنان قيىندىق اكەلۋى مۇمكىن, ولاردىڭ ۇلكەن قالادا توقتايتىن ءۇيى, ساپالى كۇتىمى بولا بەرمەيدى. ولار وتا جاسالعان سوڭ قوستانايعا جەتكەنشە ون ەكى ساعات پويىز ۇستىندە شايقالىپ كەلەدى. مۇنىڭ بارلىعى ناۋقاسقا ارتىق سالماق سالادى. ال وزىمىزدە ەمدەسەك, ولاردىڭ وتادان كەيىنگى كۇتىمى دە جاقسارادى, قينالمايدى. قازىر وبلىستا جەدەل وتا جاساۋدى كەرەك ەتەتىن 20 ناۋقاس كەزەكتە تۇر» دەيدى كارديوحيرۋرگ قايرات بەگەنوۆ.
ال قوستانايدا جۇرەك-قان تامىرلارى اۋرۋلارىنىڭ بىرنەشە تۇرىنەن جىلىنا كەمىندە 300 وپەراتسيا جاسالۋى ءتيىس. ازىرشە وبلىستا ازىرگە 40 وتا جاساۋعا رۇقسات بەرىلگەن. قايرات بەگەنوۆتىڭ ايتۋىنشا, الداعى ۋاقىتتاعى وتانىڭ سانى قارجىلاندىرۋعا بايلانىستى بولماق.
ءنازيرا جارىمبەت,
«ەگەمەن قازاقستان»
قوستاناي
