تۇركىستان قالالىق كاسىپكەرلىك ءبولىمىنىڭ باسشىسى گۇلجامال ماحانوۆا اەا تۇركىستانداعى يندۋستريالدى ايماق جانىنا ورنالاستىرىلاتىنىن اتاپ ءوتتى. ونىڭ سوزىنە قاراعاندا, اعىمداعى جىلدىڭ ءۇشىنشى توقسانىنان باستاپ ايماقتا جوبالاردى ورنالاستىرۋ جۇمىستارى جۇرگىزىلەدى. اۋماعى 400 گەكتار بولاتىن جەرگە بولاشاقتا 200 جوبانى ورنالاستىرۋ جوسپارلانعان. بۇگىندە جەردىڭ قۇجاتتاندىرۋدى قالالىق كاسىپكەرلىك ءبولىمى جۇرگىزىپ جاتىر.
جاقىن ارادا ينفراقۇرىلىم جۇيەلەرىن تارتۋ جۇمىستارى باستالادى. جوبالاردى ىرىكتەپ, ولاردىڭ جۇزەگە اسۋىن ارنايى ەكونوميكالىق ايماق ديرەكتسياسى قامتاماسىز ەتەتىن بولادى.
«قازىر يندۋستريالدى ايماققا بارلىق ينفراقۇرىلىم جۇيەلەرى تارتىلىپ قويعان. ەندى سول ينفراقۇرىلىمنىڭ بارلىعىن ارنايى ەكونوميكالىق ايماققا قاراي سوزامىز. ول جەرگە سۋ, جارىق, گاز - بارلىعى جەتكىزىلەدى», - دەيدى قالالىق كاسىپكەرلىك ءبولىمىنىڭ باسشىسى.
ال ارنايى ەكونوميكالىق ايماقتا جۇزەگە اساتىن جوبالار مەملەكەت تاراپىنان جەتى بىردەي جەڭىلدىككە يە بولادى دەپ كۇتىلۋدە. اتاپ ايتقاندا, وسى جەردەگى جوبالاردى جۇزەگە اسىرۋعا قاجەتتى شەتتەن اكەلىنگەن زاتتاردان كەدەندىك قۇن سالىعى ۇستالمايدى. سونىمەن قاتار كاسىپكەرلەر 10 جىلعا دەيىن جەردى تەگىن پايدالانادى. ال كوممۋنالدىق تاريفتەر قۇنى 35 پايىزعا دەيىن جەڭىلدەتىلمەك. وبلىس ورتالىعىنداعى ءوندىرىستى وركەندەتەتىن ايماقتى تەزدەتىپ ىسكە قوسۋ ءۇشىن بۇگىندە قالا جانە وبلىس بيلىگى ءتيىستى جۇمىستاردى اتقارىپ جاتىر.
